ISAIAS 48
48
Lac Yum tsi' tsictesa wen bʌ t'an
1Ñich'tan c t'an, i yalobil Jacob, ochem bʌ a c'aba ti Israel, i p'olbalet bʌ Judá. Ma' wa'chocon a t'an ti' c'aba' lac Yum. Ma' lon sub ñopol a cha'an i Dios Israel, pero mach xuc'uletic yic'ot. Mach jump'ejlic a pusic'al. 2Ma' wʌl chucul a c'aba' ti jini ch'ujul bʌ tejclum, cʌyʌlet ti' p'ʌtʌlel i Dios Israel, i Yum Panchan yic'ot Pañimil.
3Anix ora tsac tsictesʌbeyet pejtel mu' bʌ caj ti ujtel. Che' bʌ tsac subu, ti jumuc' jach tsac ts'ʌctesa. Tsa' ujti che' bajche' tsa cʌlʌ. 4Tsac ña'ta jontolet, xiq'uilet jax ti a t'an. Tsʌts a bic' yilal bajche' tsucu taq'uin mach bʌ anic mi jac' i toj'esʌntel. Mach a womic a ñop. 5Jini cha'an anix ora tsac tsictesʌbeyet chuqui mi' caj ti ujtel che' maxto ujtemic ame a lon sub: “Jiñʌch c dios tsa' bʌ i mele. Ti' caj jini pʌc'bil bʌ i yejtal tsa' ujti”, ame lon che'iquet.
6Tsa'ix a wubi pejtel c t'an. Tsa'ix a q'uele chuqui tsa' ujti. Yomix ma' ch'ʌmben isujm. Yomix ma' sub mach i ye'telic yambʌ dios. Wʌle mi caj c tsictesʌbeñet mucul tac bʌ, maxto bʌ cʌmbilic a cha'an. 7Wolic mel tsijib tac bʌ, maxto bʌ ubibilic a cha'an, ame a lon al ubibilix a cha'an. 8Mach ubibilic a cha'an. Mach cʌmbilic a cha'an ti pejtelel ora. Anix ora wola' mel a bʌ ti xcojc, come mach xuc'uletic, ch'aplomet jax c'ʌlʌl che' bʌ tsa' wila pañimil.
9Cha'an mi' tsictiyel i ñuclel j c'aba' jini cha'an wolic chʌn cuchbeñet a mul. Cha'an com j c'uxbintel jini cha'an ma'anic tsac bʌc' jisayet. 10Tsac ñusayet ti prueba che' bajche' mi' pulel sʌsʌc taq'uin ti c'ajc cha'an mi' sʌq'uesʌntel, pero ma'anic tsac taja wen bʌ a pusic'al. 11Tsa cʌq'ueyet a tsico' pusic'al cha'an i c'uxbintel j c'aba' yic'ot cha'an ti' caj c ñuclel ame p'ajlecon cha'an jini mach bʌ i cʌñʌyoñobic.
Lac Yum mi caj i coltan i cha'año' bʌ
12Ubiñon Israel, c tejclum Jacob, tsa' bʌ c pʌyʌ. Joñon jini Ñaxan Bʌ yic'ot Cojix Bʌ. Añon ti pejtelel ora. 13Joñon tsac xuc'choco jini pañimil tij c'ʌb. Joñon tsac lich'choco jini panchan ti ñoj bʌ j c'ʌb. Ujtel jax to c pejcañob, tsa' cajiyob ti ajñel.
14Tempan la' bʌ, ñich'tʌbeñonla c t'an. ¿Majqui tsi' wʌn subu chuqui mi' caj ti ujtel? Come tal jini winic mu' bʌ j c'uxbin. Mi caj i mel pejtel tsa' bʌ c wʌn ña'ta ti' contra Babilonia. Mi caj i yʌc' ti pam pujquel jini soldadojob babiloniajob. 15Joñon tsac wʌn subu. Tsa cʌq'ue i ye'tel Ciro. Tsac pʌyʌ tilel. Tsaj colta cha'an mi' mʌjlel i cha'an. 16Lʌc'tesan la' bʌ ba' añon. Ñich'tanla c t'an. Ma'anic ba' ora tsac cha'le t'an ti mucul. Ba' ora mi' yujtel jini albil bʌ c cha'an ya' añon. Lac Yum Dios tsi' chocoyon tilel yic'ot i Ch'ujlel, che'en.
17Lac Yum, la caj Coltaya jini Ch'ujul Bʌ i Dios Israel woli' yʌl: Joñon a Yumon, a Dioson mu' bʌ j cʌntesañet cha'an ma' taj chuqui wen. Joñon mic toj'esañet ti a bijlel ba' yom ma' cha'len xʌmbal. 18Tsa'ic a jac'ʌ c mandar, cabʌlix i ñʌch'tilel a pusic'al che' bajche' colem ja' woli bʌ ti ajñel. Añʌch toj bʌ a pusic'al yic'ot cabʌl a p'ʌtʌlel che' bajche' wets'ecña bʌ ja'. 19Tsa'ic a jac'ʌ, cabʌlix a walobilob che bajche' i ji'il colem ja'. Uts'at i pusic'alob che' bajche' i tatob. Ma'anic mi' yajpel a c'aba' ti pañimil.
20Loq'uenla ti Babilonia. Cha'lenla c'ay che' wolix la' loq'uel majlel ba' cʌchʌletla. Tsictesanla c'ʌlʌl ti' xujc tac pañimil cha'an lac Yum tsi' colta israelob jini x'e'telob i cha'an. 21Anquese tsi' pʌyʌyob ñumel ti' tiquiñal pañimil, ma'anic tsi' yubiyob tiquin ti'. Tsi' top'o colom xajlel cha'an cholocña mi' loq'uel ja'. Tsi' yʌq'ueyob i jap. 22Pero ma'anic i ñʌch'tilel i pusic'al xjontolilob, che'en lac Yum.
Currently Selected:
ISAIAS 48: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.