Marik 5

Jesus mi dik muzuk ma tchona ablaud’a woi kur sana

(Gol Mat 8.28-34; Luc 8.26-39)

1Jesus azi ki mam suma hata a mbaza abo apo d’a Galile-d’a woi hî kur ambas sa Gerazen-nda. 2Ata yima Jesus mi tchuk asem mbei kur alumbina, atogo hina zak sama nga ki muzuk ma tchona kuruma, mi ndeï woi kur angra asud’a, mi ngavamu. 3Yam ma kaka nangra asud’a. Sa nga kad’enga á djinim mbi, le ni ki kindjingâ pî sa ndak á djinim mbi. 4Burâ ki burâ a nga gum aleina asemu, a djinim ki kindjingâ mi. Hina pî mi wilet kindjingâ woyo, mi kus aleina woi tchatchahl, sana mi ndak á kuzum vunam kä d’uo mi. 5Burâ ki burâ, andjege ki faleya, aduk asud’a ki yam ahuniyôna akulo, nga mi er ad’um tchina akulo, nga mi grik tam kahinad’a.

6Kid’a mi we Jesus ei deid’a, mi ringâ, mi ge tam kä avoromu, 7mi er ad’um tchina akulo ala: Vama mi ndolong ki sed’en ni me ge? Jesus Alo ma sä akulo ma kal teglesâ Goroma, an nga ni tcheneng ki simiyê Alona, ang lan ndaka d’i. 8Mi de hina kayam me Jesus mi dum avok ala: Muzuk ma tchona, ang nde woi kur sa máma.

9Jesus mi djobom ala: Simiyêng ana?

Mi hulong dum ala: Simiyên ala Bumî, nala, ami nablaud’a. 10Mi tchenem ngola ala ar mi digizi woi abu kur ambasa d’i.

11Kozongâ ablaud’a mi nga mola, nga mi te hatna ata yima ndingâ. 12Muzuk ma tchona ablaud’a mi tchen Jesus ki labiyad’a ala: Ang sunumi aduk kozong ndazina, arami ami tchugum kuruziya. 13Jesus mi aram lovota. Muzuk ma tcho máma mi nde woi kur sa máma, mi tchuk kur kozong máma. Ablaud’a hi kozongîd’a ni d’igi dudubud’a mbà na, a wet djangâ ndif, a sulugod’ï kä woi yam yima ndingâ, a tchuk kä kur apod’a, a tche mbina, a bo woyo.

14Suma a nga pol kozongîna a ringâ, a i wet zla ndata woi kur azì ma ngolâ kazì ma kelâ mi. Suma a buzuk kei abu á we vama lena. 15Azi mbeï gen Jesus, a we sama nga ki muzuk ma tchona kurum adjeuna mi nga kaka kä ki barud’a atamu, iram sik mi. Ni mam ma nga ki muzuk ma Bumî-na adjeuna. Azi le mandarâ ngola. 16Suma a wahle ndazinina, a nga dazi ahle suma a lena ki sama nga ki muzuk ma tchona kurum adjeuna ki vama le ki kozongîna mi. 17Hina wani, azi nde tchen Jesus ala mi nde woi yam andaga mazid’a.

18Kid’a Jesus mi djak kur alumbid’a, sama nga ki muzuk ma tchona kurum adjeuna, mi tchenem ala mi aram á kak ki sed’emu. 19Wani Jesus mi aram mbi, wani mi dum ala: Ang i avo hatang gen simiyêngû, ang vazi ad’u ahle suma Salangâ mi lazi ki sed’engâ, ni nana ba, mi wang hohowong ge. 20Mam pî mi tchol mi iya, mi nde tchi wala kur Azì ma nglo ma dogona yam ahle suma Jesus mi lazi ki sed’ema. Suma pet a le atchap.

Gor ra atchad’a katcha d’a do vun baruna hi Jesus-nid’a

(Gol Mat 9.18-26; Luc 8.40-56)

21Kid’a Jesus mi hulong djak sä woi abo hî kalumbid’a, ablau suma a togï gevemu. Mi nga tchola avun apod’a. 22Sana tu aduk suma nglo suma a gol gong nga toka hi Juif-fîd’ina, simiyêm ala Jairus, mi mba, mi we Jesus, mi ge tam kä avoromu. 23Nga mi tchenem ngola ala: Goron nda gora nga d’i le ná matna. Ang mbeï tin abong kad’u, ar ti tchol akulo, ar ti mit ti. 24Jesus mi i ki sed’emu. Ablau suma ngola a nga tit ad’umu, a hebem mi.

25Atcha d’a nga ki tugud’ei d’a djang buzunid’a ti nga, ti le bizad’a ki sed’et ni dogo yam mbà. 26Ti i dokdorâ yat ablaud’a, ti b’lak bege mata woi pet. Hina pî, buzu mat ma djangâ mi ka nga d’i, wani tugud’ei mata nga d’i it avogovogo. 27Kid’a ti hum zla Jesus-d’a, ti mba, ti kalï aduk ablau suma bugol ti dom baru mama, 28kayam ti de kurut ala: An le domî baru mama hina go pî ni, tugud’ei manda mba d’i aranu. 29Ata yi máma na wat, buzu matna ka mi, ti we atat tcha ala tugud’ei mata ti arat da’.

30Ata yi máma na wat, Jesus mi we atam tcha ala ad’enga tu nde woi atamu. Mi mbut iram aduk ablau suma, mi dala: Sama don baru mana ni nge ge?

31Mam suma hata a dum ala: Ang we ko ala ablau suma hebengû. Ni nana ba, ang djop ala: Sama don ni nge ge ge?

32Wani Jesus mi pret tam mi golä, kayam mi min we sama mi le va mamina. 33Wani atcha ndata ti le mandarâ, nga d’i zlak mi, kayam ti we vama le atatna. Ti mba, ti ge tat kä avoromu, ti dum ahlena pet suma a latna. 34Wani Jesus mi dat ala: Goronda, he gagazi maka sud’uk wa da’. Ndak i lafiya, ndak wal lei ki ndak maka da mi.

35Kid’a Jesus nga mi de zlad’a tua d’a, suma avo hi ma ngolâ hi gong nga toka hi Juif-fîd’ina a mbeï a de mi ma ngolâ ala: Goronga ti mit wa. Ni kayam me ba, ang dok kau ma hat suma d’ei ge?

36Wani kid’a Jesus mi hum zla mazi d’a ded’id’a, mi tin humam kat ti, mi de mi ma ngol máma ala: Ang le gigrit ti, ang he ni gagazid’a d’ö. 37Mi ar nga sama ding mi i ki sed’em mbi, wani ni Pierre azi ki Jacques ki wiyema Jean hol.

38Kid’a azi mbaza avo hi ma ngol mámid’a, Jesus mi hum siwela ki tchina ki wulul la ngola gandjau. 39Ata yima mi kal avona, mi dazi ala: Ni kayam me ba, agi siwelegi ki tchina hina gandjau ge? Gora ti mit nga d’i, wani ti burî sena. 40Azi nde lazamu, wani mi digizi woi abu pet, mi yo gora abut azi kasut ki suma a nga ki sed’ema, a kal ata yima gora nga kuana.

41Mi vat abod’u, mi dat ala: Talita kumi, nala, Gora, an nga ni dagu, ndak tchol akulo. 42Atogo hina zak, gora ti tchol akulo, nga d’i tid’a. Gor ndata bizat ni dogo yam mbà. Ata yi máma na wat, suma pet a le atchap ngola. 43Jesus mi gad’azi kad’enga ala: Ar sa mi we zla ndata d’i. Mi dazi ala a hat tena mi.

Currently Selected:

Marik 5: BA

Highlight

Copy