Sunda hi suma hi Levi-nid’a 24
24
Agu ma tin lalamba kama
1Ma didina mi de mi Moise kua ala: 2Ang he vuna mi Israel-lâ ala a mbang ki mbul olif ma d’igila hirwilingâ yam agu lalamba á ngal ki lalamba teteu. 3Ar Aron mi tinit bugol baru d’a ka ir ra ka ir zanduk ma glangâs ma kur zlub’u d’a ngaf tad’ina tala ti ngal burâ ki burâ avogon an Ma didina d’a, tin ad’ud’a fladege dei gak yorogo. Wana ni gat ta didin nda yam andjavagid’a. 4Mi ndjar lalamba akulo yam agu lalam ma a lum ki lora bei zozota ba d’a tala ti ngal avogon an Ma didina burâ ki burâ d’a.
Avungô ma a hum mAlonina
5Ma didina mi de mi Moise kua ala: Ang yo afut ta adiged’id’a, ang gavungôna dogo yam mbà. Avungô ma lara pî afut mamba ni kilona karagaya karagaya. 6Ang ndjaram djirdid’a mbà, djirdi d’a lara pî ang tin avungôna kua karagaya karagaya. Ang tinim yam tabul ma lor ma bei zozota ba na avogon an Ma didina. 7Ang vo dubang ma his djivid’a ma d’igila hirwilingâ yam djirdi d’a lara ge. Dubang máma mi mbut ni vama ge humba d’igi he d’a hawa d’a ngala na avogon an Ma didina.
8Kur bur ma sabat ma lara pî azi ndjar avungôna avogon an Ma didina teteu. Wana ni vun ma djin ma didin ma yam agi Israel-lîna. 9Avungô máma mba mi arî mi Aron azi ki groma. Azi mba tum ata yima tu ma a tinim iram vama. Mba mi mbut ni he mazi d’a hawa d’a kal tegles sa aduk ahle suma azi ngalazi avogon an Ma didinina. Wana ni gat ta didinda.
A ngop sama mi las Alona
10Gor ma Ezipte ma asumî d’a Israel-lina, mi nga aduk Israel-lâ kur kangâ. Huneîd’a tchol adigazi ki ma Israel-lâ. 11Ma abumî ma Ezipte-nina mi las simiyê Alona, mi ngulum mi. A mbamî mi Moise. Asum a yat ala Selomit ni Dibri ma ad’u andjafâ hi Dan-nina goromba. 12A hum abo sama ngomba á djup zla d’a Ma didina mi dat kamba.
13Ma didina mi de mi Moise ala: 14Ang nde ki ma lazan simiyên máma woi kur kangâ. Suma a hum ngul ndata ki humazina a tin abozi kamu, ablau suma pet a durum kahinad’a, a tchumu. 15Ang i de mi Israel-lâ ala: Sama lara ma mi ngul Alo mamina, mba mi zi aneka hi tcho mambid’a kamu. 16Sama mi lazan simiyêna, ablau suma a durum kahinad’a, a tchum mbeyo. Le nangeina d’oze gor vuta pî, a tchum mbeyo, kayamba mi lazan an Alona simiyênda.
17Sama mi tchi sanina, a tchum mbei mi. 18Sama mi tchi d’uwarîna, mi he d’uwarâ balumu.
19Le sana mi ka ndrama mbilâ ni, a kam mbilâ d’igi mam ka ndrama na mi. 20Le sana mi kus ndrama asemu ni, a kuzum mama mi. Sama tcho ndrama irama a tchom mamba mi. Sama mi kus ndrama siyam mbeina, a kuzum mama woi mi. A kam mbilâ d’igi mam ka ndrama hina dedege mi.
21Sama tchi d’uwarîna mi he d’uwarâ balumu, wani sama mi tchi sanina, agi tchum mbeyo.
22Gat ndata ni yam angeina, yam gor vut ta Israel-la mi, kayam an ni Ma didina Alo magina.
23Moise mi de mi Israel-lâ ala a nde woi ki sama ngul Alona máma kur kangâ, a durum kahinad’a, a tchumu. Israel-lâ a le d’igi Ma didina mi hazi vuna avun Moise na.
Currently Selected:
Sunda hi suma hi Levi-nid’a 24: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
