DEUTERONOMIO 18
18
Jini i chubʌ'an levíjob
1Jini motomajob yic'ot levíjob i p'olbalo' bʌ Leví, ma'añobic i chubʌ'an che' bajche' israelob. Mi caj i c'uxob we'elʌl mu' bʌ i yʌq'uentel lac Yum ti' majtan cha'an israelob. 2Pero ti' tojlel i pi'ʌlob ma'añobic i chubʌ'an. Lac Yum i cha'anʌch Leví che' bajche' tsi' wʌn subeyob. 3Jiñʌch yom bʌ mi' yʌq'uentelob motomajob cha'an israelob che' mi' pʌyob tilel i yʌlac' mi wacax mi tiñʌme' cha'an mi' yʌq'ueñob lac Yum. Yom mi' yʌq'uentelob i quejlab yic'ot i xʌc'ti' yic'ot i chuyib. 4Pejtelel jini ñaxan tac bʌ i wut la' pʌc'ʌb, yic'ot i ya'lel la' ts'usub, yic'ot la' waceite, yic'ot jini ñaxan tac bʌ i tsutsel la' tiñʌme', yom mi la' wʌq'uen motomajob. 5Come lac yum Dios tsi' yajcayob loq'uel ti' la' tojlel yic'ot i yalobilob cha'an mi' chʌn q'uelben i ye'tel lac Yum. Jiñʌch i ye'tel yic'ot i ye'tel i yalobilob ti pejtelel ora. 6-7Che' mi' loq'uel leví ti jump'ejl tejclum ti Israel cha'an mi' majlel ti e'tel ya' ti ajñibʌl yajcʌbil bʌ i cha'an lac Yum, mi caj i cha'len i ye'tel ti jump'ejl jach i pusic'al ti' c'aba' lac Yum Dios che' bajche' pejtel i pi'ʌlob levíjob ya' bʌ añob ti Ch'ujul bʌ Ajñibʌl. 8Mi wen chumul jini winic o mi mach wen chumulic, lajal mi caj i taj i bʌl i ñʌc' yic'ot jini levíjob.
Mach yomic mi' jac'ob costumbre ti pañimil
9Che' ya' añetla ti lum woli bʌ i yʌq'ueñetla lac Yum Dios, mach yomic mi la' ñop la' mel jontolil che' bajche' yan tac bʌ tejclum. 10Mach yomic mi' yajñel ti la' tojlel mi juntiquilic mu' bʌ i pul ti c'ajc ch'iton mi xch'oc bʌ i yalobil. Mach yomic mi xtic'laya mi xwujt mi jini mu' bʌ i wʌn ña'tan chuqui mi caj i yujtel, mi jini mu' bʌ i yʌc' i bʌ ti' wenta ec', 11mi xpejca cruz mi jini mu' bʌ i yʌc' i bʌ ti' wenta xiba cha'an mi' sub i t'an yic'ot cha'an mi' mel ñuc tac bʌ i ye'tel, mi jini yujil bʌ i pejcʌntel ch'ujlelʌl. 12Come ts'a'lebil ti lac Yum pejtel mu' bʌ i melob che' bajche' jini. Che'ʌch mi' melob pejtel xchumtʌlob ya' ba' mi la' majlel ti chumtʌl. Jini cha'an lac Yum woli' chocob loq'uel ti la' tojlel. 13Yom ch'ujul mi la' wajñel ti' tojlel lac Yum Dios ti pejtelel ora. 14Come ili tejclum tac ya' ba' mi la' majlel ti chumtʌl mi' jac'beñob i t'an xlot año' bʌ ti' wenta xiba, pero mach che'ic mi caj la' mel come tic'bil i cha'an lac Yum.
Tal yambʌ X'alt'an che' bajche' Moisés
15Lac Yum Dios muq'uix i wa'chocon juntiquil X'alt'an loq'uem bʌ ti la' tojlel che' bajche' joñon. Mero la' pi'ʌl. Yom mi la' jac'ben i t'an. 16Come tsa' la' sube Dios ya' ti Horeb ti jini q'uin che' bʌ tsa' la' tempa la' bʌ: “Mach comix c chʌn ubiben lojon i t'an lac Yum Dios. Mach comix c chʌn q'uel lojon jini c'ajc, ame chʌmicon lojon”, che'etla. 17Lac Yum tsi' subeyon: “Uts'at bajche' tsi' cha'leyob t'an. 18Muq'uix caj c wa'chobeñob X'alt'an loq'uem bʌ ti' pi'ʌlob, lajal bajche' jatet. Muq'uix caj cʌq'uen i sub t'an. Mi caj i cha' sub pejtel chuqui mic suben. 19Majqui jach mi' ts'a'liben i t'an jini X'alt'an mu' bʌ i melbeñon que'tel, mi caj i wersa mel i bʌ tic tojlel. 20Pero mi an x'alt'an mu' bʌ i bajñel ña'tan chuqui mi' sub che' ma'anic tsac pejca, mi tsa' caji i yʌl yan tac bʌ t'an tilem bʌ ti dioste', wersa mi' chʌmel jini x'alt'an”. Che' tsi' subeyon lac Yum. 21Mi tsa' la' wʌlʌ ti la' pusic'al: “¿Bajche' mi mejlel laj cʌn i t'an lac Yum?” mi che'etla, 22che'ʌch mi caj la' cʌn. Mi tsi' cha'le t'an x'alt'an ti' c'aba' lac Yum, mi ma'anic tsa' ts'ʌctiyi chuqui tsi' yʌlʌ, mi mach che'ic tsa' ujti, mach tilemic i t'an ti lac Yum. Tsa' jach i bajñel ña'ta bajche' yom alol jini x'alt'an. Mach mi la' bʌc'ñan.
Currently Selected:
DEUTERONOMIO 18: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.