Sawal la giled’a 19
19
Subur ra sä akulod’a
1Ni sawal la David mi hlat mi hat mi ma ngolâ hi suma hle sawalina.
2Akulod’a nga d’i de woi yam subura hAlonid’a,
hur alona nga mi simat sun nda Alona mi lat kabomba woi mi.
3Faleid’a nga d’i hat ndrat faleid’a yam sunda hAlonid’a;
andjeged’a nga d’i tak ndrat andjeged’a kat mi.
4Azi nga ki vuna d’i, azi nga de zlad’a d’i,
sa nga mi humuzi delezi d’uo pî
5zla mazi d’a ded’a ti nde woi yam andagad’a pet,
zla mazid’a ti b’rau woi avun dabid’a handagad’id’a pet mi.
Alona mi ve nga zlub’ud’a akulo mafata.
6Afata ni d’igi gor azong ma tel atchad’a awili
ma nga mi nde woi yorogo avun aziyam ki furîd’ina na.
Ti ni d’igi sama ad’eng ma kus ayî ma nga mi guvutna na.
7Ti ndeï avun dabid’a hakulod’id’a,
gak ti i avun dabi d’a abo hî d’a;
vama mi ngei tam abo huwak matina nga d’uo mi.
Gata hi Ma didinid’a
8Gata hi Ma didinid’a ti ndak memet,
ti nga d’i had’enga mi sana á kak karid’a;
glangâsâ hi Ma didinina ni ma gagazina,
nga mi mbut sama bei ned’a sama ned’a mi;
9Vun ma hed’a hi Ma didinina ni d’ingêr,
nga mi he sana furîd’a kurum krovo;
vun ma hed’a hi Ma didinina ni ma iratna,
nga mi mal ir sana woyo;
10le mandara Ma didina ni vama djivina,
ni vama nga kur atchogoid’a katchogoid’ina;
nga hurâ hi Ma didinina pet ni ma gagazina,
ni ma d’ingêrâ mi.
11Djivi mamba kal lora,
kal lor ra a yorot kakud’id’a woi dei;
adjib’et mamba ti kal mbul ayuma,
ti kal mbul ayum ma nga mi djang kä ir sëma.
12Ma didina, ni vun mang ma hed’a ba,
nga mi had’an an azong mangâ;
sama nga mi tit kama, nga mi fe wurak ka ngola kua.
13Ni nge ba, mi ndak á we vama mam lum ata yam mbuo na ge?
Ang vat hurung ngei yam vama an lum ir vitina.
14Ang ngomon an azong mangâ
tala an le tchod’a ki iran á ngangata d’uo d’a,
arat ti te kan ndi.
Hina wani, an mbut ni sama d’ingêr
ma bei ni le tcho d’a ngola ba na.
15Ma didina, angî ahina manda, angî ma wurak kana,
ar zla d’a avunanda
ki djib’er ra kurunda a lang tang djivid’a.
Currently Selected:
Sawal la giled’a 19: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
