EXODO 28
28
Che' bajche' yilal i pislel jini motomajob
(Éx. 39.1-31)
1Yom ma' wa'chocon Aarón yic'ot i yalobilob cha'an mi' coltañetob. Yom mi' melbeñoñob que'tel jini motomajob. Jiñʌch Aarón, Nadab, Abiú, Eleazar, yic'ot Itamar i yalobil Aarón. 2Yom la' melben i pislel a wʌscun Aarón, ch'ujul bʌ, sʌc bʌ, yic'ot i t'ojol bʌ, cha'an mi' q'uejlel ti ñuc. 3Añob p'i'p'o' bʌ i pusic'al winicob tsa' bʌ cʌq'ueyob i ña'tʌbal ti' melol wen tac bʌ e'tel. Yom ma' pejcañob cha'an mi' melbeñob i pislel Aarón, cha'an che' jini mi' mejlel i yʌc' i bʌ cha'an mi' melbeñon que'tel che' bajche' motomaj. 4Jini bujcʌl tac yom bʌ mi' melob jin tacʌch iliyi: I pislel i tajn, yic'ot i bujc i c'aba' efod yic'ot pʌl bʌ i bujc, yic'ot i cha'lajmlel i bujc, yic'ot i pislel i jol, yic'ot i cajchil. Mi caj i melbeñob a wʌscun Aarón yic'ot i yalobilob i pislelob yom bʌ mi' xojob che' mi' melbeñoñob que'tel ti motomaj.
5Yom mi' c'ʌñob yʌjyʌx bʌ pisil yic'ot chʌccojan bʌ yic'ot chʌchʌc bʌ, yic'ot wen jalbil bʌ lino cha'an ti' melol jini bujcʌl tac i c'aba' efod. 6Yom mi' mejlel i mʌjquil i tajn ti yʌjyʌx bʌ pisil, yic'ot chʌccojan bʌ, yic'ot chʌchʌc tac bʌ, yic'ot wen jalbil bʌ lino, wen uts'at bʌ melbil. 7Yom cha't'ujm i cʌjchil cha'an mi' laj bʌ cʌch ti' pat. 8Jini i cajchil melbil yom ti oro yic'ot ti yʌjyʌx bʌ pisil, ti chʌccojan bʌ, ti chʌchʌc bʌ yic'ot ti wen jalbil bʌ lino. 9Ch'ʌmʌ cha'p'ejl xajlel i c'aba' ónice. Ya'i yom ma' ts'ijban i c'aba'ob jini lajchʌnmojt i p'olbal jini Israel. 10Yom ma' ts'ijban wʌcp'ejl c'aba'ʌl ti jini junq'uejl xajlel, yic'ot yambʌ wʌcp'ejl c'aba'ʌl ya' ti yambʌ junq'uejl xajlel, junlajal yom. Jini ñaxan bʌ tsi' yila pañimil, jiñʌch ma' ñaxan otsan c'ʌlʌl ma' taj majlel jini wi'ilix bʌ tsi' yilayob pañimil cha'an belecña mi' yujtel a wotsan ya' ti cha'q'uejl xajlel jini c'aba'ʌl tac. 11Yom ts'ijbubil jini c'aba'ʌl tac, pero lajal yom che' bajche' an ti sello. Che' yom ma' ts'ijban jini c'aba'ʌl tac ya' ti' cha'q'uejlel xajlel, jiñʌch i c'aba'ob i p'olbal Israel. Ya' ti oro yom ma' lʌp ochel jini xajlel tac. 12Yom ma' wʌc' jini xajlel ti jujunwejl i quejlab. Cʌchbil yom ya' ti' cujchil tac ya' ti' bujc. Cha'añʌch mi' chʌn ña'tʌntel jini israelob. Aarón yom mi' ch'ʌm majlel jini c'aba'ʌl tac ti' quejlab ya' tic tojlel. La' Yumon. 13Yom mi la' mel cha'p'ejl i joc'lib ti oro yic'ot cha't'um cadena ti puro oro, 14yic'ot xotol tac bʌ cʌchbil bʌ ya' ti' joc'lib tac.
15Che' ja'el yom mi la' mel jump'ejl i pislel i tajn. Cha'añʌch mi' ña'tañob jini israelob che' mi' q'uelob cha'an Dios mi' c'ʌn jini motomajob cha'an mi' pʌs chuqui uts'at mi' q'uel Dios. Yom mi' c'ʌjñel puy melbil bʌ ti oro, yic'ot chʌccojan bʌ, yic'ot chʌchʌc bʌ, yic'ot wen jalbil bʌ lino che' bajche' tsa' c'ʌjni ti efod. 16Junlajal yom i colemlel, i pislel i tajn, jujuñajb ti' joytʌlel. 17Yom mi la' wʌq'uen chʌntsolom xajlel tac. Ti jini ñaxan bʌ tsolom yom an sárdica yic'ot topacio yic'ot carbunclo. 18Ya' ti' cha'tsolomlel yom an esmeralda yic'ot zafiro yic'ot diamante. 19Ya' ti' yuxtsolomlel yom an jacinto yic'ot ágata yic'ot amatista. 20Ya' ti' chʌntsolomlel, yom an berilo yic'ot ónice yic'ot jaspe. Ñotbil tac yom ti oro. 21Jini xajlel tac jiñʌch i wentajlel jini lajchʌntiquil i yalobilob Israel. Yom ts'ijbubil i c'aba'ob mi' cʌytʌl ya' ti xajlel tac che' lajal bajche' sello tac.
22Yom cha't'ujm jaxbil bʌ oro cha'an i ch'ajñal. 23Yom mi la' mel ja'el cha'xojt xotol tac bʌ tsucu taq'uin cha'an ma' wʌc' ti jujunwejl i tajn jini bujcʌl. 24Yom ma' wʌc' cha't'ujm jini jaxbil bʌ oro ti jini cha'xojt xotol bʌ am ti jujunwejl i tajn jini bujcʌl. 25I ni' tac jini cha't'ujm jaxbil bʌ oro mu' bʌ i yʌjq'uel ya' ti xotol tac bʌ am bʌ ti jujunwejl i tajn, yom ma' licchocoben ya' ti' cha'wejlel i quejlab jini bujcʌl ya' ti' tojel i wut. Ochem tac yom i ni' jini jaxbil bʌ ya' ti ónice. 26Yom mi la' mel yambʌ cha'xojt tsucu taq'uin melbil bʌ ti oro cha'an ma' wʌc' ti jujunwejl i bolsajlel jini bujcʌl ya' ti' tojlel jini bujcʌl che' ti' mal. 27Che' ja'el yom mi la' mel cha'xojt tsucu taq'uin melbil bʌ ti oro cha'an ma' wʌc' ya' ti tirante tac am bʌ ti' quejlab jini bujcʌl c'ʌlʌl ba' chucbil jini wen jalbil bʌ i cajchiñʌc'. 28Cha'an mi' laj bʌ cʌchob i bʌ i yebal i pislel tajñʌl yic'ot jini xotol tac bʌ am bʌ ti yebal jini bujcʌl, i c'aba' efod yom ma' c'ʌn jaxbil bʌ puy yʌjyʌx bʌ cha'an ma' cʌch, cha'an ma'anic mi' jit i bʌ jini bujcʌl.
29Ya'i mi caj i ch'ʌm majlel Aarón i c'aba'ob i yalobilob Israel ya' ti bujcʌl ti' tojel i pusic'al, che' bajche' jajayajl mi' yochel ya' tic tojlel ba' mi' ch'ujutesañon. Jiñʌch cha'an mi' chʌn ña'tʌntel i p'olbal Israel. 30Yom ma' wotsan ya' ti' tajn jini bujcʌl cha'p'ejl xajlel i c'aba' Urim yic'ot Tumim, am bʌ i c'ʌjnibal cha'an mi la' cʌntesʌntel. Mi caj i yajñel ti' tojlel i pusic'al jini Aarón che' mi' yochel ya' ti cotot. Ya'i mi' ch'ʌm majlel Aarón i c'aba'ob i yalobilob Israel che' bajche' jajayajl mi' yochel.
31-32Yʌjyʌx yom pejtelel jini pʌl bʌ i bujc. Ya' ti' yojlil c'ʌlʌl ti chan, yom mero ñuc i ti', yic'ot joch'bil yom che' bajche' mi' joch'ob i bic' bujcʌl tac, cha'an ma'anic mi' tsijlel. 33Ya' ti yebal, ti' joytʌlel i ti' jini tam bʌ i bujc, yom ma' wʌq'uen i ch'ʌjlil tac bʌ bajche' ch'umac', yʌjjʌx tac, chʌchʌc tac yic'ot chʌccojan tac bʌ yic'ot alʌ campana tac melbil bʌ ti oro. 34Yom jump'ejl alʌ campana melbil bʌ ti oro yic'ot jump'ejl ch'umac'. Xajbuctic yom ma' wʌc' ti' joytʌlel i ti'. 35Aarón yom mi' lʌp iliyi che' mi' mel i ye'tel cha'an che' mi' ñijcan i bʌ jini alʌ campana, mi' yubintel che' mi' yochel ya' ti Ch'ujul bʌ Ajñibʌl ba' añon yic'ot che' mi' loq'uel. Che' jini ma'anic mi caj i chʌmel.
36Yom mi la' mel junq'uejl alʌ tsucu taq'uin melbil bʌ ti oro cha'an ma' ts'ijban ya'i: “Ch'ujul cha'an lac Yum”, che'en. 37-38Yʌjyʌx i ch'ajñal yom cha'an ma' cʌchben ya' ti' tojel i pam jini Aarón ya' ti' yalʌ pixol. Che' jini mi caj i yajñel ti' pam jini Aarón cha'an mi' yajñel ti' wenta jini Aarón i mul israelob che' mi' yʌq'ueñoñob ch'ujul bʌ c majtan tac. Yom mi' yajñel ti' pam Aarón ti pejtelel ora cha'an che' mi' yochel ba' añon, mi caj c ñusʌbeñob i mul.
39Jalbil yom jini bujcʌl ti fino bʌ lino. Mele alʌ pixolʌl ti fino bʌ lino ja'el. Che' ja'el i cajchiñʌc' wen joch'bil yom.
40Che' ja'el i yalobilob Aarón, yom mi la' melbeñob tam bʌ i bujc yic'ot i cajchiñʌc' yic'ot i yalʌ pixolob ja'el cha'an i t'ojlʌwib. 41Che'ʌch yom jini mu' bʌ a wʌq'ueñob i lʌp a wʌscun Aarón yic'ot i yalobilob. Che' jini yom ma' boñob, ma' sʌq'uesañob, cha'an ma' wa'chocoñob cha'an mi' melbeñoñob que'tel ti motomaj. 42Yom ma' melbeñob i borwex ti fino bʌ pisil. Yom i ch'ajñal ti' ñʌc' mero ts'ita' tam cha'an ya' jaxʌl mi' c'otel ti' chañelal i pix. Yom jalbil ja'el, jiñʌch cha'an mi' lʌpob ya' ti' mal pʌl bʌ i bujc jini motomaj. 43Aarón yic'ot i yalobilob mi caj i lʌpob che' mi' yochelob ya' ti Tabernáculo yic'ot che' mi' wa'tʌlob ti' tojlel jini pulʌntib, che' mi' cha'leñob que'tel ya' ti Ch'ujul bʌ Ajñibʌl. Che' jini ma'anic mi caj i tajob i mul cha'an ma'anic mi caj i chʌmelob. Che'ʌch yom mi' chʌn melob ti pejtelel ora c'ʌlʌl ti' yorajlel i p'olbalob.
Currently Selected:
EXODO 28: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.