Sawal la giled’a 116
116
Sama a sud’uma nga mi subur Alona
1Hurun ve Ma didina,
kayam nga mi humun delen ki tchen manda.
2Nga mi tin humam kanu;
an mba ni yum kur bur mana kaf.
3Matna mi d’ud’un wa ki ziyo mama;
mandarâ hi yima azuleinina, mi van wa;
djop vuna ki kid’eî ira a van wa mi.
4Wani an nga ni yi simiyê Ma didina,
an dala: Ma didina, ang wan hohowonu,
ang sud’unu.
5Ma didina ni ma djivina, ni ma d’ingêrâ.
Alo meina ni ma we hohowa sumina.
6Ma didina nga mi ngom suma lulumana.
An mbut amangeîd’a, wani mi sud’un ndeyo.
7An min hulong ata yi man ma tuk tad’a,
kayam Ma didina, mi lan djivid’a.
8Gagazi, Ma didina, ang prud’un ndei avun matna,
ang sed’en simi ma irana woyo,
ang djigin akulo ata yima an lá puka kä na mi.
9An mba ni tit avok Ma didina
yam andagad’a ka hî aduk suma arina.
10Ata yima an nga ni dala:
An nga kur ndaka heyû na pî,
an nga ki hur ma tinda.
11Kur tcha tata manda an dala:
Suma pet ni suma ka zlad’a.
12An mba ni he ni me mi Ma didina
yam djivi d’a pet ta mi lat ki sed’enda ge?
13An mba ni mba ki he d’a hawa d’a süm guguzlud’a
mi Ma didina á suburumu,
kayam mi sud’un ndei avun matna,
an mba ni yi simiyê Ma didina mi.
14An mba ni ndak vun vun man ma hle
ma an hlum mi Ma didinina
avok sum mama pet.
15Ma didina hurum nga mi hat
yam matna hi suma a hum gagazinina heî.
16Ma didina, an nga ni tchenengû,
kayam an nazong mangâ,
an ni wei manga gorotna.
Ni ang ba, bud’un ziyo ma a djinin ki na woyo.
17An mba ni hang vama ngat buzu ma lang mersid’a,
an mba ni yang simiyêng ang Ma didina mi.
18An mba ni ndak vun vun man ma hle
ma an hlum mi Ma didinina
avok sum mama pet,
19kur gulumuna hi gong mam mba kud’or ra
avo Jerusalem-mba.
Agi gilegi Ma didina!
Currently Selected:
Sawal la giled’a 116: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
