Sawal la giled’a 91
91
Yima ngeid’a navo hAlo ma kal teglesâ
1Sama mi nga kaka ad’u angus
Alo ma sä akulo ma kal teglesîna,
mi nga ni kaka ad’u angus
Alo ma ad’engêm kal petna.
2Mi ndak á de mi Ma didina ala:
Angî yi man ma ngeid’a,
angî gulumun ma sud’una,
angî Alo man ma an tin hurun kangâ.
3NAlona ba, mba mi prud’ung ngei
abo dauna hi sama nduwandina,
abo tugud’ei djabuma mi.
4Alona mi mining nga yima kaka ad’u gigingâmu;
ang mba ngei tang kua.
Gagazi mamba ni mbareid’a, ni kongrongâ mi.
5Ang mba ring mandara vama lang andjegena
d’oze yeû d’a djang faleid’a
6d’oze tugud’ei djabum ma vang andjegena
d’oze b’lak ka fang falei d’ad’ara d’uo.
7Le suma a tchuk kä geveng dubu,
dudubu dogo ata bigang nga ndjufa pî,
ang va mba mi lang ngi.
8Ang kak tchugot gola,
ang mba we ni nana ba, Alona mba mi wurak suma asa’atna ge?
9Kayam Ma didin ma sä akulo ma kal teglesâ
ni yi mang ma ngei tangâ,
ang mbud’umî yi mang ma kaka.
10Vama tcho tu pî mba mi dong ngi,
ndak tu pî mba d’i tchila avo hatang nguo mi.
11Kayam Ma didina mba mi he vuna mi malaika mama
á ngomong ata yima lara ge pet ma ang tit kuana.
12A mba vang akulo kabozi
kayambala ahinad’a ti dabang aseng nguo d’a.
13Ang mba tit yam azlona ki mageid’a,
ang mba miret yam gor azlona ki guguina kä aseng mi.
14Ma didina mi dala: Kayamba mi le kanda,
an mba ni prud’um mbeyo,
an mba ni ngomom mi, kayam mi wan ndei tetet.
15Le mi yanu ni, an mba ni humumu.
An mba ni ndjunum kur ndak mamba,
an mba ni prud’um mbeyo,
an mba ni suburum mi.
16An mba ni hum burum fiyaka,
mba mi kak yam andagad’a tatâ,
an mba ni tagam sut manda mi.
Currently Selected:
Sawal la giled’a 91: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
