EXODO 29
29
I sʌq'uesʌntelob Aarón yic'ot i p'olbal
(Lv. 8.1-36)
1Jiñʌch mu' bʌ caj a mel cha'an ma' sʌq'uesan Aarón yic'ot i yalobilob cha'an mi' yochel ti motomaj. Yajcan juncojt alʌ wacax i tat bʌ yic'ot cha'cojt tat tiñʌme', wen c'oc' bʌ, mach bʌ anic i chʌmel. 2Chajpan waj mach bʌ paj'esʌbilic, yic'ot pan mach bʌ paj'esʌbilic, tiq'uesʌbil bʌ ti aceite, yic'ot galleta mach bʌ paj'esʌbilic, ts'ajbilix bʌ ti aceite. Yom mi la' c'ʌn harina melbil bʌ ti trigo wen juch'bil bʌ. 3Yom ma' wʌc' jini waj ti jump'ejl chiquib cha'an ma' wʌq'ueñon yic'ot jini alʌ tat wacax yic'ot jini cha'cojt tat tiñʌme'. 4Yom ma' pʌy majlel Aarón yic'ot i yalobilob ti' ti' jini Tabernáculo cha'an ma' pocbeñob i c'ʌb yic'ot i yoc ti ja'. 5Che' jini yom ma' ch'ʌm jini bujcʌl tac cha'an ma' lʌpben Aarón. Ma' lʌpben i pislel tac. Cʌchben ja'el i cajchiñʌc'. 6Aq'uen jini alʌ pixolʌl ti' jol. Yom ma' wʌq'uen jini ch'ujul bʌ alʌ tsucu taq'uin melbil bʌ ti oro ti' pam jini pixolʌl. 7Che' jini yom ma' ch'ʌm jini aceite mu' bʌ i c'ʌjñel tac ya' ti Tabernáculo. Mulben i jol. Boño jini motomaj.
8Pʌybeñob tilel i yalobilob ja'el. Lʌpbeñob jini pʌl bʌ i bujc ja'el. 9Aq'ueñob i cajchiñʌc' ja'el. Aq'ueñob i yalʌ pixolob ya' ti' jolob ti jujuntiquil. Che' jini mi caj i yochelob ti motomaj ti pejtelel ora. Che'ʌch yom ma' wa'chocoñob ti motomaj jini Aarón yic'ot i yalobolob.
10Che' jini yom ma' pʌy majlel jini alʌ tat wacax ba'an jini Tabernáculo ba' mi' tempañob i bʌ. La' i yʌc'ob i c'ʌb jini Aarón yic'ot i yalobilob ya' ti' jol jini alʌ tat wacax ya' tic tojlel ba'an jini Tabernáculo. 11Yom ma' tsʌnsan jini wacax tic tojlel ya' ti' ti' jini Tabernáculo. 12Yom ma' ts'aj i yal a c'ʌb ya' ti' ch'i'ch'el jini wacax cha'an ma' bomben i xulub tac jini pulʌntib. I colojbal jini ch'i'ch' yom ma' bec' ya' ti yebal jini pulʌntib. 13Yom ma' ch'ʌm i cebujlel ñotol tac bʌ ya' ti' soyta' tac yic'ot ya' bʌ an ti' pam i yolmal yic'ot am bʌ ti' cha'wejlel i riñón, yic'ot i lewil cha'an ma' pul ya' ti pulʌntib. 14Pero i bʌc'tal jini alʌ tat wacax yic'ot i pʌchʌlel yic'ot i ta' yom ma' pul ti c'ajc ti' junwejlel jini tejclum. Jiñʌch majtañʌl cha'an mulil.
15Che' jini yom ma' pʌy tilel juncojt tat tiñʌme'. La' i yʌc'ob i c'ʌb ya' ti' jol tat tiñʌme' jini Aarón yic'ot i yalobilob. 16Tsʌnsan jini tat tiñʌme'. Tsijcan i joytʌlel jini pulʌntib ti' ch'ich'el. 17Bic'ti t'ojo jini tat tiñʌme'. Pocben i soyta' yic'ot i yoc. Che' jini ac'ʌ ya' ba'an jini bic'ti t'ojlix bʌ i bʌc'tal ya' ba'an i jol ja'el. 18Yom ma' pul pejtelel jini tat tiñʌme' cha'an pulbil bʌ i majtan a Yum. Jiñʌch yom bʌ mi' pulel, jini mu' bʌ c ch'ʌm tic wenta.
19Che' jini yom ma' ch'ʌm jini yambʌ tat tiñʌme'. La' i c'ʌcchocoñob i c'ʌb jini Aarón yic'ot i yalobilob ya' ti' jol jini tat tiñʌme'. 20Tsʌnsan ja'el. Yom ma' ch'ʌmben i ch'i'ch'el ti a c'ʌb cha'an ma' bomben ti' ñoj bʌ i c'unlel i chiquin Aarón. Che' ja'el i yalobilob yom ma' bombeñob ja'el. Yom ma' bombeñob ja'el ñoj bʌ i ña'al i c'ʌb yic'ot ñoj bʌ i ña'al i yoc. Tsijcan i colojbal jini ch'ich' ti' joytʌlel jini pulʌntib. 21Yom ma' c'ʌn lamital jini ch'ich' am bʌ ti pulʌntib yic'ot ts'ita' jini aceite mu' bʌ i c'ʌjñel ti Tabernáculo cha'an ma' tsijcañob Aarón yic'ot i yalobilob che' yic'ot i pislelob. Che' jini sʌq'uesʌbilobix mi' cʌytʌl jini Aarón yic'ot i yalobilob. Sʌq'uesʌbilix mi' cʌytʌl i pislel ja'el.
22Yom ma' ch'ʌm ja'el i cebujlel jini tat tiñʌme' yic'ot i lewil i ñej, yic'ot i cebujlel ñotol tac bʌ ti' soyta', yic'ot am bʌ ti' yolmal, yic'ot ti' cha'wejlel i pat, yic'ot pejtelel am bʌ ti' pam i bʌc'tal, yic'ot am bʌ ti' ñoj bʌ i ya', come jiñʌch tat tiñʌme' cha'an sʌq'uesaya. 23Ch'ʌmʌ ja'el junsejl caxlan waj yic'ot junsejl waj melbil bʌ ti aceite, yic'ot jump'ejl galleta am bʌ ti chiquib yic'ot waj mach bʌ paj'esʌbilic, jini ac'bil bʌ tic tojlel, che'en lac Yum. 24Ac'ʌ pejtelel ti' c'ʌb Aarón yic'ot ti' c'ʌb i yalobilob. Che' jini yom ma' jʌmts'un che' bajche' majtañʌl jʌmts'ubil bʌ tic tojlel, che'en lac Yum.
25Ti wi'il yom ma' ch'ʌmbeñob ti' c'ʌb cha'an ma' pul ya' ti pulʌntib. Jiñʌch pulbil bʌ c majtan, uts'at bʌ, xojocña bʌ, pulbil bʌ ti c'ajc.
26Yom ma' ch'ʌm i tajn tat tiñʌme' mu' bʌ i c'ʌjñel ti sʌq'uesʌntel Aarón cha'an ma' jʌmts'un, che' bajche' jʌmts'ubil bʌ c majtan. Jiñʌch mu' bʌ a ch'ʌm, che'en lac Yum. 27Yom ma' t'ox i tajn jʌmts'ubil bʌ yic'ot i ya' tsa' bʌ ajq'ui cha'an c majtan che' bʌ tsa' sʌq'uesʌnti Aarón yic'ot i yalobilob. 28I cha'añʌch Aarón yic'ot i yalobilob yom bʌ mi' yʌq'uentelob cha'an israelob ti pejtelel ora. Jiñʌch pulbil bʌ c majtan mu' bʌ i yʌc' jini israelob cha'an mi' yʌq'ueñoñob wocolix cʌlʌ.
29Jini ch'ujul bʌ i bujc tac Aarón mi caj i yʌq'uentelob i yalobilob che' mi' ch'ʌmbeñob i ye'tel. Mi caj i lʌpob cha'an mi' sʌq'uesʌntelob, cha'an mi' wa'chocontelob ti motomaj. 30Jini i yalobil Aarón mu' bʌ caj i ch'ʌmben i ye'tel, mi caj i lʌp i pislel c'ʌlʌl ti wucp'ejl q'uin che' mu' to caj i yochel ya' ti Tabernáculo cha'an mi' majlel ti e'tel ya' ti Ch'ujul bʌ Ajñibʌl.
31Yom mi la' ch'ʌmben i bʌc'tal jini tat tiñʌme' tsa' bʌ c'ʌjni cha'an mi' wa'chocontelob ti motomaj. Ch'ʌmʌla majlel cha'an mi la' ch'ʌx ti jump'ejl sʌq'uesʌbil bʌ ajñibʌl. 32Aarón yic'ot i yalobilob mi caj i c'uxbeñob i bʌc'tal jini tat tiñʌme' yic'ot jini waj am bʌ ti chiquib ya' ti' ti' jini Tabernáculo. 33Mi caj i c'uxob pejtelel tsa' bʌ aq'uentiyon cha'an i tojol i mulob, cha'an mi' wa'chocontelob ti ye'tel, cha'an mi' sʌq'uesʌntelob. Pero jini yambʌ joch winic mach mejlic i c'ux come jini ch'ujulʌch. 34Yom mi la' pul jini we'elʌl mu' bʌ i colojbʌyel ti yijc'ʌlal come ch'ujulʌch.
35Che'ʌch yom ma' mel ti' tojlel Aarón yic'ot i yalobilob che' bajche' tsac subeyet. Wucp'ejl q'uin yom cha'an ma' wa'chocoñob. 36Ti jujump'ejl q'uin yom ma' tsʌnsan juncojt alʌ tat wacax cha'an i tojol mulil. Che' ma' wʌc' ti pulʌntib jini majtañʌl cha'an mulil mi caj c sʌq'uesan jini pulʌntib. Mi caj c boñe'. 37Wucp'ejl q'uin yom ma' chʌn ac' pulbil bʌ c majtan ya' ti pulʌntib cha'an sʌq'uesʌntel, cha'an ch'ujulʌch mi' majlel. Majqui jach mi' tʌl jini pulʌntib ch'ujulʌch mi caj i majlel ja'el.
Jini majtañʌl tac ti jujump'ejl q'uin
(Nm. 28.1-8)
38Jiñʌch chuqui yom ma' wʌc' ti pulʌntib: Ti jujump'ejl q'uin yom cha'cojt tat tiñʌme' am bʌ jump'ejl i jabilel. 39Jini juncojt mi caj a wʌq'ueñon ti sʌc'ajel. Jini yambʌ mi caj a wʌq'ueñon ti ic'ajel. 40Yic'ot jini ñaxan bʌ tiñʌme' yom ma' wʌc' uxp'ejl litro harina wen juch'bil bʌ, xʌbʌl bʌ yic'ot ojlil i cha'p'ejl litro aceite olivo, wen pets'bil yom. Xʌbʌl yom ja'el yic'ot ojlil i cha'p'ejl litro vino. 41I cha'cojtlel bʌ tiñʌme' yom ma' wʌq'ueñon che' ti ic'ajel, lajal ma' mel che' bajche' ti sʌc'ajel, yic'ot lajal i xojocñʌyel cha'an pulbil bʌ i majtan a Yum. 42Jiñʌch pulbil bʌ c majtan mu' bʌ a wʌq'ueñon ti jujump'ejl q'uin c'ʌlʌl ti pejtelel ora. Yom ma' wʌq'ueñon ti' ti' jini Tabernáculo baqui mi lac taj lac bʌ, baqui mic pejcañet. 43Ya'i mi caj cajñel yic'otob jini israelob. Mi caj i sʌq'uesʌntel jini Ajñibʌl cha'an c Ñuclel. 44Mi caj c sʌq'uesan jini Tabernáculo yic'ot jini pulʌntib, yic'ot ja'el Aarón yic'ot i yalobilob. Che' jini mi mejlel i melbeñoñob que'tel ti motomaj. 45Joñon mi caj c chumtʌl ti' tojlel jini israelob. Mi caj cochel ti' Dios. 46Che' jini mi caj i ña'tañob cha'an joñoñʌch i Yumoñob i Diosoñob tsa' bʌ c loc'sayob ti' lumal Egipto cha'an mi cajñel quic'otob. Joñon i Yumoñob yic'ot i Diosoñob, che'en lac Yum.
Currently Selected:
EXODO 29: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.