2 SAMUEL 6
6
David tsi' lon ñopo i ch'ʌm majlel jini Arca ya' ti Jerusalén
(1 Cr. 13.5-14)
1David tsi' cha' much'qui pejtel jini yajcʌbilo' bʌ ti' tojlel israelob, lujuntiquil i cha'c'al mil (30,000) winicob. 2Tsi' teche xʌmbal yic'ot pejtelel jini yajcʌbilo' bʌ winicob ti Israel. Tsa' majliyob ti Baala ti Judá cha'an mi' ch'ʌmob tilel jini Arca i cha'an lac Yum. Jiñʌch Arca ba' mi' tsictiyel i c'aba' lac Yum, i Yum Panchan yic'ot Pañimil, buchul bʌ ti' yumʌntel ti' tojlel jini querubiñob. 3Tsi' c'ʌcchocoyob jini Arca ti' pam jump'ejl tsiji' bʌ carreta. Tsi' ch'ʌmʌyob loq'uel ti' yotot Abinadab, ya' ti bujtʌl. Uza yic'ot Ahío i yalobilob Abinadab woli' toj'esañob majlel jini carreta ba' c'ʌcʌl jini Arca i cha'an Dios. 4Che' bʌ tsi' cʌyʌyob i yotot Abinadab am bʌ ti bujtʌl, Ahío tsa' majli ti ñaxan ti' tojel jini Arca. 5David yic'ot pejtelel israelob woliyob ti son ti' tojlel lac Yum cha'an mi' ch'ujutesañob yic'ot c'ay, yic'ot arpa, yic'ot salterio, yic'ot pandero, yic'ot flauta, yic'ot címbalo.
6Pero che' bʌ tsa' c'otiyob ba' mi' jats'ob trigo ti' lum Nacón, jini wacax tsi' p'ojqui i yoc. Colel i yajlel. Jini cha'an Uza tsi' sʌts'ʌ i c'ʌb ya' ba'an i yArca lac Yum. Tsʌts tsi' chucu. 7Che' jini tsa' bʌc' c'oti i mich'lel lac Yum ti' tojlel Uza. Ti ora jach tsa' chʌmi ya' ti' t'ejl jini Arca. 8Che' jini tsa' mich'a David che' bʌ tsi' tsʌnsa Uza lac Yum. Jini cha'an tsa' otsʌbenti i c'aba' jini ajñibʌl Pérezuza. Che'ʌch i c'aba' c'ʌlʌl wʌle. 9Ti jim bʌ q'uin David tsa' caji i wen bʌc'ñan lac Yum. Tsi' yʌlʌ: ¿Bajche' mi mejlel i tilel tic tojlel jini Arca i cha'an lac Yum? che'en. 10Mach chʌn yomix i ch'ʌm tilel jini Arca ya' ti Jerusalén. Jini cha'an tsi' xoyoyob i bijlel. Tsa' majliyob ti' yotot Obed Edom jini geteo. 11Ya' tsa' cʌle jini Arca i cha'an lac Yum ti' yotot Obed Edom jini geteo uxp'ejl uw. Lac Yum tsi' wen colta Obed Edom yic'ot pejtelel año' bʌ ti' yotot.
David tsi' ch'ʌmʌ majlel jini Arca ti Jerusalén
(1 Cr. 15.1—16.6)
12An majqui tsi' sube David: Lac Yum woli' wen coltan jini año' bʌ ti' yotot Obed Edom yic'ot pejtelel chuqui tac an i cha'an, cha'an ti' caj jini Arca i cha'an Dios, che'en. Jini cha'an tsa' majli David ti' tijicñʌyel i pusic'al cha'an mi' loc'san ti' yotot Obed Edom, cha'an mi' cha' ch'ʌm tilel ti Jerusalén. 13Che' an jax to wʌcxajc tsi' yʌc'ʌyob i yoc jini woli bʌ i q'uechob majlel jini Arca, tsa' wa'leyob ti bij. David tsa' caj i tsʌnsʌben i majtan lac Yum, juncojt tat wacax yic'ot tat tiñʌme'. 14David tsi' chʌn cha'le tijp'ejl ti' tijicñʌyel i pusic'al ti' tojlel lac Yum, lʌpbil i cha'an jump'ejl bujcʌl lino bʌ pisil. 15Tijicñayob i pusic'al tsi' cha' ch'ʌmʌyob sujtel jini Arca i cha'an lac Yum. Tsi' wusuyob majlel trompeta tac, tsi' cha'leyob c'ay.
16Che' bʌ woli' c'otel ti Jerusalén jini Arca i cha'an lac Yum, ya' wa'al Mical i yixic'al Saúl ti ventana. Tsi' q'uele che' woli ti ñuqui tijp'el David ti' tojlel lac Yum. Mical i yijñam David tsi' mucu ts'a'le i ñoxi'al ti' pusic'al. 17Che' jini tsi' yotsayob jini Arca i cha'an lac Yum ya' ti' yojlil i mal Tabernáculo. David tsi' wa'choco. Tsi' pulbe tsʌnsʌbil bʌ i majtan lac Yum. 18Che' bʌ ujtemix i yʌq'uen pulbil bʌ i majtan lac Yum, David tsi' yʌq'ue i yutslel i t'an pejtelel winicob ti' c'aba' lac Yum. 19Tsa' caji i pucbeñob waj yic'ot we'elʌl, yic'ot tiquin bʌ ts'usub jini israelob. Che' ujtemix ti pejtelel, jini winicob x'ixicob tsa' sujtiyob majlel ti' yotot ti jujuntiquilob.
20Tsa' sujti majlel David ti' yotot cha'an mi' yʌc' i yutslel i t'an. Pero Mical tsa' tili i taj David. Tsi' yʌlʌ: ¿I t'ojol ba chuqui tsa' mele sajmʌl? ¿Che' ba yom mi' mel i rey israelob? Che' bʌ tsa' jocho a pislel ti' wut jini xch'ocob, tsa' pʌsʌ a bʌ bajche' tonto bʌ winic, che'en. 21David tsi' jac'be Mical: Che'ʌch tsac cha'le ti' tojlel lac Yum tsa' bʌ i yajcayon che' cuxul to a tat yic'ot pejtelel i pi'ʌlob. Tsi' yʌq'ueyon c yumʌntel ti' tojlel Israel i tejclum lac Yum. Jini cha'an yom tijicña mic pʌs c bʌ ti' tojlel lac Yum. 22Tijicñayon che' mi cʌc' ti ñuc lac Yum anquese ts'a'lebilon. Mach ñuquic mij q'uel c bʌ, pero jini xch'ocob woli bʌ a taj ti a t'an mi caj i q'ueloñob ti ñuc, che'en. 23Mical i yixic'al Saúl ma'anic i yalobil. Jochol tsa' cʌle c'ʌlʌl tsa' chʌmi.
Currently Selected:
2 SAMUEL 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.