METIAS 2
2
Beyeme mam ba zu yene Yésus
1Eyoñe Yésus a bialéya e Bétléhém ya Yudé, melu njô bôte Hérôde, ô lôô beyeme mam ya jôb da tôô be nga kui Yérusalém be siliʼi na: 2Njô bôte beyude a nga bialé va a ne vé? Amu bi nga yen ôteté vié e jôbe da tôô a bi zuya kañe nye. 3Eyoñe Hérôde, njô bôt a wôʼôya nalé, metyi me nga ke nye fé baa ngume tisone Yérusalém ôse; 4ve sulane bivete betuni a beyeme bekalate bese yʼayoñ asu ya yemelane be be e vôme Krist a yiane bialé. 5Be nye na: E Bétléhém ya Yudé amu avale di nde nkulu mejô a nga tili na:
6Amu wo a Bétléhém, si ya Yudé
ô nji dañe dañe tyôtyoé ézezañe minlô minlame ya Yuda,
Amu na Njôô a ye so be wo,
A ye baʼale mbame wom Israél.
7Eyoñe te Hérôde a nga loone beyeme mam ômômoʼo, a mane tuʼa yemelane be be éyoñ be nga yen ôteté. 8A nga lôme fe be Bétléhém, nye na: Kelan mi ke tuʼa yemelan ajô mon ate. Eyoñ mi yeneya nye, katane ma foé, nalé ate ma fe ma ye ke kañe nye. 9Eyoñe be maneya wôʼô nkobô njô bôt, be nga téé dulu: ateme na ôteté be nga yene mfaʼa jôbe da tôô ô ntele be ôsu, akekui ô nga tebe yôp e zia mone mon a nga bôô. 10Ayene be nga yen ôteté be nga vak angôndô ya beta mvaʼan. 11Eyoñe be keya kui e nda , be nga yene mone mon baa Marie nyia wé; be ku si a kañe nye; be mane kuli akume dap a ve nye memvaka: or, ôtu a mir. 12Amu be nga veban ayemé e biyeyeme na be bo te beta bulan e be Hérôde, nde be nga nyoñe zene fe a bulan e si jap.
Kôlôʼô si, ô ke mbil Ejipte
13Eyoñe be bulaneya, e teme na éngele Nti a nga yené be Yôsep e biyeyem a jô nye na: Kôlôʼô si ô nyoñe mon baa nyia a tup e mfaʼa yʼ Ejipte a tabe wé akekui ma ye kate wo: Amu Hérôd a jeñe mone na a wôé nye. 14Eyoñe Yôsep a kôlôya si, a nga nyoñe mone mon baa nyia wé a alu a ke Ejipte 15a nga tabe wé akekui Hérôde a nga wu, nalé ate Njôan ô nga jôban mfaʼa Nti anyu nkulu mejô na: Me nga loone mone wom a soʼo Ejipte. 16Eyoñe Hérôde a yeneya na beyeme mam be duʼuya nye, a nga dañe wôʼ ôlun. Ane a nga lôme na be ke wôé bone bese: ba ya Bétléhém a afôla si ese ya valé, ataté mimbaé a ke si bebé aval éyoñ a nga bi ayemé e be beyeme mam; 17nalé ate njôane Nkulu Mejô Yérémi ô nga tôébane na: 18Be nga wôʼô tyiñ e Rama, ñyôn a abui du, Rachél a yônôk bone bé te kômbô volôbane nlem , amu bone bete be nji beta bo.
Enyiñe ya Nazarét
19Eyoñe Hérôde a wuya, e teme na Yôsep a nga yen éngele Nti e biyeyem Ejipte, 20a jôʼô na: Kôlôʼô si, nyoñe mon baa nyia ô ke si Israél amu e ne foʼo na ba be nga jeñ ényiñe mone mon be wuya. 21Eyoñe Yôsep a kôlôya si, a nga nyoñe mone mon baa nyia a ke e sii Israél. 22Awôʼô a nga wôʼô na Arkélaôs a ntoo njôô bôte ya Yudé éjiane Hérôde ésaa wé, ane a nga ko woñe ya ke wé. Eyoñe be zuya lebe nye biyeyem, a nga ke bifase ya Galilé. 23A nga ke tabe e tison ba loone na Nazarét, a jalé njôane yʼanyu bekulu mejô ñwô ô ne na: Ba ye yôlé nye na mone Nazarét.
Currently Selected:
METIAS 2: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009