JOB 41
41
1¿Mejl ba a luc loq'uel ajin ti a lucojib? ¿Mejl ba a cʌchben i yac' ti' xʌc'ti' yic'ot lazo? 2¿Mejl ba a julben i ni' ti lazo? ¿Mejl ba a jec'ben i xʌc'ti' ti lanza lawux? 3¿Mu' ba i c'ajtibeñet ti wocol t'an cha'an ma' p'untan? ¿Mu' ba i pejcañet ti uts bʌ t'an? 4¿Mu' ba i yʌc' i bʌ ti a wenta cha'an ma' c'ʌn ti to'ol e'tel jinto mi' chʌmel? ¿Mu' ba i bʌc'ñañet? 5¿Mejl ba a wuts'esan che' bajche' te'lemut? ¿Mu' ba caj a wʌq'ueñob xch'oc bʌ a walobilob cha'an mi' yʌsiñob? 6Jini xchuc chʌyob, ¿mu' ba caj i chombeñob jini mu' bʌ i cha' choñob? ¿Mu' ba caj i t'oxbeñob i pi'ʌlob cha'an mi' c'uxob? 7Mi tsa' julbe i pʌchilel ti lucojib o mi tsa' julbe i jol ti lanza te', ¿mu' ba caj i yubin?
8Mi tsa' wʌc'ʌ a c'ʌb ti' jol, mi caj a chʌn ña'tan chuqui tsi' tumbeyet. Jasʌl junyajl. Mach cha'yajlic mi caj a mel. 9Lolom jach ma' ñop a chuc. Bʌbʌq'uen jax majqui mi' lon ñop i chuc. 10Ma'anic majqui mi' lon ña'tan i ñijcan. Jini tonto bʌ ja'el mi' bʌc'ñan. Mi che'ʌch i bʌc'ñʌntel, ¿mach ba anic c bʌc'ñʌntel ja'el? ¿Majqui mi' wa'tʌl tic tojlel? 11¿Am ba ba' tsajniyon ti c'ajtiya? ¿Am ba chuqui tsac majña mu' bʌ caj c cha' sutq'uin? Pejtel chuqui an ti yebal panchan c cha'añʌch.
12Yom mic subeñet ja'el bajche' an i bontʌlel yic'ot bajche' c'amel an i p'ʌtʌlel i cuctal yic'ot i yoc. 13Ti pejtelel ora ma'anic majqui tsi' ts'ulbe i pʌchilel. Ch'ʌjyatax i pʌchilel. Ma'anic majqui tsi' sʌl jec'be i sujl. 14¿Majqui mi mejlel i jamben i yej? Bʌbʌq'uen jax i bʌquel i yej. 15Jini i sujl am bʌ ti' pat mi' ñʌp' i bʌ ti lajm ti lajm. Wen lʌp'ʌl tac che' bajche' sello. 16Mach ñumic ic' ya' ba' lʌp'ʌl tac i sujl. 17Ma'anic chuqui mi mejlel ti ñumel. Ma'anic majqui mi mejlel i ts'ulben i sujl.
18Chʌ'ʌch yilal i ja'tsijn bajche' i nich c'ajc. Añʌch i c'ʌc'al i wut che' bajche' i c'ʌc'al q'uin ti sʌc'an. 19Mi' loq'uel c'ajc ti' yej yic'ot i nich tac c'ajc. 20Mi' loq'uel ic' ti' ni' che' bajche' i yowix ja' woli bʌ ti lojc ti p'ejt c'ʌcʌl bʌ ti yoquejt ya' ba' woli' pulel jomojch'. 21I yiq'uilel i yej mi' xic' c'ajc ba' ñʌch'ʌl abʌc. Mi' loq'uel c'ajc ti' yej.
22Cabʌl jax i p'ʌtʌlel i bic'. Baqui jach mi' majlel mi' toj sajtel i pusic'al majqui jach mi' lʌc' i bʌ. Mi' c'un'an pañimil ti bʌq'uen. 23Mi' pʌc i bʌ i pʌchilel. Ch'ʌjyatax i bʌc'tal. Ma'anic i lewil. 24Tsʌts i pusic'al che' bajche' xajlel, che' bajche' ña'tun. 25Che' mi' letsan i jol, mi' cajelob ti bʌq'uen jini p'ʌtʌlo' bʌ. Mi' toj sajtelob i pusic'al. 26Lolom jach mi lac jul ti espada mi ti machit mi ti yan tac bʌ e'tijibʌl. Ma'anic mi' mʌy i bʌ. 27Jini fierro lajal jach mi' q'uel bajche' jam mach bʌ wisilic i p'ʌtʌlel. Jini chʌchʌc taq'uin lajal jach bajche' i yoc'beñal te'. 28I te'el lac jalʌjb mi' lon taj. I tuñil lac pʌrʌntun lajalʌch ti' wut bajche' tiquin bʌ jam. 29Lajal mi' q'uel jini jats'onib te' bajche' amuy. Che' sʌrʌcña mi' yubiben i yiq'uilel machit, mu' jach i wajlen. 30Che'ʌch i yebal bajche' i sajl tac uc'um. Baqui jach mi' ñumel mi' cʌytʌl i yejtal tac i ñʌc' ti oc'ol.
31Ya' ba' mi' ñijcan i bʌ mi' cajel ti lojc ja' che' bajche' ti p'ejt am bʌ ti c'ajc. Mi' tit'esan jini colem ñajb che' bajche' ts'ac am bʌ ti limete. 32We'ecña ja' ya' ba' tsa' ñumi. Sʌc i lojc che' bajche' i tsutsel xñoxob. 33Ti pejtelel pañimil ma'anic yambʌ bʌc'ñʌbil bʌ bajche' jini. I bajñel mach yujilic bʌq'uen. 34Mi' ts'a'len chuqui tac wen chan. I yumʌch pejtel mu' bʌ i chañ'esañob i bʌ. Che' tsi' yʌlʌ lac Yum.
Currently Selected:
JOB 41: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.