ISAIAS 47
47
I jilibal Babilonia
1Juben ti a buchlib, Babilonia. Buchi' ti lum. Tsa'ix ts'ʌctiyi i yorajlel a ñuclel. Mach chʌn yumʌletix. Mach chʌn wen chumuletix che' bajche' i t'ojol jax bʌ xch'oc am bʌ i p'untʌntel. Ma'anix mi caj a wʌjlel ti uts'at. 2Ch'ʌmʌ jini ña'tun. Juch'u harina. Loc'o i mosil a jol. Letsan a majts. Chan mi caj a letsan cha'an ma' t'um ja' ba' ma' c'axel ti colem ja'. 3Mi caj a q'uejlel che' pits'ilet. Mi caj a wubin quisin ti' tojlel jini mu' bʌ i tic'lañet. Mi caj j q'uextʌbeñet a mul. Ma'anic majch mi caj c p'untan. 4Che'ʌch tsi' yʌlʌ jini Ch'ujul Bʌ i cha'an Israel tsa' bʌ i mʌñʌyonla, i Yum Panchan yic'ot Pañimil. Che'ʌch i c'aba'.
5Ñʌch'ʌl yom ma' buchtʌl, Babilonia. Cabʌl mi caj a mel a pusic'al come ma'anix a c'uxbintel ti' tojlel yumʌlob. Mach chʌn yumʌletix ti pañimil. 6Che' bʌ tsac mich'le c cha'año' bʌ, tsa cʌc'ʌyob ti a c'ʌb cha'an mi' tojob i mul. Pero ma'anic tsa' wis p'untayob. Tsa' wʌq'ueyob al bʌ i cuch jini xñoxo' bʌ. 7Tsa' lon ña'ta yumʌlet ti pejtelel ora. Jini cha'an ma'anic tsa' p'unta c cha'año' bʌ. Ma'anic tsa' wis ña'ta mi mux caj a toj a mul cha'an tsa' tic'la c cha'año' bʌ.
8Jini cha'an ñich'tan c t'an. Lajalet bajche' ts'i'lel bʌ x'ixic mu' bʌ i mulan jini wen i t'ojol tac bʌ. Ma' wʌl ti a pusic'al: “Jasʌlonix. Joñon jach mic cha'len yumʌl. Mach talic wocol tic tojlel. Ma'anic mi caj j cʌytʌl ti meba'. Ma'anic mi caj i chʌmelob calobilob”, lon che'et. 9Pero tal ti ora ili cha'chajp wocol ti a tojlel ti jump'ejl jach bʌ q'uin. Meba' x'ixic mi caj a cʌytʌl. Mi caj a chilbentel a walobilob, anquese a wujil wujt, anquese ma' pejcan xiba. Lolom jach ma' mel ñuc tac bʌ cha'an ma' lon coltan a bʌ.
10Tsa' lon ña'ta jasʌletix anquese cabʌl a mul. Tsa' wʌlʌ ti a pusic'al: “Ma'anic majch mi' q'uelon”, che'et. Pero lotibilet cha'an jini wujtintel. Tsa' wʌlʌ: “Joñon jach mic cha'len yumʌl. Ma'anic yambʌ bajche' joñon”, lon che'et. 11Pero tal wocol ti a tojlel. Mach mejlelic a mʌctan. Mi caj i jisañet. Mach mejliquet ti colel. Che' mach yʌxʌlic a wo mi caj i bʌc' tilel ñuc bʌ wocol ti a tojlel. Ma'anic mi' ñusʌntel a mul.
12Chʌn pejcan xiba, chʌn mele ñuc tac bʌ i ye'tel cha'an ma' ñop a bʌc'tesan jini mu' bʌ i tilel i jisañet. Chʌn cha'len wujt che' bajche' tsa' cha'le c'ʌlʌl che' xch'oquet to. Tic'ʌl mi muc'ʌch a coltan a bʌ. Che'ʌch wola' lon ña'tan. 13Tsa' jisa a p'ʌtʌlel ti pejtelel chuqui tsa' lon mele cha'an ma' coltan a bʌ. La' tilicob a waj toj'esayajob jini jal bʌ mi' q'uelob ec' mu' bʌ i lon ña'tañob i sujmlel ec', mu' bʌ i subob chuqui mi caj i yujtel. La' i coltañetob ti' yorajlel wocol. 14Pero p'isi ti a wenta, lajalob mu' bʌ i q'uelob ec' bajche' i jamil otot mu' bʌ i bʌc' jilel ti c'ajc. Ma'anic mi mejlel i coltañob i bʌ ti c'ajc, come c'ax ticʌw. Mach lajalic bajche' c'ajc ba' mi laj q'uixñesan lac bʌ. 15Laj majlemobix a cʌñʌyo' bʌ tsa' bʌ i pejcayet c'ʌlʌl che' bʌ tsa' coliyet. Ti jujuntiquil tsi ch'ʌmʌyob i bijlel. Wʌle ma'anic majch mi' coltañet.
Currently Selected:
ISAIAS 47: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.