Marik 6

Suma Nazarat-na a he nga gagazid’a yam Jesus d’i

(Gol Mat 13.53-58; Luc 4.16-30)

1Jesus mi nde woi ata yi máma, mi hulong kur ambazamu. Mam suma hata a nga tit ad’um mi. 2Kid’a bur ma sabatna ndaka, mi tin ad’u á hat suma kur gong nga toka hi Juif-fîd’a. Ablau suma a huma, a le atchap, a dala: Sa máma mi fahle ndazina ni lara na ge? Mi fe ne ndata ni lara ba, nga mi lahle suma ndandal ndazina na ge? 3Ni sama tchet aguna, Marie gorotna; Jacques, Jose, Jude ki Simon ni b’oziyoma d’i? B’oziyom suma aropma a nga adigei ka hî mi d’uo zu? Kayam ndata, a golom is.

4Wani Jesus mi dazi ala: Suma a nga he ngola mi ma djok vun Alona ata yina pet, wani ni yam ambazam mba vuta aduk simiyêm ki suma avo hatama hol ba, a nga hum ngola d’i. 5Wani Jesus mi fe nga lovota á le vama ndandal kua tu d’i, wani mi tin abomî yam suma tugud’eid’a kap mbà go, mi sud’uziya. 6Mi le atchap kayam azi he nga gagazid’a kam mbi.

Jesus mi sun mam suma hat suma dogo yam mbàna mbàmbà

(Gol Mat 10.5-15; Luc 9.1-6)

Bugola, Jesus nga mi ngui tita kur azina teteng, nga mi had’azi mi. 7Mi yi mam suma hat suma dogo yam mbàna gevemu, mi nde sunuzi mbàmbà, mi hazi ad’enga á dik muzuk ma teteng ma tchona woi kur suma mi. 8Mi gad’azi ala: Agi hlagi va abogi d’i, wani agi hlagi ni totogod’a hol, agi yogi avu abogi d’i, agi yogi bud’omei abogi d’i, agi yogi beged’a kur pos magina d’uo mi. 9Agi tchugugi atuguruna asegiya, wani agi tchugugi barud’a atagi mbàmbà d’uo mi.

10Mi dazi kua ala: Ata yima agi kalagi kur azì ma ngolîna, sama agi kagagi avo hatama, agi kagagi kua gak i magid’a mbeî. 11Ata yima lara pet ma azi vagi nga atazi d’uo a humugi nga d’uo mi na ni, ata yima agi buzugugi woi abuna, agi pogi guguma hur asegina woyo. Gugum máma mba mi arî vama glangâsâ kaziya.

12Mam suma hata a iya, a nga tchi wala mi suma ala: Agi mbud’ugi hurugi yam tcho magid’a. 13A dik muzuk ma tchona ablaud’a woi kur suma, a vo mbulâ yam suma tugud’eid’a ablaud’a, a sud’uzi mi.

Matna hi Jean ma le suma batembina

(Gol Mat 14.1-12; Luc 9.7-9)

14Kur bur máma amulâ Herot mi hum zla Jesus, kayam zlam nde ata yina pet. Suma dingâ a nga dala: Ni Jean ma le suma batemba ba, mi tchol akulo aduk suma matna. Ni kayam ndata ba, mi nga kad’enga á lahle suma ndandalâ wana. 15Wani suma dingâ a nga dala: Ni Elie. Suma dingâ a nga dala: Ni ma djok vun Alona tu d’igi ma dingâ aduk suma djok vun Alona adjeuna na.

16Wani kid’a Herot mi hum zla ndatid’a, mi dala: Ni Jean ma an ngad’am yama ba, mi tchol akulo aduk suma matna! 17Kayam adjeu Herot tamba mi ve Jean, mi djinim mi gum dangeina kayam Herodiyas atchad’a hi wiyema Filip pa mi vata. 18Kayam Jean mi dum teteu ala: Gat meid’a ti arang nga lovota á ve atchad’a hi wiyengîd’a d’i. 19Herodiyas ti ve Jean kurud’u, ti hal á tchumu, wani ti fe nga lovota d’i, 20kayam Herot nga mi le mandara Jean, kayam mi wumu, ni sama d’ingêrâ, ni ma yed’etna mi. Mi ngomom djivid’a. Ata yima Herot mi hum zla mambina, nga mi djib’er kat ngola, nga mi humum ki furîd’a mi.

21Bur ma Herodiyas ti fe lovotina, ni bur ma Herot bur mam ma vuta nda’â. Mi yi mam suma nglona azi ki nglo suma dur ayîna ki suma nglo suma Galile-na ata te ma luna. 22Herodiyas gorota ti kal kur yima luna, nga d’i lü ndjongâ. Herot tam mbi lum djivid’a heî yam ndjong matna, zlapa ki suma a nga kak kä ki sed’ema mi. Wani amulâ Herot mi de mi gora ala: Vama ndak minima, ndak tchenenu, an haksiya. 23Mi gunut tam ala: Ndak le tchenen ni me pî, an haksiya; le nabo leu manda pî an haksiya.

24Ti ndabua, ti i de masut ala: An tchen ni me ge?

Ti dat ala: Mi ngad’a’î yam Jean ma le suma batemba.

25Atogo hina zak, ti hulong ki b’ata gen amulâ, ti tchenem ala: An min ang ngad’anï yam Jean ma le suma batemba kur tazana ka tchetchem.

26Amulâ hurum b’lak ngola heî, wani mi fe lovota á d’elet tuo d’a, kayam gun nda mi gun tam avok suma mi yazï ata yima tenina. 27Atogo hina zak, amulâ mi sun azigar ma ndjola, mi hum vuna ala mi i ngad’ï yam Jean ma le suma batemba. 28Azigarâ mi iya, mi ngad’ï yam Jean kur dangeina, mi mba ki yamba kur tazana, mi he mi gora, gora i he masud’u. 29Kid’a suma hata hi Jean-na a hum zla ndatid’a, a mba, a hlum mad’amu, a i tozomu.

Jesus mi hop suma dudubud’a vahl ki tena

(Gol Mat 14.13-21; Luc 9.10-17; Jn 6.1-14)

30Suma a sunuzina a togï gen Jesus, a dum ad’u ahlena pet suma azi lazina ki hat ta azi hat sumid’a mi. 31Mi dazi ala: Agi mbeyegïya, agi hud’ugi woi abo tu hur fulâ ata yima sa nga kua d’uo na, tugugi tagi ndjö kayam suma a nga mba na, suma a nga i na. Kayam ndata, azi fe nga yina á te tena d’i. 32A i tchuk kur alumba, a i woi abo tu hur fulâ ata yima sa nga kua d’uo na. 33Ablau suma a we i mazi d’a azi nga id’a. Suma kur azì ma nglona pet a tchol ringâ kaseziya, a mbaza avorozi ata yima azi nga i kuana.

34Kid’a Jesus mi nde woi kur alumbid’a, mi wablau suma ngola. Hurum hat kaziya, kayam azi ni d’igi tumiyô suma bei salazi ma pola ba na na. Mi nde mi had’azi ahlena ngola.

35Kid’a afata ar go á nikid’a, mam suma hata a hut gevem a dum ala: Ei ka hî nabageya, yina kal wa da’. 36Ang arazi iya, kayam azi i kur azì ma kel ma nga nguid’ina, azi i gus te mazina.

37Jesus mi hulong dazi ala: Agi tagid’a ba, hazi tena.

Wani azi dum ala: Ami i guzumi tena ir bege d’a hapa kikis mbà á hazi á te zu?

38Mi hulong dazi ala: Avungôna nga abogi ni ga ge? I gologizi go.

Azi i golomu, a dala: Nga ni vahl ki kulufâ mbà mi.

39Jesus mi hazi vuna ala: Ar suma a kak kä pet adesâ adesâ, yam asu ma ngloma. 40A kak kä ndjara kis kis ki suma dingâ dok vahl dok vahl. 41Mi yo avungô ma vahlâ ki kuluf ma mbàna, mi hle iram akulo, mi le mersi mAlona kamu, mi mbrugum kä, mi hum mi mam suma hata á b’rawam mi suma, mi b’rawazi kuluf ma mbàna adigazi pet mi.

42Azi pet a te, a hoba. 43Mam suma hata a tar avungôna ad’um mba ara, ti oî gumud’a dogo yam mbà ki kuluf ma arâ mi. 44Azi suma a tavungônina andjuveina a ni dudubud’a vahl.

Jesus mi tit yam mbina

(Gol Mat 14.22-33; Jn 6.15-21)

45Ata yi máma na wat, Jesus mi sek mam suma hata ped’et ala a tchuk kur alumba, a i avogom abo woi hî gak Betsaida, kayam mam tamba mi tin ablau suma woi ta tua. 46Bugol la mi tin ablau suma woi ta d’a, mi djak akulo yam ahinad’a á tchen Alona. 47Kid’a afata nik dad’a, alumba nga aduk apod’a, Jesus ni vam tu del gongôd’id’a mi. 48Mi wazi a nga fe ndaka heî ki prauna ata alumba, kayam simetna nga mi lazi heî. Ki vun pipira mi nga mi iza geveziya, nga mi tit yam mbiyo apod’a. Mi le d’igi mi kalî gevezi na. 49Wani kid’a azi wum nga mi tit yam mbiyo apod’id’a, azi djib’er kuruzi ala nangusa, a er ad’uzi tchina akulo, 50kayam me azi pet a wumu, huruzi ka mbina mi. Ata yi máma na wat, Jesus mi dazi ala: Agi vagi tagiya, ni anu, agi lagi mandar ri.

51Mi djak gevezi kur alumba, simetna mi tchol b’et mi. Wani vunadigazi d’i pat fek, 52kayam azi we nga ad’u vama le kavungô mámina d’i, kayam we mazid’a ndak nga á väd’u zla ndata kazi d’i.

Jesus mi sut suma tugud’ei suma Jenesaret-na

(Gol Mat 14.34-36)

53Kid’a Jesus azi ki mam suma hata a djak sä woi abo hid’a, a mbaza yam andaga d’a Jenesaret-ta, a djin alumba kä. 54Kid’a azi tchuk asezi woi kur alumbid’a, suma a we atogo hina zak ala ni Jesus. 55Suma kur ambas ndatina a wet ringâ pet, a yoï suma tugud’eid’a ki zlod’ei mazina ata yima lara pet ma azi hum ala mi nga kua na. 56Ata yima lara pet ma nga mi kal kuana, kur azì ma nglona, azì ma gureina kazì ma kelâ pet, suma a nga tchuk suma tugud’eid’a ad’u su’â kä, a nga tchenem ala mi arazi a domî vun baru mamba go. Suma pet suma a dotna a tchol akulo woi kur tugud’ei mazid’a.

Currently Selected:

Marik 6: BA

Highlight

Copy