DEUTERONOMIO 19
19
Jini tejclum tac ba' mi' tajob i coltʌntel
(Nm. 35.9-28; Jos. 20.1-9)
1Lac Yum Dios mi caj i laj jisan jini xchumtʌlob ya' ba' mi la' majlel ti chumtʌl cha'an mi la' wochel ti' yototob yic'ot i lum. 2-3Che' ya'ix añetla, che' la' cha'anix jini lum, yom mi la' yajcan uxp'ejl tejclum ya' ti' yojlil jini lum woli bʌ i yʌq'ueñetla lac Yum Dios. Yom mi la' wen p'is jini lum. Yom mi la' t'ox ti uxmojt jini lum woli bʌ i yʌq'ueñetla lac Yum cha'an mi' puts'el majlel ti jini tejclum majqui jach tsi' cha'le tsʌnsa. 4Che' jini cuxul mi' chʌn ajñel jini stsʌnsa mu' bʌ i puts'el ya'i. Ma'anic mi caj i tsʌnsʌntel mi tsi' tsʌnsa i pi'ʌl che' mach tsajalic i cha'an, che' mach ts'a'lebilic i cha'an ti yambʌ ora. 5Mi tsa' majli yic'ot i pi'ʌl ti xot' si', mi tsa' loq'ui jini jacha ya' ti' te'el che' bʌ tsi' q'ueche i c'ʌb cha'an mi' xot' si', mi tsa' c'oti ya' ti' tojlel i pi'ʌl, mi tsa' chʌmi, che' jini muq'uix i majlel ti puts'el jini winic ya' ti jini tejclum am bʌ ti lʌc'ʌl baqui mi caj i coltʌntel. 6-7Majqui jach mi' tilel i q'uextʌben i mul jini winic mach mejlic. Yom lʌc'ʌl jini tejclum ame tajlec ti bij jini stsʌnsa che' woli ti puts'el. Mi tsi' taja che' mich' cha'an tsa' chʌmi i pi'ʌl, mi caj i tsʌnsan. Mach i t'ojolic che' jini, come ma'anic i mul jini woli bʌ ti puts'el, come mach i contrajic i pi'ʌl. Jini cha'an mic wersa subeñetla, yom mi la' yajcan uxp'ejl tejclum ti' yojlil jini lum tac che' t'oxbil ti uxmojt jini lum. 8-10Che' cabʌlix la' lum tsa' bʌ i yʌq'ueyetla lac Yum Dios che' bajche' tsi' wʌn subeyob la' ñojte'elob, che' la' cha'anix pejtelel jini tejclum tac che' bajche' tsi' subeyob, che' jini yom mi la' wa'chocon yambʌ uxp'ejl tejclum. Lac Yum Dios mi caj i ñumen aq'ueñetla i ñuquijib la' lum mi ts'ʌcʌl mi la' jac' pejtelel i mandar woli bʌ c subeñetla wʌle. Yom mi la' c'uxbin lac Yum Dios cha'an mi la' chʌn cha'len xʌmbal ti' bijlel ti pejtelel q'uin. Che' jini ma'anic mi' caj i bejq'uel i ch'ich'el winic mach bʌ anic i mul ti jini lum woli bʌ i yʌq'ueñetla lac Yum Dios. Che' jini ma'anic la' mul cha'an mi la' chojquel ti Dios.
11Pero mi an juntiquil mu' bʌ i ts'a'len i pi'ʌl, mi woli' chijtan, mi tsi' jats'ʌ cha'an mi' tsʌnsan, mi tsa' chʌmi, lolom jach mi' majlel ti puts'el ya' ti jini tejclum baqui yom coltʌntel. 12Jini xñoxob ya' ti tejclum wersa mi caj i yʌc'ob ti' wenta i yeran jini tsa' bʌ tsʌnsʌnti cha'an mi' wersa chʌmel. 13Mach yomic mi la' p'untan. Cojach yom mi la' choc loq'uel jini am bʌ i mul cha'an mi' chʌmel cha'an mi' q'ueletla ti uts'at lac Yum.
14Ya' ti lum baqui mi la' majlel ti chumtʌl, jini lum woli bʌ i yʌq'ueñetla lac Yum Dios, mach mi la' xoy ochel jini cayajón ba'an i lum yambʌ la' pi'ʌlob ya' ba' tsi' ñaxan p'isiyob jini xñoxob.
Mandar cha'an testigojob
15Mach yomic mi la' ñopben i t'an juntiquil winic mu' bʌ i jop'ben i mul yambʌ. Cojach yom mi la' ñopben i t'an che' an cha'tiquil uxtiquil tsa' bʌ i q'ueleyob jini mulil. 16Mi an juntiquil mu' bʌ i cha'len jop't'an ti' contra i pi'ʌl cha'an woli' mich'len, 17che' jini yom mi' pʌjyelob jini cha'tiquilob ba' añob motomajob yic'ot juezob woli bʌ i melbeñob i ye'tel lac Yum. 18Jini juezob muq'uix i wen ubiñob. Mi tsi' wen ch'ʌmbeyob isujm woli jach i jop'ben i mul i pi'ʌl cha'an mich', 19yom lajal mi la' melben che' bajche' tsi' ña'ta i melben i pi'ʌl. Che' jini mi caj i lajmel jontolil ti la' tojlel. 20Pejtelel mu' bʌ i yubiñob mi' cajelob ti bʌq'uen. Ma'anix majqui mi caj i chʌn mel lajal bajche' jini ti la' tojlel. 21Mach yomic mi la' p'untan jini yujil bʌ jop' mulil. Che' bajche' tsi' lon ña'ta i tic'lan i pi'ʌl che'ʌch yom mi' melbentel. Tsʌnsan jini mu' bʌ i cha'len tsʌnsa. Wutʌl i q'uexol wutʌl. Ejʌl i q'uexol ejʌl. C'ʌbʌl i q'uexol c'ʌbʌl. Ocʌl i q'uexol ocʌl. Che'ʌch mi caj i q'uextʌbentel i mul.
Currently Selected:
DEUTERONOMIO 19: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.