Zla d’a d’ogolâ 8
8
Ned’a nga d’i yi yi d’a dinga kua
1Ned’a nga d’i yi akulo d’uo zu?
Wad’ud’a nga d’i de ki delet akulo mi d’uo zu?
2Ti nga tchola avun lovota ata yima ndingâ,
avun grak lovota mi.
3Ti nga d’i er ad’ut akulo avun agre’â
ata yima suma a nga kal ki hur azì ma ngolîna,
ti nga d’i er ad’ut akulo avun azina ala:
4An yagi ni agi andjofâ,
an de ni mi suma wurana.
5Agi suma bei wäd’u zlad’a ba na, agi had’agi ned’a,
agi suma lilid’a, agi had’agi wad’ud’a.
6Agi humugiya, kayam an nga ki zla d’a ndaka á dagiya,
an nga ni mal vunan á hat zla d’a d’ingêra.
7An nga ni de zla d’a gagazid’a woi ki vunanu,
zla d’a kad’a ni vama ndjendjed’a avunan mi.
8An de ni zla d’a gagazid’a,
zla d’a kad’a d’oze zla d’a ata yat tuo d’a
nga d’i ndavunan nduo mi.
9Sama wad’ud’a mi ndak á wahle ndazina woi tetet,
suma a had’azi wed’ina a wazi woi yed’et mi.
10Ar agi vagi hat manda kal beged’a,
ar agi vagi wed’a kal lor ra bei zozota ba d’a.
11Kayam ned’a ti kal ahina d’a guzut kal teglesa,
vama guzum kal tegles ma ngam ki sed’etna nga d’uo mi.
Ned’a nga d’i tak tat teyo
12An ned’a, wad’ud’a ti nga kaka ki sed’enu,
an we lovota á lahlena ata lovod’oziya.
13Le mandara Ma didina ni lovot ta noî tchod’a.
Yam mba ad’enga, subur tad’a, tit ta tchod’a
ki zla d’a de d’a ata yat tuo d’a nahle suma an minizi d’uo na.
14D’alâ ki zla d’a irata a ni mana,
an ni wad’ud’a, ad’enga ni manda.
15Ni kayam an ba, amuleina a nga te leud’a,
suma nglona a nga ka sariya d’a d’ingêra mi.
16Ni kayam an ba, amuleina ki suma nglo suma hurazinina
ki suma ka sariya suma yam andagad’ina pet a nga te yamba.
17An nga ni le yam suma a le kana,
suma a nga halana a mba fan mi.
18Ndjondjoîd’a ki subura a fazi nata anu,
ahle suma a te tatâ na ki bege d’a i avogovoka a fazi nata an mi.
19Ahle suma an hazina a djivid’a kal lora,
kal lor ra bei zozota ba d’a,
Mbiyozi mi djivid’a kal bege d’a hap pa a manata.
20An nga ni tit kur lovot ta d’ingêra,
kur lovot ta gurei d’a d’ingêra d’ad’ar,
21á hahle suma djivina mi suma a nga le kana,
á oyôzi yazi ma ngom ndjondjoîd’a mi.
22Ma didina mi gan#8.22 gan: Mbut ta dinga ala: fan ni avok sun mam mba mi lata,
avok sun mam mba dedeid’a.
23Mi tinin an navok dedei,
avok bei ad’u tinda handagad’id’a.
24A vud’un navok bei le mbiyo ma d’id’ilima,
bei le ir mbiyo ma laud’a mi.
25A vud’un navok bei lahina d’a nglod’a,
bei le yima ndingâ,
26bei landagad’a kabageid’a,
bei landaga d’a gugud’upa hina fel ba.
27Ata yima mi tin akulod’a,
mi ngui yina mi mbiyo ma d’id’ilimina, an nga.
28Ata yima mi tin d’ugula akulo,
mi he vuna mi mbiyo ma d’id’ilima á djang kad’engêma, an nga.
29Ata yima mi nga hagad’a malum ma ngolâ
tala mbina mi tchila woi yam yima ngamzina d’uo d’a, an nga.
Ata yima mi nga ad’u andagad’ina, an nga mi.
30An ni sama d’al ma nga zlapa ki sed’ema,
an nga ni lum tam djivid’a burâ ki burâ,
an nga ni lü avorom ata yima lara ge pet mi.
31An nga ni lü yam andaga mamba,
tan nga d’i lan djivid’a aduk suma yam andagad’ina mi.
Sama nga mi hum ned’ina mi le furîd’a
32Grona, ki tchetchemba, agi humunu.
Suma a nga ngom gat mandina a le furîd’a.
33Agi humugi hata.
Hina wani, agi mba mbud’ugi suma ned’a.
Ar agi golot is si.
34Sama nga mi humuna
ma nga tchola avun agrek mana burâ ki burâ
ma nga tchola ndjola avun aziyana, mi le furîd’a.
35Kayam sama fana mi fe narid’a,
Ma didina mba mi wum hohowom mi.
36Wani sama mi lan tchod’ina, mi le ni tam tchod’a;
suma pet suma a noyôna, a min ni matna.
Currently Selected:
Zla d’a d’ogolâ 8: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
