Sunda hi suma hi Levi-nid’a 23
23
1Ma didina mi de mi Moise kua ala: 2Ang i de mi Israel-lâ ala:
Fata agi mba tchagi wala yam vun til manid’a, agi mba togogi ni tok ka a tinit irat vata á kud’uronu.
3Agi mba lagi sunda burâ karagaya, wani bur ma kid’iziyana ni bur ma sabat ma tuk tad’a. Agi togogi tok ka a tinit irat vata. Ata yima lara ma agi mba kagagi kuana, agi lagi sunda kur bur máma d’i, kayam ni bur ma sabatna hi an Ma didinina.
(b) Pa’â kavungô ma bei angufina
4Ma didina mi de kua ala: Wana ni vun til ma tetengâ hi an Ma didinina ki tok ka a tinit irat vat ta agi mba tchazi walazi woi kur bur ma an ngamina:
5Kur bur ma dogo yam fid’ina hi til ma avo’îna ki fladeged’a ni vun til ma Pa’â á kud’uron an Ma didina.
6Kur bur ma dogo yam vahlâ hi til mámina ni vun til ma a lum kavungô ma bei angufa á kud’uron an Ma didinina. Agi tagi avungô ma a lum bei angufina gak burâ kid’iziya. 7Kur bur ma avo’â agi mba togogi tok ka a tinit irat vata á kud’uronu. Ar agi lagi sun nda kaud’a kur bur máma d’i. 8Agi hagi ahle suma ngat buzu suma ngala mi an Ma didina gak burâ kid’iziya. Kur bur ma kid’iziya máma agi togogi tok ka a tinit irat vata á kud’uronu. Agi lagi sun nda kaud’a kur ri.
(c) Vun til ma yam awu ma ne avo’îna
9Ma didina mi de mi Moise kua ala: 10Ang i de mi Israel-lâ ala:
Fata agi kalagi kur ambas sa an nga ni hagizid’a, ata yima agi mba dud’ugi awunina, agi kagi yam awu magi ma ne avo’â mi ma ngat buzuna. 11Ma ngat buzu máma mi gas yam awu máma akulo avogon an Ma didina, kayam an vum abogiya. Mi gazam akulo ni bugol bur ma sabatna. 12Kur bur ma agi hagi yam awuna á gazam akulona, agi hagi gor timi ma bizam tu ma bei dakina he d’a hawa d’a ngala mi an Ma didina 13zlapa ki he d’a hawa d’a afut ta adiged’i d’a a tib’eget ki mbulîd’a ir kilona karagaya he d’a hawa d’a ngal la his sa afufuî d’a avogon an Ma didinid’a zlapa ki süm guguzlud’a lidirâ tu ki nusa mi. 14Agi tagi avungôna d’oze yam awu ma haûd’a d’oze awu ma awilina d’i, gak bur ma agi mban ki he d’a hawa d’a ngala mi an Alo maginina tua. Gat ndata ti arî gat ta didinda yam andjavagi ata yima agi mba kagagi kuana.
(d) Vun til ma dut awuna
15Ma didina mi de mi Moise kua ala: Ndjivin bugol bur ma sabat ma agi mba mbagi ki yam awuna á gazam akulona, agi ndumugi dimasa ndundum kid’iziya, 16nala, burâ dok vahl. Bugol dimas sa kid’iziyad’a, agi hagi he d’a hawa d’a dinga. 17Agi tchologï avo hatagi kavungô ma a lum kafut ta adiged’id’ina ir kilona hindi ma a yum kangufina abogi mbà mbà á gazam akulo. Wana nahle suma avo’â hi an Ma didinina. 18Agi tinigi yam avungô máma tumiyô suma bizazi tutu suma bei dakina kid’iziya kamuhl ma azongâ tu ki gamlâna mbà mi. Agi hazi he d’a hawa d’a ngala mi an Ma didina, zlapa ki he d’a hawa d’a süm guguzlu d’a he d’a hawa d’a ngal la his sa afufuî d’a avogon an Ma didinid’a. 19Agi hagi mbekmberena vama ngat buzu ma zlup yam tchod’a ki tumiyô suma bizazi tutuna mbà vama ngat buzu ma zlap darigïd’a mi. 20Ma ngat buzuna mi gazazi akulo zlapa kavungôna hawu ma ne avo’â ki tumiyô suma mbàna, mi tinizi irazi vazi mi an Ma didina; a arî mama. 21Kur bur máma agi tchagi wala yam tok ka a tinit irat vata. Agi lagi sun nda kaud’a kur bur máma d’i. Wana ni gat ta didinda yam andjavagi ata yima lara ge pet ma agi mba kagagi kuana.
22Fata agi mba dud’ugi awu maginid’a, agi aragi apei asine magina kä bei duta nde nde, agi varagi awu ma yak kä blogogina d’i. Agi aragizi mi suma houd’a kangoyogeina, kayam an ni Ma didina Alo magina.
(e) Bur ma ge hum ma furîd’a
23Ma didina mi de mi Moise kua ala: 24Ang i de mi Israel-lâ ala:
Kur bur ma avo’â hi til ma kid’iziyanina, ni bur ma agi mba lagi vun tilâ kuana, ni bur ma agi mba gagi humba kadif fa bud’a kuana mi. Ni tok ka a tinit irat vat á kud’uronda. 25Agi lagi sun nda kaud’a kur ri, agi hagi ahle suma ngat buzu suma ngala mi an Ma didina kua.
(f) Bur ma ngol ma a zlup yam tchod’a kuana
26Ma didina mi de mi Moise kua ala: 27Kur bur ma dogona hi til ma kid’iziya mámina, ni bur ma a zlup yam tchod’a kuana. Agi togogi tok ka a tinit irat vata á kud’uronu, agi mbud’ugi tagi hohoud’a, agi hagi ahle suma ngat buzu suma ngala mi an Ma didina. 28Agi lagi sunda kur bur máma d’i, kayam ni bur ma a zlup yam tchod’a kuana, ni bur ma mbeî a zlup yam tcho magid’a avogon an Ma didina Alo maginina. 29Sama lara ma mbut nga tam hohoud’a kur bur máma d’uo na, a mba pad’am mbei aduk sum mama. 30Sama lara ma mi le sun nda lara kur bur mámina, an mba ni bam mbei aduk sum mama.
31Agi lagi sun kur bur máma tu d’i. Wana ni gat ta didin nda yam andjavagi kur atchogoi d’a lara ge pet ata yima agi mba kagagi kuana. 32Bur máma mba mi mbut ni bur ma sabat ma agi mba tugugi tagi kuana. Agi mbud’ugi tagi hohoud’a, agi lagi vun til ma sabat magina kur fladeged’a hi bur ma zlengîna hi til mámina gak fladeged’a avinda.
(g) Vun til ma yam zlub’u d’a tetengina
33Ma didina mi de mi Moise kua ala: 34Ang i de mi Israel-lâ ala:
Kur bur ma dogo yam vahlâ hi til ma kid’iziya máma, agi lagi vun til ma zlub’ud’a á suburun an Ma didina gak burâ kid’iziya. 35Kur bur ma avo’â agi mba togogi tok ka a tinit irat vata, agi lagi sun nda kaud’a kur bur máma d’i. 36Agi hagi ahle suma ngat buzu suma ngala mi an Ma didina gak burâ kid’iziya. Kur bur ma klavandina, agi togogi tok ka a tinit irat vata, agi hagi ahle suma ngat buzu suma ngala mi an Ma didina. Bur máma mba mi mbut ni bur ma agi togogi tok ka ngol la a tinit irat vat zenenda; agi lagi sun nda kaud’a kur bur máma d’i.
37Wana ni vun til mana ki tok ka a tinit irat vata. Agi tchagi wala a han he d’a hawa d’a ngala, d’a afuta, d’a ngat buzuna, d’a hi süm guguzlud’id’a, nala, he d’a hawa d’a lara ge pet kur bur ma an ngama, 38zlapa ki bur man ma sabat ma lara ge pet, he d’a hawa magid’a ki vun magi ma hled’a, zlapa ki he d’a hawa d’a lara ge d’a agi handji kur min magid’id’a.
39Kur bur ma dogo yam vahlâ hi til ma kid’iziyanina, fata agi dud’ugi ahle suma agi zumuzi yam ambasina, agi lagi vun tilâ á kud’uron an Ma didina gak burâ kid’iziya. Bur ma avo’â mba mi mbut ni bur ma tuk tad’a, bur ma klavandi ma bugol vun tilîna ni bur ma sabat ma tuk tad’a mi. 40Kur bur ma avok máma agi yogi vud’agu ma djivina kabo amulongeîna kabo agu ma d’ufa kabo da’ara mi. Agi lagi furîd’a avogon an Ma didina gak burâ kid’iziya. 41Agi lagi vun til máma avogon an Ma didina kur biza d’a lara ge pet burâ kid’iziya kid’iziya. Wana ni gat ta didin nda kagi kur atchogoi d’a lara ge peta: Agi lagizi ni kur til ma kid’iziyana. 42Agi gro vut ta Israel-la pet, agi kagagi kur zlub’ud’a gak burâ kid’iziya, 43kayam andjavagi ma bugolâ mi wala ata yima an buzugugï woi yam ambas sa Ezipte-d’ina, ni kagagi ni kur zlub’ud’a. An ni Ma didina Alo magina.
44Ni hina ba, Moise mi de zlad’a mi Israel-lâ yam vun tilâ hi Ma didinina teteng.
Currently Selected:
Sunda hi suma hi Levi-nid’a 23: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
