Nahum 3
3
Azì ma ngol ma tchi matna, a hum wa woi á hurumba
1Ni zla d’a hohoud’a
yam azì ma ngol ma tchi mat
ma nga oîd’a ki zla d’a kad’a ki murud’umba
ma nga mi wal ki hurumba d’uo mi na.
2Gola! A nga hum tchina hi blafîna,
a nga hum tchina habo pusîna,
a nga hum tchina habo akulumei suma djangîna,
a nga hum djangâ hi pus ma dur ayîna mi.
3Suma djang akulumeina a nga i irazi avogo,
mbuguyo suma fuyogeina a nga ka akud’a,
asubiyona a nga wile,
suma a duruzi mbuleinina a nga tchuka kä didi,
mad’a suma mi sam kä
mi ndak á ndumba d’i,
suma a nga puk kä yam mad’a suma mi.
Suma Ninif-fâ a mbut zulona
4Ahle ndazina a mba ni kayam gaulang
ma ablau ma Ninif atcha d’a gaulang
nga djif heî ndata ti luma.
Ti we mboli ma led’a ki kuma matna,
ti gus andjaf suma woi ki gaulang matna,
ti gus andjaf suma woi ki mboli matna mi.
5Ma didin ma ad’engêm kal petna mi dala:
An nga ki zlad’a ki sed’egu,
an mba ni yok vun baru maka akulo woi iragu,
an mba ni arak gandilad’a woi ir andjaf suma,
an mba ni arak zulo ma’â woi ir suma kur leud’ina mi.
6An mba ni tchuguk ahle suma zozota kagu,
an mba ni mbud’uk ndjendjed’a,
an mba ni mbud’uk vama suma a golom tä na mi.
7Hina wani, suma a mba wa’â pet a mba ring abogu,
a mba dala: A b’lak wa Ninif feyo;
ni nge ba, mba mi tchi kat ke?
An mba ni fe suma a b’lengêk huru’â ni lara ge?
Vama mi mba yam Tebes-sâ, mba mi mba yam Ninif-fâ mi
8Ang azì ma ngol ma Ninif-fâ,
ang kal azì ma ngol ma Tebes-sâ ki djivid’a zu?
Mi nga kaka aduk aluma,
mbina mi nguyumu,
azì mam ma ad’eng ma ngunguna naluma mi.
9Suma Etiyopi-na ki suma Ezipte
suma a ndak á ndumba d’uo na
ni suma a ndjunuma,
suma Put-na ki suma Libi-na
ni suma a ndjunuma mi.
10Hina pet pî, a im wa magomba,
grom suma gureina,
a tchazi woi grak lovot ta lara ge pet,
a le togina yam mam suma simiyêzi mi nde yinina,
a tchuk erdjena kel mam suma nglona pet mi.
11Ang azì ma ngol ma Ninif-fâ,
ang mba gurut d’igi suma a gurut ki sümina na,
ang mba ngeya, ang mba ngei tang
abo mang suma djangûna mi.
Suma Ninif-fâ a ndak á tchol avok mazi suma djangûna d’i
12Yi mang ma ad’eng ma ngunguna mba mi mbut
ni d’igi vud’a tulum ma mi ne na na.
Ata yima a gazama,
mi ndeï kä avun sama mi min á tuma.
13Azigar mangâ a mbut ni d’igi aropma na kurungû.
Vun agre’â hambas mangina mi mal lei hotot
mi mang suma djangûna,
akud’a ti ngal wa kawei ma murguli
ma avun agrek mangîna woyo.
14Ang gul mbina yam bur ma a mba nguyungâ,
ang min yi mang ma ad’eng ma ngunguna,
ang kal kä aduk lubuna,
ang tub’ok lubu ma ab’lorina,
ang oî fürâ ki derengelâ.
15Ata yi máma akud’a mba d’i ngalangû,
mbigeu d’a fiyaka mba d’i kang ngeyo,
a mba tang d’igi abureina a tahlena na.
Suma pet a ndjoî woyo
Ar sum mangâ a zul d’igi abureina na,
ar a zul d’igi djera na mi.
16Ang zul wa mang suma mbut abozina ablaud’a
kal tchitchiu d’a akulod’a.
Azi ni d’igi djer ra ti yo hlimid’it akulo á pirid’a na.
17Mang suma nglona a ni d’igi djera na.
Mang suma nglo suma avok sumina
a ni d’igi aburei suma a kak hum azlupa
ata yima ab’lengina na.
Ata yima afata ti deîna, a pira;
sa nga mi we yima azi i kuana d’i!
B’lak ka ti ndak á minda d’uo d’a
18Ang amul ma Asiri-na,
mang suma nglo suma avok sumina a bo wa,
grang mang suma durâ a bur wa sena ki irazi fafat.
Sum mangâ a ndjoî wa woi yam ahuniyôna,
sama mi togozina nga d’i.
19Kuma ma yam mbil mangîna mi nga d’i,
mbil mangâ ni mbil ma tchang matnina,
suma pet suma a mba hum zla mangîna
a mba tchabozi ad’ung ririp.
Ni nge ma bei ang lum murud’umina ge?
Currently Selected:
Nahum 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.