2 SAMUEL 7
7
Jini xuc'ul bʌ t'an tsa' bʌ i mele Dios yic'ot David
(1 Cr. 17.1-27)
1Tsa' c'axi ti chumtʌl jini rey David ti ñuc bʌ i yotot. Lac Yum tsi' c'unte' lajmesa guerra ti' tojlel i contrajob ti jujunwejl. 2Jini rey tsi' sube jini x'alt'an Natán: Q'uele bajche' añon wʌle come wʌ' chumulon ti colem otot melbil bʌ ti ch'ujte', pero jini Arca i cha'an lac Yum an jach ti juntsajl melbil bʌ ti pisil, che'en. 3Natán tsi' sube jini rey: Mele pejtel chuqui a wom, come lac Yum woli' coltañet, che'en.
4Awilan ti jini jach bʌ ac'ʌlel tsa' tili i t'an lac Yum ba'an Natán. Tsi' sube: 5Cucu suben c winic David: “Jiñʌch i t'an a Yum: ¿Mu' ba caj a melbeñon cotot cha'an c chumlib? 6Come ti isujm ma'anic ba' ora tsa' wis ajniyon ti otot c'ʌlʌl che' bʌ tsac loc'sa jini israelob ti Egipto. Ya jach ti pisil bʌ otot tsac cha'le xʌmbal quic'ot c cha'año' bʌ. 7Che' bʌ tsac pi'leyob majlel baqui jach tsac sube jini israelob, ¿tsa' ba j c'ajtibeyob cotot jini año' bʌ i ye'tel ti' tojlel israelob? Ma'anic tsac sube mi juntiquilic cha'an mi' melbeñon cotot ti ch'ujte'”. 8Jini cha'an suben c winic David: “Che'ʌch woli' yʌl i Yum Panchan yic'ot Pañimil: Joñon tsac loc'sayet ti a we'tel ya' ba' tsa' cʌnta tiñʌme'. Tsa cotsayet ti' yum israelob cha'an ma' cʌntan c tejclum. 9Tsa'ix ajniyon quic'otet baqui jach tsa' ñumiyet. Tsa'ix c jisa pejtelel winicob tsa' bʌ tiliyob ti a contra. Mi caj cʌc' ti cʌjñel a c'aba' ti' tojlel ñuc bʌ winicob ti pañimil. 10Mux caj cʌq'ueñob i lum c winicob ba' mi' cajelob ti chumtʌl. Ya'i mi caj i yajñelob ti pejtelel q'uin. Ma'anic majqui mi caj i chʌn loc'sañob. Jini xjontolilob mach mejlix i chʌn tic'lañob che' bajche' ti ñaxan 11che' bʌ tsac wa'choco juezob ti' tojlel c tejclum israel c'ʌlʌl wʌle. Mi caj cʌq'uet ti chumtʌl ti ñʌch'ʌl ti' tojlel a contrajob. Lac Yum wolix i subeñet mi caj i xuc'chocoñet yic'ot a p'olbal ti a we'tel ti' tojlel israelob. 12Che' ts'ʌctʌyemix a jabilel, che' ma' majlel a c'aj a wo ba'an a tatob, che' jini mi caj c tech juntiquil a walobil cha'an mi' mel jini e'tel ti a q'uexol. Muq'uix caj cʌq'uen i yumʌntel. 13Jini a walobil mi caj i wa'chocobeñon cotot tij c'aba'. Joñon mi caj cʌq'uen i yumʌntel ti pejtelel ora. 14Mi caj i tatiñon. Mi caj i yochel ti calobil. Mi tsa' caji i ñusʌbeñon c t'an, mi caj cʌq'uen i tsico' pusic'al yic'ot asiyal che' bajche' mi' melob winicob ti pañimil che' mi' toj'esañob i yalobilob. 15Pero ma'anic mi caj j cʌy j c'uxbin a walobil che' bajche' tsaj cʌyʌ j c'uxbin Saúl che' bʌ tsac loc'sa ti' ye'tel. 16Mi caj cʌq'ueñob i ye'tel a polbal cha'an mi' cha'leñob yumʌntel tic tojlel ti pejtelel ora. Che'ʌch mi caj c melbeñet cha'an xuc'ul ma' wajñel ti a buchlib yic'ot a p'olbal ti pejtelel ora”. Che'ʌch yom ma' suben David, che'en lac Yum. 17Natán tsi' sube David pejtelel chuqui tac tsi' yubi yic'ot chuqui tac tsi' q'uele.
18Tsa' ochi David ti' tojlel lac Yum. Tsi' yʌlʌ: C Yum Dios, wen uts'atax jini mu' bʌ caj a melbeñon quic'ot calobilob. Anquese ma'anic c bajñel ñuclel lojon, tsa' pʌsbeyon i yutslel a pusic'al c'ʌlʌl wʌle. 19Come tsa' yajcayon che' maxto anic j c'ʌjñibal. Tsa' wa'chocoyon ti rey. Pero wʌle ñumen cabʌl mi caj a pʌsbeñon i yutslel a pusic'al ti' tojlel c p'olbalob ti pejtelel ora. C Yum Dios, mach che'ic mi' melob winicob bajche' jini. 20¿Chuqui to yom mic subeñet? A winicon, c Yum Dios. 21Cujil wolix a mel pejtel jini ñuc tac bʌ cha'an mi' ts'ʌctiyel a t'an, cha'an che'ʌch yom a pusic'al. Tsa'ix a wʌn subeyon. 22Come wen ñuquet, c Yum Dios. Ma'anic yambʌ Dios che' bajche' jatet. Jatet jach Dioset. 23Ma'anic yambʌ tejclum c'uxbibil bʌ bajche' Israel wʌ' ti pañimil. Come tsa' loc'sa ti wocol cha'an mi' ñochtañet. Tsa' pʌyʌyob cha'an ma' wʌc' ti ñuc i c'aba'. Tsa' pʌsbeyob i yejtal tac a p'ʌtʌlel cha'an mi' bʌc'ñañetob. Tsa'ix a mʌñʌyob loq'uel ti' lumal Egipto. Tsa'ix a choco jubel yan tac bʌ tejclum yic'ot i diosob. 24Isujm jatet c Yum tsa' wa'choco jini israelob a cha'año' bʌ cha'an mi' yochelob ti a tejclum ti pejtelel ora. Jatet c Yum tsa' wotsa a bʌ ti' Dios.
25Jini cha'an wʌle, c Yum Dios, ts'ʌctesan a t'an ti' tojlel c p'olbal ti pejtelel ora che' bajche' tsa' wʌlʌ. 26La' q'uejlic ti ñuc a c'aba' ti pejtelel ora. La' i subob winicob: “Jini Yumʌl am bʌ pejtelel i p'ʌtʌlel jiñʌch i Dios israelob”, che'ob che' wa'chocobilob c p'olbalob tic buchlib ti a tojlel. 27Come i Yumet Panchan yic'ot Pañimil, i Dioset Israel. Tsa' subeyon mi caj a coltañon quic'ot c p'olbalob cha'an mic cha'len lojon yumʌntel. Jini cha'an ñuquix c pusic'al wolic pejcañet ti oración. 28C Yum Dios, isujm Dioset ti pejtelel ora. Isujm pejtelel a t'an. Tsa'ix a wʌn subeyon chuqui mi caj a melbeñon ti uts'at. 29Jini cha'an a wocolic aq'ueñob i yutslel a pusic'al jini año' bʌ ti cotot cha'an mic chʌn ajñel lojon ti a tojlel ti pejtelel ora. Come tsa'ix a wʌc'ʌ a t'an, c Yum Dios. Tsa'ix a pʌsbeyon lojon i yutslel a pusic'al. Jini cha'an tijicñayon lojon ti pejtelel ora, che'en David.
Currently Selected:
2 SAMUEL 7: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.