2 SAMUEL 5
5
Tsa' wa'choconti David ti' rey israelob
(1 Cr. 11.1-3)
1Tsa' c'oti i pejcañob David ya' ti Hebrón pejtelel israelob ti mojt ti mojt. Tsi' yʌlʌyob: Wʌ' añon lojon. Junsujm jach c bʌc'tal lojon yic'ot a bʌc'tal. Junsujm jach c bʌquel lojon yic'ot a bʌquel. 2Come ti yambʌ ora che' woli to i cha'len yumʌl Saúl tic tojlel lojon, jatet tsa' majliyet ti guerra yic'ot soldadojob. Tsa' cha' sujtiyob a wic'ot. Mach jinic jach, pero lac Yum tsi' subeyet ja'el: “Yom ma' cʌntʌbeñon c tejclum Israel. Mux caj a cha'len ñuc bʌ yumʌl ti' tojlelob”, che'en lac Yum. Che' tsi' yʌlʌyob israelob. 3Che' jini tsa' c'otiyob ti Hebrón pejtelel jini xñoxob. Jini rey David tsi' laja i t'an yic'otob ti' wut lac Yum. Tsi' wa'chocoyob David ti rey ti' tojlel israelob. 4Anix lujump'ejl i cha'c'al i jabilel David che' bʌ tsa' caji i tech i yumʌntel. Cha'c'al jab tsi' cha'le i yumʌntel. 5Ojlil i waxʌcp'ejl jab tsi' cha'le i yumʌntel ti Hebrón ti' tojlel año' bʌ ti Judá. Uxlujump'ejl i cha'c'al (33) jab tsi' cha'le i yumʌntel ti Jerusalén ti' tojlel pejtel Israel yic'ot Judá.
David tsi' ch'ʌmʌ Sion
(1 Cr. 11.4-9)
6Tsa' majli ti guerra jini rey David yic'ot i winicob ti contra Jerusalén ba' chumulob jini jebuseojob. Come jini jebuseojob tsi' subeyob David: Mach mejlic a wochel ilayi, come jini xpots' yic'ot mach bʌ weñobic i yoc mi caj i choquetob loq'uel, che'ob. Tsi' lon ña'tayob mach mejlic ti ochel David. 7-8Pero David tsi' subeyob i soldadojob: Cucula ti letsel ti' bej yoc ja' c'ʌlʌl mi la' c'otel ti tejclum. Yom mi la' tsʌnsan jini xpots' bʌ yic'ot mach bʌ weñobic i yoc. Muc' abi i choquetla loq'uel, che'en. Che' jini David tsi' ch'ʌmʌ jini wen melbil bʌ tejclum i c'aba' Sion. Jiñʌch i tejclum David. Jini cha'an mi la cʌl: Jini xpots'ob yic'ot mach bʌ weñobic i yoc mi' mʌjlelob i cha'an, cho'onla. 9Jini cha'an David tsa' caji ti chumtʌl ti jini wen melbil bʌ tejclum. Tsi' yotsʌbe i c'aba' I Tejclum David. Tsi' ts'ajqui wen tac bʌ otot c'ʌlʌl ti Milo c'ʌlʌl ti' yojlil tejclum. 10Che' jini tsa' utsi p'ojli i p'ʌtʌlel David. Jini lac Yum Dios, jini Yumʌl ti Panchan yic'ot ti Pañimil, an yic'ot David.
Hiram tsi' choco majlel x'ac' jun ba'an David
(1 Cr. 14.1-2)
11Hiram i rey jini año' bʌ ti Tiro, tsi' choco majlel x'ac' juñob ba'an David. Tsi' choco majlel ch'ujte', yic'ot xjuc' te'ob yujilo' bʌ i melol otot, yic'ot yujilo' bʌ i ts'ajquintel otot, cha'an mi' melbeñob i yotot David. 12Jini cha'an David tsi' ña'ta isujm lac Yum tsi' wa'choco ti rey. Tsi' ñuq'uesʌbe i yumʌntel come c'ux tsi' yubi Israel, jini tejclum yajcʌbil bʌ i cha'an.
I yalobilob David tsa' bʌ i yilayob pañimil ti Jerusalén
(1 Cr. 3.5-9; 14.3-7)
13Che' bʌ tsa' loq'ui David ti Hebrón cha'an mi' chumtʌl ti Jerusalén, tsa' to i cha' pʌyʌ yan tac bʌ i yijñam David. Tsi' yila pañimil ch'iton bʌ yic'ot xch'oc bʌ i yalobilob. 14Jiñʌch i c'aba' i yalobilob tsa' bʌ i yilayob pañimil ti Jerusalén: Samúa, Sobab, Natán, Salomón, 15Ibhar, Elisúa, Nefeg, Jafía, 16Elisama, Eliada yic'ot Elifelet.
David tsi' jisa jini filisteojob
(1 Cr. 14.8-17)
17Che' bʌ tsi' yubiyob filisteojob wa'chocobilix David ti rey ti' tojlel israelob, tsa' caji i contrajiñob David yic'ot pejtelel i soldadojob. Che' bʌ tsi' yubi David, ti ora tsa' majli ba' wen ts'ajquibil. 18Tsa' tiliyob jini filisteojob. Tsa' pam jijliyob ti joctʌl i c'aba' Refaim. 19David tsi' pejca lac Yum: ¿Yom ba mic majlel c cha'len guerra ti' contra filisteojob? ¿Mu ba caj a wʌc'ob tij c'ʌb? che'en. Lac Yum tsi' sube David: Cucu come ti isujm mi caj c'ʌc' jini filisteojob ti a c'ʌb, che'en. 20Che' jini tsa' majli David ba'an Baal Perazim. Ya'i tsi' mʌlʌ David. Tsi' yʌlʌ: Lac Yum tsa'ix i jisʌbeyon j contrajob ti' tojel c wut che' bajche' but'ja' mu' bʌ i pajmel loq'uel ti' ti' pa', che'en. Jini cha'an tsa' otsʌbenti i c'aba' Baal Perazim. 21Ya' tsi' cʌyʌyob i dioste'ob. David yic'ot i soldadojob tsi' laj puluyob.
22Pero tsa' cha' tiliyob ti guerra jini filisteojob. Tsa' cha' ochiyob ti joctʌl i c'aba' Refaim. 23David tsi' cha' c'ajtibe lac Yum. Lac Yum tsi' yʌlʌ: Mach yomic ma' letsel majlel. Yom mi la' joy mʌctañob ti' pat ya' ti' tojel jini bálsama te'. 24Che' ma' wubin t'an che' bajche' xʌmbal ti' pam jini bálsama te', ti jim bʌ ora yom ma' cha'len wersa, come che' jini loq'uemonix ti' tojel a wut cha'an mic jisan jini filisteojob. Che' tsi' yʌlʌ lac Yum. 25Che'ʌch tsi' mele David che' bajche' tsi' sube lac Yum. Tsi' laj jisa jini filisteojob c'ʌlʌl ti Geba, c'ʌlʌl ba' mi la cochel ti Gezer.
Currently Selected:
2 SAMUEL 5: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.