Sawal la giled’a 107
107
MBAKTUM MBA VAHLA
(107—150)
Agi gilegi Alo ma sut suma
1Agi gilegi Ma didina,
kayam mam mi ma djivina,
kayam o mamba ni d’a didinda!
2Ar suma Ma didina mi prud’uzi woina a de na!
Ar suma mi prud’uzi woi abo mazi suma djangûna,
3mi togozi woi kur ambasa hi suma dingîd’a
abo ma yorogona, abo ma fladegena,
abo ma norâ kabo ma sutnina,
a de na mi!
4Israel suma dingâ a dau abagei hur fulâ,
kur tit mazi d’a glovot hur ful ma gangrasîd’a.
Azi fe nga azì ma kaka d’i.
5Meid’a ki vun ma sod’a a tchaziya,
tazi tchuk susub’ok.
6Kur ndak mazid’a azi yi Ma didina,
mi sud’uzi woi kur djop vun mazina mi.
7Mi tagazi lovot ta d’ingêra
kayambala a fe azì ma kaka d’a.
8Ar a gile Ma didina yam o mam mba didinda,
yam sun mam mba ndandal la mi lat yam sumid’a.
9Mi he mbiyo ma tched’a mi sama vunam sona,
sama meid’a tchuma mi hobom hayam mi.
10Suma dingâ, ni suma kur hohoud’a
djinda ki kindjingâ kä kur dangeinina,
a nga kaka kä kur nduvunda kur dangeina,
11kayam azi tchila yam gata hAlonid’a,
kayam azi gol zla d’a ded’a
hi ma sä akulo ma kal teglesîd’a is.
12Mi gazi yazi kä ad’u sun nda le d’a ndaka;
a puk kä, sama ndjunuzi nga d’uo mi.
13Kur ndak mazid’a azi yi Ma didina,
mi sud’uzi woi kur djop vun mazina mi.
14Mi buzuguzi woi kur dangeina,
mi tchal kindjing mazina woi mi.
15Ar a gile Ma didina yam o mam mba didinda,
yam sun mam mba ndandal la mi lat yam sumid’a.
16Mi kus vun agrek ma kawei ma hleuna woyo,
mi kus vun gong nga nga duka
ki kawei ma ad’engîd’a woi mi.
17Suma ding suma yazi nga d’uo na,
kur sun mazid’a murud’umba,
yam tcho mazi d’a led’a a mbut hohoud’a.
18Tena pet mi mbut tchod’a iraziya,
azi lá matna.
19Kur ndak mazid’a azi yi Ma didina,
mi sud’uzi woi kur djop vun mazina mi.
20Mi sunuzi zla mamba, mi sud’uzi woyo,
mi prud’uzi woi avun matna.
21Ar a gile Ma didina yam o mam mba didinda,
yam sun mam mba ndandal la mi lat yam sumid’a.
22Ar a he vama ngat buzu ma le mersid’a mi Ma didina,
ar a de woi yam sun mam mba mi lata
ki delezi akulo ki furîd’a.
23Suma ding suma a nga tit ki batod’a kur alum ma ngolâ
suma a nga le sunda aduk mbiyo ma ngol mámina,
24sum ndazina a we sunda hi Ma didinid’a
kahle mam suma ndandal
suma mi lazi kur mbiyo ma galileinina.
25Mi de zlad’a, babar ma ngolâ mi tchol akulo bibik,
mi labilâ ngola heî mi.
26Bato mazid’a nga d’i i akulo hur alona,
ti hulong kä aduk mbiyo ma galileina;
a mbut mandarâ abo ndak ka nga d’i lazid’a.
27Irazi nga d’i gazi nduvunda,
a nga hle titigir d’igi sama gurut ki sümina na,
djib’er mazi d’a djivid’a vit tei mi.
28Kur ndak mazid’a azi yi Ma didina,
mi sud’uzi woi kur djop vun mazina mi.
29Mi d’el babarâ; babarâ tchol b’et,
abilâ ba mi.
30A le furîd’a yam yima seng sililâ;
Ma didina mi tinizi ata yima azi min i kuana.
31Ar a gile Ma didina yam o mam mba didinda,
yam sun mam mba ndandal la mi lat yam sumid’a.
32Ar a de woi yam ngol mamba aduk toka hi sumid’a,
ar a gilem aduk toka hi suma nglonid’a mi.
33Ma didina mi mbut aluma ful ma kakana,
mi mbut golong nga laud’a andaga d’a so d’a gangrasa,
34mi mbut ambas sa tub’ad’a ambas sa himbirâ,
kayam asa’ata hi suma kurutnid’a.
35Mi mbut fulâ apo d’a ngola,
mi mbut andaga d’a gangrasa golong nga laud’a mi.
36Ata yi máma mi tchuk suma meid’a tchazina kua;
a min aziyazi ma kaka.
37Azi zar ahlena kur asinena,
a pe guguzlud’a, a dud’ut vud’ut mi.
38Mi b’e vunam kaziya, mi zuluzi ablaud’a;
d’uwar mazina mi feî nga d’uo mi.
39Wani ata yima suma hAlonina a feî a dodong kä
abo sun nda magomba ki djop vuna ki kid’eî irina,
40Ma didina mi gol suma nglona
hi suma a nga lazi magombina is,
mi mbud’uzi suma daud’a
abagei hur ful ma lovota nga kua d’uo na.
41Wani mi sut mam suma hou suma hohoud’a woyo,
mi zuluzi andjavazi d’igi ades tumiyôna na.
42Suma d’ingêrâ a we hina, a le furîd’a;
suma bei d’engzengâ vunazi mi seng silil mi.
43Ar sama ned’a mi kak ki ned’a yam ahle ndazina,
ar mi wäd’u sun nda o d’a didin nda Ma didina mi lata mi.
Currently Selected:
Sawal la giled’a 107: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
