Nahum 2
2
1Gola! Sama mi tchi wal zla
d’a djivi d’a b’leng nga halasina,
asem nga mi tchï akulo yam ahuniyôna.
Agi suma Juda-na, agi luwugi vun til magina,
agi ndagagi vun vama agi hlagi vunagi kama,
kayam ma asa’atna mba mi kal adigagi d’uo d’a,
a hlum wa woi ki iram fafat.
2Agi suma Ninif-fâ, gola!
Ma djangûna nga mi djï kagiya,
agi gologi azì ma ad’eng ma ngunguna,
agi tchologi ndjola avun lovota,
agi djinigi furugi ad’enga,
agi vagi tagi ad’enga ngingring mi.
3Kayam Ma didina nga mi hulong
subura mi suma hi Jakob-ma
d’igi subura hi Israel-lîd’a na,
kayam suma hurumba a hurumuzi wa ahle mazina,
a kazi abo guguzlu mazid’a woi mi.
B’laka hazì ma ngol ma Ninif-fîd’a
4Mboriyona hi grang mazi
suma djangûnina a ni hleud’a,
grang suma durâ a tchuk baru
d’a hleu d’a sisila atazi mi.
Ata yima azi nga i á durîna,
pus mazi ma dur ayîna
nga mi wile wiwilik,
a nga piget asubiyo mazina mi.
5Pus mazi ma dur ayîna nga mi djang ir palumba,
nga mi djang atogo zazak ata yina teteng,
ang golomî d’igi aku d’a boloma na,
mi djang atogo ni d’igi wiled’a halonid’a na mi.
6Amul ma Ninif-fâ nga mi yi
grang mam suma dur ayîna,
wani azi nga puk kä kur tit mazid’a.
Suma djangûna a nga b’at tazi atogo,
a i irazi abo ma ir gulumuna hazì ma ngolîna,
a tin pola iraziya.
7Vun agrek ma avun alumina mi mal leyo,
azì ma amula mi to kä woi mi.
8A ve wa alod’a,
a i wa ki sed’ed’u,
yugunei matna a nga zam tazi d’igi gugud’a na,
a nga tchabozi kuruzi mi.
9Ninif adjeu ni d’igi apo d’a ve mbina heî
d’a nga d’i wet teid’a na,
a nga dala: Agi tchologiya! Agi tchologiya!
Wani sama mi mbut iram blogoma nga d’i.
10Agi hurumugi bege d’a hapa,
agi hurumugi lora,
kayam ndjondjoî d’a bei dabid’a ti nga,
ndjondjoîd’a hahle suma guzuzi
kal tegles suma tetengâ a nga mi.
11A hurum ahlena, a b’lak ahlena,
a ar nga va tu d’i.
Vunadigazi nga d’i tumuzi hihir,
guguvazi nga mi zlak kikib’i,
ad’engêzi d’i nga d’i,
irazi d’i tchuk susub’ok mi.
Azì ma ngol ma Ninif-fâ mi ni d’igi azlo ma a kus kama na
12Azì ma ngol ma d’igi domina hazlona na na
mi mbut ni nana ge?
Ni yima azlo ma gureina mi fe te mama kuana.
Ata yima azlona mi i nduwandina,
sama ndak á mbud’um groma mandarâ kuana nga d’i.
13Azlona nga mi ve, nga mi kizak vama mi vuma
mazlod’a ki grot suma gureina,
nga mi oî domi mama ki hliwa vama mam vum
mi kizagam mbeina mi.
14Ma didin ma ad’engêm kal petna mi dala:
Ang azì ma ngol ma Ninif-fâ,
an nga ki zlad’a ki sed’engû,
an mba ni ngal pus mang ma dur ayîna woyo,
an mba ni tchi azungeî mang suma
d’igi gro azlona na na woi avun ayîna,
an mba ni d’el ahle mang suma
ang hurumuzi yam ambasina,
sa mba mi hum del mang suma
ang tchuguzi sundina d’uo d’a.
Currently Selected:
Nahum 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.