DEUTERONOMIO 20
20
T'an tac cha'an guerra
1Che' mi la' loq'uel ti guerra, che' talob ti la' contra winicob yic'ot caballo yic'ot carreta tac ñumen bʌ ti tsic che' bajche' jatetla, mach mi la' bʌc'ñañob, come lac Yum Dios tsa' bʌ i loc'sayetla ti Egipto woli' coltañetla. 2Che' i yorajlelix mi la' cha'len guerra, jini motomaj muq'uix i ñaxan wa'tʌl ti' tojlel soldadojob cha'an mi' subeñob: 3“Ubinla israelob: Tempʌbiletla wʌle cha'an mi la' cha'len guerra. Mach yomic mi' c'uñ'an la' pusic'al cha'an mi la' bʌc'ñanob. 4Come lac Yum Dios mi' majlel la' wic'ot ti guerra ti' contra la' contrajob cha'an mi' coltañetla”, che'en. 5Jini año' bʌ i ye'tel mi caj i subeñob jini soldadojob: “Mi an juntiquil winic tsa' bʌ i mele tsiji' bʌ i yotot maxto bʌ anic tsi' c'ʌñʌ, la' sujtic ti' yotot, ame chʌmic ya' ti guerra, ame ochic yambʌ i yum. 6Mi an juntiquil winic tsa' bʌ i pʌc'ʌ i ts'usubil maxto bʌ anic tsi' mʌc'be i wut, la' sujtic ti' yotot ame chʌmic ya' ti guerra, ame i mʌc'ben i wut yambʌ i yum. 7Mi an winic tsa' bʌ i c'ajti i yijñam, pero maxto anic tsi' cha'le ñujpuñel, la' sujtic ti yotot ame talic yambʌ winic i pʌy jini xch'oc tsa' bʌ i c'ajti. 8Mi an juntiquil winic yujil bʌ bʌq'uen ti' pusic'al, la' cha' sujtic ti' yotot cha'an ma'anic mi' bʌc'tesan jini yaño' bʌ i pi'ʌlob”. Che'ʌch yom mi' yʌlob jini año' bʌ i ye'tel. 9Che' ujtemix ti t'an jini año' bʌ i ye'tel, mi caj i wa'chocoñob i yaj capitañob jini soldadojob.
10Che' mi la' ñochtan jump'ejl tejclum cha'an mi la' cha'len guerra, ñaxan yom mi la' subeñob bajche' yom mi' melob cha'an ñʌch'ʌl mi' yajñelob ti la' tojlel. 11Mi tsi' jac'ʌyob, mi tsi' subeyetla ochel ti tejclum, che' jini mi caj la' ch'ʌm ti la' wenta pejtel jini xchumtʌlob. 12Pero mi mach yomobic i jac'ob, mi wersa yomob guerra ti la' contra, che' jini yom mi la' joy mʌctañob.
13Lac Yum Dios mi caj i yʌc'ob ti la' wenta. Che' jini mi caj la' tsʌnsan pejtel jini winicob ti espada. 14Pero mi caj la' pʌy jini x'ixicob, yic'ot alp'eñelob, yic'ot i yʌlac'. La' cha'añʌch pejtel chuqui tac an ti tejclum. Yom mi la' laj ch'ʌm jini tsa' bʌ cʌle i cha'an la' contrajob, come tsi' yʌq'ueyetla lac Yum. 15Che'ʌch yom mi la' melbeñob jini tejclumob año' bʌ ti ñajtʌl. Mach che'ic yom mi la' melben jini tejclum tac ya' ti la' lumal yic'ot ti la' joytʌlel.
16Mach yomic mi la' p'untan mi juntiquilic la' contra ya' ba' mi la' majlel ti chumtʌl ti jini lum woli bʌ i yʌq'ueñet lac Yum. 17Pero ts'ʌcʌl yom mi la' laj jisañob: jini heteojob, yic'ot jini amorreojob, yic'ot jini cananeojob, yic'ot jini ferezeojob, yic'ot jini heveojob, yic'ot jini jebuseojob. Jiñʌch i mandar lac Yum Dios. 18Yom mi la' laj jisañob ame sojquiquetla ti yambʌ cʌntesa ts'a'lebil bʌ ti Dios, ame la' lon ñopben i melbal tac, come leco bajche' mi' melob ti' tojlel i dioste' tac. Jiñʌch ñuc bʌ mulil ti' wut lac Yum Dios.
19Che' mi la' joy mʌctan jump'ejl tejclum, che' cabʌlix ora woliyetla ti guerra cha'an mi la' ch'ʌm, mach yomic mi la' sec' jini te' tac mu' bʌ i yʌc' i wut, come yom mi la' mʌc'ben i wut. Mach yomic mi la' bic'ti tsep, come jini te' mach lajalic bajche' la' contrajob yom bʌ mi la' tsʌnsan. 20A cʌñʌyʌch jini te' ti chajp ti chajp. Cojach jini te' mach bʌ yujilic ac'ol i wut mi mejlel la' sec'. Mi mejlel la' c'ʌn ti melol jini chan tac bʌ t'uchlibʌl cha'an mi la' letsel ti' ts'ajquil tejclum cha'an mi la' mʌl.
Currently Selected:
DEUTERONOMIO 20: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.