EXODO 30
30
Jini pulʌntib pom
(Éx. 37.25-28)
1Che' ja'el yom ma' mel jump'ejl pulʌntib cha'an ba' ma' pulbeñon pom. Yom melbil ti acaciate'. 2Yom i tamlel ojlil metro ti jujunwejl. Yom jump'ejl metro i chanlel. Jini i xulub ya' jach tem loq'uem yom ti jini pulʌntib. 3Yom mi la' tep' ti oro ti pejtelel, i pam yic'ot i xujc, yic'ot ti' joytʌlel. 4Ya' ti yebal i ti'il ti' cha'wejlel i xujc yom mi la' wʌc' cha'p'ejl xotol tac bʌ melbil bʌ ti oro. Jiñʌch cha'an mi la' juc ochel jini bara che' mi la' ch'ʌm majlel. 5Yom mi la' mel jini bara ti acaciate'. Yom tep'bil ti oro ja'el. 6Yom mi la' wʌc' jini pulʌntib ti' tojel jini joc'ol bʌ pisil mu' bʌ i mʌctan jini Arca ba' mi' lojtel jini lujump'ejl mandar. Jiñʌch ti' tojlel jini Ajñibʌl ba' mi' ñusʌntel mulil am bʌ ti' pam jini Arca ba' mi lac tem taj lac bʌ.
7-8Ti jujump'ejl sʌc'ajel che' mi' sujcun jini lámpara Aarón, mi caj i pul pom mu' bʌ i yʌc' i yuts'il ya' ti pulʌntib, yic'ot ti ic'ajel ja'el che' woli' tsuc' jini lámpara. Jiñʌch yom bʌ mi la' mel ti pejtelel ora tic tojlel, jatet yic'ot la' walobilob, che'en lac Yum. 9Mach yomic mi la' wʌc' ti pulʌntib jini pom mach bʌ anic tsac subeyet. Mach a mul jini pulʌntib ti lʌmʌl bʌ majtañʌl mach bʌ anic tsac subeyet. 10Jini Aarón, cojach junyajl yom ti jump'ejl jab mi' yʌc' majtañʌl cha'an mulil ya' ti' xulub jini pulʌntib. Yom mi' c'ʌmben i ch'ich'el jini majtañʌl cha'an bʌ mulil. Che' jini mi caj i yʌc' i tojol mulil ti jujump'ejl jab c'ʌlʌl ti pejtelel ora. C'ax ch'ujul tic tojlel. Che' tsi' yʌlʌ lac Yum.
I tojol cha'an mi' loq'uel ti libre
11-12Lac Yum tsi' sube Moisés: Che' ma' tsic jini israelob ti jujuntiquil, yom mi' yʌq'ueñoñob tojoñel cha'an ma'anic mi' tilel wocol ti' tojlelob. 13Ti jujuntiquil yom mi' yʌc'ob wʌcp'ejl peso cha'an c majtan. 14Pejtelel winicob tsicbilix bʌ che' anix junc'al i jabilel c'ʌlʌl che' ñoxix, yom mi' yʌc' i taq'uin cha'an c majtan. 15Ts'ʌcʌl yom jini wʌcp'ejl peso, mi jinic rico bʌ ma'anic i ñumel mi' yʌc', mi jinic ja'el pobre bʌ t'ox jubem mi' yʌc', pero jini taq'uin jiñʌch i c'ʌjnibal cha'an mi' ñusʌbentelob i mul. 16Yom mi la' ch'ʌmben jini taq'uin pejtelel israelob mu' bʌ i yʌc'ob cha'an i tojol i mul. Yom mi' c'ʌjñel jini ofrenda ti Tabernáculo ba' mic pʌs c bʌ. Jini ofrenda mi' yʌc' ti ña'tʌntel i ñusʌbentelob i mul israelob tic tojlel, la' Yumon bʌ, che'en lac Yum.
Jini ts'ajquibil bʌ ja' melbil bʌ ti bronce
17-18Lac Yum tsi' sube Moisés: Che' ja'el yom ma' mel i yajñib ja', jiñʌch tanque, ti puro bronce. Yom i buchlib ja'el melbil bʌ ti bronce, cha'an mi' c'ʌjñel che' an chuqui mi' pojquel. Yom ma' wʌc' ti' yojlil jini Tabernáculo yic'ot jini pulʌntib. Yom ma' wʌc' ja' ja'el. 19Aarón yic'ot i yalobilob mi caj i c'ʌñob cha'an mi' pocob i c'ʌb yic'ot i yoc. 20Wersa yom mi' pocob i c'ʌb yic'ot i yoc che' bajche' jajayajl mi' yochelob ya' ti Tabernáculo yic'ot che' mi' lʌc'tesañob i bʌ ya' ti' t'ejl pulʌntib cha'an mi' pulbeñoñob c majtan. Che' jini ma'anic mi caj i chʌmelob. 21Che'ʌch yom mi' chʌn melob ti pejtelel ora c'ʌlʌl ti' yorajlel i p'olbalob. Che' tsi' yʌlʌ lac Yum Dios.
Jini aceite cha'an mi' boñob i bʌ
22-23Lac Yum Dios tsi' chʌn pejca Moisés: Yom ma' taj xojocña bʌ perfume, jiñʌch ñumen wen tac bʌ, che' bajche' mirra ñumen wen bʌ, yom ti cha'p'ejl mil peso. Yom ojlil che' bajche' jini xojocña bʌ canela che' bajche' jump'ejl mil peso. Yom jump'ejl mil peso ja'el jini xojocña bʌ cálamo. 24Yom mil quinientos peso i tojol jini casia yic'ot wʌcp'ejl litro jini olivo aceite. 25Yom ma' xʌbulan iliyi cha'an ma' mel jini aceite mu' bʌ i c'ʌjñel cha'an ma' boñob. Xints'ʌcʌl yom i xajb tac che' bajche' mi' melob ts'ac, an tac bʌ ti botica. Jiñʌch ch'ujul bʌ bojnibʌl. 26Yom ma' c'ʌn, jini cha'an ma' bon jini Tabernáculo yic'ot jini Arca cha'an cʌntesa, 27yic'ot jini mesa yic'ot jini uch'ijibʌl tac yic'ot jini ba' mi' ts'ʌjbel c'ajc, yic'ot i yajñib aceite yic'ot i pulʌntib pom. 28Boño ja'el jini pulʌntib cha'an pulbil bʌ c majtan yic'ot pejtelel chuqui tac mi' c'ʌjñel, yic'ot i yajñib ja' yic'ot i buchlib. 29Che'ʌch yom ma' sʌq'uesan cha'an ch'ujulʌch mi' yajñel. Majqui jach mi' tʌl mi caj i sʌq'uesʌntel tic wut.
30Boño ja'el jini Aarón yic'ot i yalobilob. Sʌq'uesañob cha'an mi' melbeñoñob que'tel ti motomaj. 31Subeñob jini israelob: “Jiñʌch ch'ujul bʌ aceite yom bʌ mi' c'ʌjñel cha'an bojñibʌl c'ʌlʌl ti pejtelel ora. 32Mach yomic mi' bajñel mucu c'ʌn yambʌ winic jini aceite. Mach yomic ma' mel ja'el jini aceite cha'an mi la' bajñel c'ʌn, come ch'ujulʌch. Yom ma' q'uel ti ch'ujul. 33Majqui jach mi' mel pom lajal bʌ bajche' iliyi mi caj i chojquel loq'uel ti' tejclum. Che'ʌch mi caj i yujtel ti' tojlel jini mu' bʌ i c'ʌn i bon joch winic”. Che' yom ma' subeñob israelob. Che' tsi' yʌlʌ lac Yum.
34Lac Yum tsa' to i cha' sube Moisés: Yom ma' ch'ʌm xojocña bʌ perfume, jiñʌch estacte yic'ot pulbil bʌ i pat te' yic'ot xojocña bʌ gálbano yic'ot xojocña bʌ pom ti junlajal bʌ i p'isol. 35Yom ma' c'ʌn pejtelel iliyi ti' melol jini perfume che' bajche' jini yujil bʌ melol. Otsʌben i yʌts'mil. Wen xajc'ubil yom, sʌc yic'ot ch'ujul ja'el. 36Yom ma' juch' ts'ita' jini pom, wen chʌmen yom, cha'an ma' wʌc' lamital ti' tojlel jini Arca am bʌ ti Tabernáculo ya' baqui mi caj c pʌsbeñet c bʌ. Pejtelel iliyi c'ax ch'ujulʌch. 37Mach yomic ma' mel ili perfume cha'an ma' bajñel c'ʌn, come c cha'añʌch. 38Majqui jach mi' bajñel mel yambʌ lajal bʌ che' bajche' jini perfume cha'an mi' sic', yom mi' chojquel loq'uel ti' lumal. Che' tsi' yʌlʌ lac Yum.
Currently Selected:
EXODO 30: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.