Job 27
27
Job mi de kua ala: Sama tchona mba mi yAlona zu?
1Job nga mi i avok ki zla mamba mi dala:
2Alona ni Ma bei matna, ni mam ba, mi noî á kan sariya manda,
ni Ma ad’engêm kal petna ba, mi b’lagan muzuganu.
3Ata yima an nga ni fona,
ata yima muzuka hAlonid’a ti nga atchinan tua na,
4an mba ni de zla d’a ata yat tuo d’a ki vunan ndi,
an mba ni de zla d’a aboina ki sinan nduo mi.
5An nga ki lovotid’a ni dala zla magid’a nata yad’u d’a d’i.
Gak an mit pî, an mba ni väd’u zla manda á pat zlad’a woi kanu.
6An tcholî yam d’ingêr manda,
an nga ni ar tan tchuk lus si,
hurun nga mi van ki zla yam tu d’uo mi.
*
7Ar man ma djangûna, mi mbut sama asa’atna!
Ar ma tchol huneîd’a ki sed’ena, mi mbut sama batrangâ!
8Tin hurâ hi sama tchonina ni me
ata yima Alona mi kam ziyom
mi hlum muzugam ge?
9Alona mba mi humum tchi mama
ata yima ndaka mba kama zu?
10Na ni mba mi le furî d’a ngola
yam Alo ma ad’engêm kal petna zu?
Mba mi yum teteu mi zu?
11An nga ni had’agi yam sib’ika hAlonid’a,
an mba ni dagi woi yam nga hurâ hi Ma ad’engêm kal petnina.
12Wani agi tagi pet, agi wagi ad’ud’a.
Ni kayam me ba, agi igi bugol zla d’a hawa yaka ge?
Fe d’a kal leid’a#27.13-23: Suma hiuna a djib’er ala ni zla d’a ded’a hi Sofar-ra.
13Wana ni b’rau d’a Alona mba mi hat mi sama asa’atnid’a,
ni djo ma Ma ad’engêm kal petna mba mi humî sama murud’umbina mi.
14Le mi nga ki grona ablaud’a pî,
a mba dabazi woi tchid’a ki mbigeu d’a fiyaka avun ayîna,
groma a mba hop ki tena d’uo mi.
15Mam suma a arâ tugud’ei d’a tcho d’a tchi matna mba d’i dabazi woyo,
arop mazi suma a ar modonod’ina a mba tchizi horozi d’i.
16Le mi tok bege d’a hapa d’igi andaga d’a gugud’upa na,
le mi mol baruna d’igi lubu ma ab’lorina na pî,
17mba mi molom kä, wani ma d’ingêrâ mba mi tchugum atamî mamu,
suma zla nga kazi d’uo na a mba b’rau bege d’a hapa aduk tazi ni azi mi.
*
18Mi min aziyamî d’igi ma hi vivingîna na,
d’igi guruna hi sama mi ngom asinenina na.
19Nga mi bur kä ki ndjondjoî mamba,
wani nga mi tchol akulo ki sed’et ti;
mi mal iram mbei wani va nga d’i.
20Mandarâ mba mi vum atogo d’igi mbiyo ma kusa na,
mbirlimba mba d’i hlum andjege dangâla.
21Simet ma abo ma yorogona mba mi hlum mi i ki sed’emu,
mba mi hlum mbei kad’enga ata yima mam nga kuana.
22A mba yed’em ki yeûd’a bei wum hohowomu,
mam mba mi ring á sut tam abod’u.
23A mba tchabozi yam zla mamba,
a mba yi tazi ki feta kam ata yima mam nga kuana.
Currently Selected:
Job 27: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
