DEUTERONOMIO 30
30
Jini yomo' bʌ i taj bendición
1Che' bʌ tsa'ix ujti pejtelel iliyi ti a tojlel, pejtelel jini bendición yic'ot wocol tsa' bʌ c subeyet, mi tsa' cha' c'ajtesa ya' ba' pam pujquemet ti yan tac bʌ tejclum baqui tsi' chocoyet majlel lac Yum Dios, mi a womix a cʌy a mul, 2mi a wom a cha' sutq'uin a bʌ ba'an lac Yum Dios ti pejtelel a pusic'al cha'an ma' jac' pejtelel ili mandar woli bʌ c subeñetla, jatet yic'ot a walobilob ti pejtelel a pusic'al yic'ot pejtelel a ña'tʌbal, 3che' jini lac Yum mi caj i cha' coltañet. Mux i cha' aq'ueñet pejtelel chuqui tsa' sajti a cha'an. Mi caj i cha' p'untañet. Mi caj i cha' pʌyet loq'uel ba' pam pujq'uemetla ti yan tac bʌ tejclum ya' ba' tsi' cʌn chocoyet majlel lac Yum Dios. 4Anquese pujquemetla ti ñajt tac bʌ pañimil, lac Yum Dios mi caj i cha' pʌyetla loq'uel ya' baqui añetla. 5Lac Yum Dios mi caj i cha' pʌyetla tilel ti jini lum aq'uebilo' bʌ la' ñojte'elob. La' cha'anix wʌle. Mi caj i cha' aq'ueñetla la' wenlel. Ñumen mi caj i p'ojlesañetla che' bajche' la' ñojte'elob. 6Lac Yum Dios mi caj i sʌq'uesan a pusic'al yic'ot i pusic'al a walobilob i wentajʌch tsep pʌchʌlel, che' ma' c'uxbin lac Yum Dios ti pejtelel a pusic'al, yic'ot ti pejtelel a ña'tʌbal, cha'an ma' taj a cuxtilel. 7Che' jini lac Yum Dios mi caj i yʌq'ueñob pejtel ili wocol la' contrajob, tsa' bʌ i ts'a'leyetob, tsa' bʌ i yajñesayetob. 8Mi caj a sutq'uin a bʌ cha'an ma' cha' mel pejtelel i mandar lac Yum mu' bʌ c subeñetla wʌle. 9Che' jini lac Yum Dios mi caj i coltañetla ti pejtelel chuqui tac mi la' mel. Mi caj i p'ojlesan a walobilob. Mi' caj ti p'ojlel a wʌlac', yic'ot a c'ajbal. Lac Yum mi caj i cha' ubin i tijicñʌyel i pusic'al che' mi' coltañet che' bajche' tsi' yubi i tijicñʌyel i pusic'al ti' tojlel a ñojte'elob. 10Yom jach ma' jac'ben i mandar ts'ijbubil bʌ ti' juñilel, Yom ma' cha' sutq'uin a bʌ ba'an lac Yum Dios ti pejtelel a pusic'al yic'ot ti pejtelel a ña'tʌbal.
11Come ili mandar woli bʌ c subeñet wʌle mach wocolic ti jac'ol. Mach ñajtic an. 12Ma'anic ti panchan. Mach yomic ma' wʌl: “¿Majqui mi' mejlel ti letsel ti panchan cha'an mi' cha' ch'ʌmbeñonla tilel cha'an mi la cubin, cha'an mi lac jac'?” mach che'iquet. 13Mach ya'ic an jini t'an ti' junwejlel ñajb. Mach yomic ma' wʌl: “¿Majqui mi' mejlel ti c'axel ti colem ñajb cha'an mi' ch'ʌmbeñonla tilel, cha'an mi la cubin, cha'an mi lac jac'?” mach che'iquet. 14Come c'ax lʌc'ʌl jax an ti a tojlel jini t'an. An ti a wej yic'ot ti a pusic'al. Yom jach ma' jac'.
15Jini cha'an wʌle tsa'ix c pʌsbeyet i bijlel a cuxtʌlel ba'an bendición, yic'ot i bijlel chʌmel ba'an wocol. 16Wolic xic'beñet wʌle cha'an ma' c'uxbin lac Yum Dios, cha'an ma' cha'len xʌmbal ti' bijlel, cha'an ma' jac'ben pejtelel i mandar, yic'ot i cʌntesʌbal. Yom ma' wubin a tic'ol cha'an ma' chʌn taj a cuxtilel jatet yic'ot a p'olbal. Che' jini lac Yum Dios mi caj i yʌq'ueñet a wenlel ya' ti jini lum baqui ma' majlel ti chumtʌl. 17Pero mi tsa' sojqui a pusic'al, mi tsa' cʌyʌ a ñich'tʌben i t'an lac Yum, mi tsa' sʌtʌ a bʌ, mi tsa' ñocchoco a bʌ ti' tojlel jini dios tac cha'an ma' ch'ujutesan, 18mic subeñetla wersa mi caj la' chʌmel. Mach cabʌlic ora ya' añetla ti la' lum ti junwejl Jordán ja' baqui mi la' majlel ti chumtʌl. 19Jini cha'an mic wa'chocon jini año' bʌ ti panchan yic'ot ti pañimil che' bajche' testigojob ti la' tojlel, cha'an tsa'ix c pʌsbeyetla i bijlel la' cuxtʌlel ba'an bendición, yic'ot i bijlel chʌmel ba'an wocol. Jini cha'an yajcan a cuxtʌlel cha'an chʌn cuxulet, yic'ot a walobilob. 20C'uxbin lac Yum Dios. Chʌn nich'tʌben i t'an, chʌn tsajcan. Come jiñʌch a cuxtʌlel yic'ot i ñajtesʌntel a jabilel. Che' jini xuc'ul mi caj a chumtʌl ya' ti lum mu' bʌ i yʌq'ueñet lac Yum che' bajche' tsi' sube a ñojte'elob, Abraham, yic'ot Isaac, yic'ot Jacob, che'en Moisés.
Currently Selected:
DEUTERONOMIO 30: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.