Zla d’a d’ogolâ 7
7
Atcha d’a mizeuna nga d’i lop vun gor azongâ
1Gorona, ang ve zla manda, ang ngom vun man ma hed’a kurung mi. 2Ang ngom vun man ma hed’a kayam ang kak karid’a, ang ngom hat manda d’igi irang nga aduka na mi. 3Ang tchuguzi abong ngangam ngangami, ang b’irizi kä kurung mi. 4Ang yi ned’a ala: Nda’î wiyenda, ang yi wad’ud’a ala: Nda’î bananda mi. 5Hina wani, a mba ngomong ngei abo atcha d’a gaulangâ, abo d’a ding nga vunat mbulâ á lop vun sumid’a mi.
6Bur tu an nga ir fenetred’a hi gong mandid’a, an nga ni gol yina sä woi ir kawei ma ndjana. 7An gol aduk suma bei wäd’u zlad’a ba na, an we gor azong ma lilid’a aduk gro azungeîna. 8Nga mi kal ir palumba go kazina hatchad’a tu, mi hle lovot ta kal avunata, 9ni kid’a afata nik go ki yina ziwit kandjege d’a yina mbut nduvundid’a. 10Gola! Atcha d’a mbut tat d’igi atcha d’a gaulangâ na d’a, ti ngavamu, lemba nga oîd’a kurud’u. 11Natcha d’a zlad’a ndavunat ta yat ad’engid’a, aset nga mi ve kä avo hatat hina kei d’uo d’a. 12Nga d’i i ir palumba, nga d’i i ata yima suma a tok kuana, nga d’i i ata yima lara ge pet á ndjol suma. 13Ti vumu, ti sobom vunamu, ti dum zlad’a bei zulona ba ala: 14An ni he wa vama ngat buzu ma zlap darigïd’a, an ndak wa vun vun man ma hle ma an hlum mAlonina ini. 15Ni kayam ndata ba, an nde woi á d’ugulong wana, an halangû, an fang wa da’. 16An min wa azang mana, an zlup wa borogona kä kamu, an tchuk wa ladra ma djif ma a tchilim ki baru d’a par ra Ezipte-d’ina kä kam mi. 17An yam wa mbul mirâ, mbul alowena ki mbul sinamoma yam azang mana. 18Ang mbeya, ei buri kel tei gak yorogo, ei hei tei á le furîd’a ki hur ma ved’a. 19Kayam ndjuvun mi nga avo d’i, mi i wa akoid’a ata yima deina. 20Mi hle bid’im mba beged’a abomu, mi mba ni tilâ b’od’a mbeî. 21Ti vum ki lem mata, ti tanam ki vunat ma mbulâ. 22Atogo hina zak mi ge tam ad’ut d’igi amuhl ma im ata yima ngatina na, d’igi azar ma ve kabeid’a 23ma gak yeûd’a ti tchogom yam mugulama na, d’oze d’igi alei ma mi b’at tam á ve ki dauna ma mi we nga d’ala a gunum ná bam mbeyo d’uo na na.
24Gorona, ki tchetchemba, ang hum zla manda, ang tin humang á hum zla d’a ndavunanda. 25Ar hurung mi mbut á tit ad’u atcha d’a na d’a d’i, ar ang ba woi kur lovot mata d’uo mi. 26Kayam ti tchi suma ablaud’a, suma ti tchazina pet a ndak á ndumba d’i. 27Aziyat ni lovot ta i ata yima azuleinid’a, ni lovot ta i avo hi matnid’a mi.
Currently Selected:
Zla d’a d’ogolâ 7: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
