Sawal la giled’a 18
18
Sawal la kusa hi David-ta
(Gol 2 Sam 22.1-51)
1Ata yima Ma didina mi prut David tei abo mam suma djangûna petna, kal pet nabo Saul, ata yi máma David azongâ hi Ma didinina mi hle sawal la wanda mi Ma didina, mi hat mi ma ngolâ hi suma hle sawalina, mi dala:
2Ma didina, an nga ni le kangû,
angî ad’eng manda.
3Ma didina nahina man nda ndjununda,
ni gulumun ma ad’eng ma sud’una;
Alo mana nahina man nda an ngei tan kuad’a,
mam mi mbarei manda, mam mi ad’eng man nda sud’unda,
mam mi yima an sut tan kuana.
4An nga ni gile Ma didina,
kayam me ata yima an yuma
mi sud’un ndei abo man suma djangûna.
5Matna nguyun wa kabei mamba,
matna mi mbud’un mandarâ d’igi mbiyo ma djang wü na na.
6Ziyona hi yima azuleinina mi nguyun wa,
dauna hi matnina mi nga gunda kä avoronu.
7Kur yor ta manda, an yi Ma didina,
an tchi yam Alo mana.
Ata yam ma kaka mi humun delen kur gong mamba,
tchi mana mi ndeza humamu.
8Ata yima hurum zalâ,
andagad’a yir gigidji, ti giget mi;
ad’u ahuniyôna pet a yira, a giget mi.
9Andosâ buzuk kei atchinamu,
sin akud’a nde woi avunamu,
nga d’i yak kä tchutchum d’igi gordjona na.
10Mi hud’ï akulod’a kä,
mi tchuk asem kä kad’u;
d’ugul la wurad’a nga ad’um kä.
11Mi nga yam tcherebêna, mi pir akulo;
mi dal akulo yam simetna.
12Mi mbut nduvunda ni yi mam ma ngeid’a,
ni zlub’u mam mba nguyumba;
alo ma sed’a ki d’ugul la wurad’a a nguyum mi.
13Ata yi máma d’ugula b’rau woi abo wile mamba,
mogoina kakud’a ki gordjona a yak kä.
14Ma didina mi breî ei kur akulod’a,
ma sä akulo ma kal teglesâ delem nga d’i zla ngungur,
mogoina kakud’a ki gordjona a yak kä.
15Mi yet mam suma djangûna ki yeû mamba,
mi b’rawazi woyo;
wile mamba ti ndjoyôzi woi vivreng.
16Ma didina, yam ngop manga,
mbiyo aluma ad’um mba dabid’a nde woi abua;
yam muzuk ka atchinanga,
andagad’a ad’ut ta ged’a nde woi pid’ak mi.
17Mi mad’ï abom akulo, mi vanu,
mi hlan ndei kur galileina.
18Mi sud’un ndei abo man ma djangû ma ad’engâ,
abo suma a noyôn suma a kalan kad’engina.
19Ata yima an nga kur yor tad’ina,
azi mba kan dumuzi,
wani Ma didina mi mba mi van akulo atamu.
20Mi ndan ndei ata yima tchona,
mi gan akulo, kayam hurum vanu.
21Ma didina mi lan djivid’a ni yam d’ingêr manda,
mi hulong lan djivid’a
ni kayamba abon do nga vama tcho d’uo d’a.
22Kayam an nga ni tit kur lovota hi Ma didinid’a,
an le nga asa’ata avor Alo mana d’i.
23An nga ni tit yam vun ma he mama pet,
an nga ni tchila yam gat mamba d’i.
24An nga ki zla kan avorom mbi,
an ngom tan ped’et bei le tchod’a.
25Ni kayam ndata ba,
Ma didina mi wuragan yam d’ingêr manda,
yam abon ma do nga tcho avorom mbuo na mi.
26Sama d’engzengâ, ang nga tagam d’engzeng manga;
sama d’ingêrâ, ang nga simid’am d’ingêr manga mi.
27Sama yed’etna, ang nga tagam yed’et manga,
sama nga mi le sun nda ata yat tuo d’ina,
ang nga simid’am sun nda ata yat tuo d’a mi.
28Ang nga sut suma a nga kur hohoud’ina,
wani ang nga hulong suma a hle yazi akulona yazi kä.
29Ma didina, angî lalam man nda b’o yina,
Alo mana, ang b’o yima nduvun ma an nga kurâ woyo.
30Ni yam ad’eng manga ba,
an nga ni nde b’rang nga ngola ayîna;
ni yam ang Alo mana ba,
an nga ni pir yam gulumun ma ad’eng ma ngunguna mi.
31Alona lovot mamba ni d’ingêr,
Ma didina zla mamba, suma a wat ala ni zla d’a irata.
Mam mi mbareid’a hi suma pet suma a deng tazi atama.
32Alo ma iratna ni nge? Ni Ma didina.
Ahina d’a irata ni nge? NAlo meina.
33Alona ni ma han ad’engina,
ni ma minin lovot manda d’ingêrâ.
34Mi mbud’un asen d’igi ma hi pandrid’ina na,
nga mi tinin á tita yam ahuniyôna akulo.
35Mi had’an á dur ayîna,
mi han ad’enga á gan kawei ma hleuna yeûd’a.
36Ang Alona ni mbarei man nda suta,
abong ma ndjufâ nga mi djigin akulo,
yam djivi manga ang mbud’un ma ngolâ.
37Ang mal lovota avoron á ringâ atogo,
va nga mi daban asen ndi.
38An nga ni dik man suma djangûna, ni faziya,
an nga ni hulong bei dabazi tchid’a woi d’i.
39An mba ni tchalazi tchid’a,
sa mba mi tchol akulo avoron ndi;
azi mba puk kä,
an mba ni tin asen kelezi kä.
40Ang han ad’enga á dur ayîna,
ang hulong man suma djangûna yazi kä ad’unu.
41Ang ar man suma djangûna a ring avoronu,
suma a noyôna an dabazi tchid’a woyo.
42Azi nga tchiya, wani sama ndjunuzi nga d’i;
azi nga yi Ma didina, wani nga mi humuzi d’i.
43An mba ni lud’ud’uziya,
azi mba mbut d’igi guguma na,
simetna mba mi sirizi woyo;
an mba ni mired’ezi kä
d’igi suma a miret lubu ma kur lovotina kä na.
44Ang prud’un ndei abo suma a tchol huneîd’a ki sed’ena,
ang tinin yam andjaf suma;
andjaf suma an wazi nga d’uo na a lan sunda.
45Ata yima azi hum zla mandina,
azi ge yazi kä avoronu;
andjaf suma dingâ a mba hün ni ir mandarâ.
46Andjaf suma dingâ a tchuk susub’ok,
azi mba buzuk kei ki mandarâ
kur gulumun mazi ma ad’eng ma ngunguna.
47Ma didina, angî ma nga na;
an nga ni gileng ang ahina manda,
an nga ni suburung ang Alo man ma suta.
48Angî ma san atchuguluna,
angî ma hulong andjaf suma yazi kä ad’una.
49Ang sud’un ndei abo man suma djangûna,
ang tinin á kus ayîna yam man suma djangûna,
ang sud’un ndei abo sama murud’umba mi.
50Kayam ndata, Ma didina,
an mba ni suburung aduk andjaf suma,
an mba ni gileng simiyêng ki sawala mi.
51Ma didina, ang lahle suma ndandalâ
á sud’un an amul mangâ,
ang tak o mang nga didinda mi an amul ma ang manana,
nala, an David kandjavan gak didin.
Currently Selected:
Sawal la giled’a 18: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
