Job 26
26
Job mi de kua ala: Ni ndjuna me d’a yâ d’a na ge?
1Job mi de kua ala:
2D’igi ang we lovot ta djivid’a á ndjun sama amangeîna na!
D’igi ang we lovota á sut sama ad’engêm nga d’uo na na mi!
3Ni d’al la me ma djivina ba,
ang dum mi sama mi ne nga d’uo na ge?
Ni ne d’a zul heî d’a lara ba,
ang tagamzi woi mi ge?
4Ang de zla mang ndata ni me nge ge?
Ni muzu’â hi nge na ba, mi zud’ung á de zla ndata na ge?
Ad’enga ni hAlonid’a tu#26.5-14: Suma hiuna a djib’er ala ni zla d’a ded’a hi Bildat-ta.
5Avok Alona suma azuleina a nga zlak kä ad’u mbina
kur yi mazi ma kaka.
6Yima azuleina ni woi pid’ak iramu;
zul la yiyik ka suma a ba woi kuad’a,
ti nga ngeid’a iram mbuo mi.
7Mi bar abo ma norâ yam yima kikid’i’â,
mi gang andagad’a akulo yam yima va nga kua d’uo na mi.
8Mi duk nga mbina aduk d’ugul mamba,
d’ugula ti ndak á tcho abo aneka hi mbiyo mamid’a d’i.
9Mi zlup ahlena woi ir b’od’a hi tilâ d’a ndindinga,
mi bar d’ugul mamba woi iram mi.
*
10Mi ngui nga yina akulo yam mbina
d’igi haga d’a aduk b’od’a ki nduvundid’a na.
11Grak ka akulo d’a ti nga tinda kata nga d’i giged’a,
ti nga d’i le atchap abo ngop mamba.
12Kad’eng mamba nga mi tcha alum ma ngolâ tata,
ki ne mamba mi kus yam ambur ma a yum ala Rahap-ma na.
13Ki fo d’a avunamba mi tor akulod’a woi d’id’ingîr,
mi tchok gugui ma nga mi djangâ kabomu.
14Wana ni sun mamba vunat ma akid’eina;
ei humut ni hina nde nde wü d’a.
Wani ni nge ba, mi ndak á wäd’u breîd’a hi sib’ik mambid’a ge?
Currently Selected:
Job 26: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
