Jeremi 46
46
JEREMI MI DJOK VUNA YAM ANDJAF SUMA DINGÂ
(46—51)
1Wana ni zla d’a Ma didina mi dat mi ma djok vun Alona Jeremi yam andjaf sumid’a:
A kus yam Ezipte-na avo Karkemis
2Wana ni zla d’a Ma didina mi dat yam Ezipte-na, yam azigar suma hi Faron Neko amul ma Ezipte ma mi nga kaka avun alum ma Efrat-na avo Karkemis-sâ. Ni kua ba, Nebukanezar amul ma Babilon-na mi kus kamu, ni kur biza d’a fid’i d’a Jojakim Josiyas goroma nga mi tamula yam suma Juda-nid’a.
3Azigar suma nglona a he vuna ala:
Agi yogi mboriyo suma gureina ki mboriyo suma nglona,
agi igi á dur ayîna!
4Agi zlubugi akulumeina!
Agi suma djang akulumeina, ngagi kaziya!
Azigarâ, agi kulubugi djum magid’a kagiya!
Agi gurugi sï asubiyo magina,
agi tchugugi kongrongâ atagi mi!
5Ma didina mi de kua ala:
Ni kayam me ba, an wazi a nga zlak ke?
A dadak kazigaziya.
Mazi suma gangrang suma durâ a tchuk susub’ok.
A hazigaziya, a nga ring bei mbut irazi blogozi ba.
Mandarâ mi vazi ata yina pet.
6Ma mi ring heîna mi ndak á ring ngi,
ma gangrangâ mi ndak á sut tam mbuo mi.
Ar asezi mi kazlard’eid’a.
A puk kä abo ma norâ avun alum ma Efrat-na.
7Ni nge ba, mi hop akulo d’igi alum ma Nil
ma mbiyom nga mi sulul lei
d’igi alum ma djangâ na na ge?
8Ni suma Ezipte-na ba,
a nga hop akulo d’igi mbiyo alum ma Nil
ma nga mi sulul lei
d’igi alum ma djangâ na na.
A nga dala: Ami mba hobomi akulo,
ami mba hlubumi andagad’a kä,
ami mba b’lagami azì ma nglona woi ki suma kuruma mi.
9Agi akulumeina, agi igiya!
Agi pus ma dur ayîna, agi djangâgi atogo zazak!
Ar suma gangrangâ a buzuga!
Agi suma Etiyopi-na ki suma Put suma wagi mbareid’a durîna,
agi suma Lut suma wagi yet yeûd’ina, agi igiya!
10Wani bur máma ni burâ hi an Salad’a
Ma didin ma ad’engên kal petna.
Ni bur ma an mba ni sä atchugulun
ki man suma djangûnina.
Mbigeu d’a fiyaka mba d’i kizak suma
gak ti ndak vat ndak,
mba d’i tchazi buzuwazi mi,
kayam an Salad’a Ma didin ma ad’engên kal petna,
ni ngad’azi ni d’igi vama ngat buzuna na
yam ambas sa abo ma norâ d’a avun alum ma Efrat-nid’a.
11Ndak gor wei d’a Ezipte-d’a,
ndak i Galät á halï kumana á tchil tagu.
Ndak nga d’i hal kumana andjavam teteng pî, ni hawa na!
Kuma ma tchilik nga d’i!
12Andjaf suma a hum yam zulo ma’â.
Tchi ma’â mi b’rau wa woi yam andagad’a pet,
kayam ma dur ayîna mi dap tam ki ndrama,
azi djak a puk kä.
A dap Ezipte-na woyo
13Wana ni zla d’a Ma didina mi dat mi Jeremi kid’a Nebukanezar amul ma Babilon-na mi mba á dur ayîna ki Ezipte-nid’a: Mi dala:
14Agi tchagi wal zla ndata mi Ezipte-na,
ar a tagat tei mi suma Mikdol-lâ,
mi suma Memfis-sâ, mi suma Tapanes-sâ mi.
Agi dazi ala: Agi tchologi akulo minigi tagiya,
kayam ayî ma durâ mi nguyugi wa d’uhl!
15Ni kayam me ba, magi suma gangrang suma durâ, a yozi ge?
Azi nga tchol ngingring ngi,
kayam Ma didina nga mi zud’uzi kä.
16Mi ka suma dingâ azlinga ablaud’a.
A nga puk kä yam taziya, a nga dala:
Ei tcholei akulo! Ei hulongeî gen sum meina
kur ambas sa a vud’i kuad’a woi dei
abo mbigeu d’a nga d’i tchid’a!
17Ata yi máma a tchi ala:
Faron amul ma Ezipte-na,
siwela gandjau ndata ni zla d’a hawa yaka,
mi ar yina mi kal da’.
18An amul ma simiyên ala Ma didin ma ad’engên kal petna na ni dala:
An gun tan ki an ma bei matna ala:
Ma djangûna nga djï
d’igi Tabor ri nga akulo aduk ahuniyôna na,
d’igi Karmel li nga akulo avun alum ma ngolâ na mi.
19Agi suma nga kaka Ezipte-na,
agi minigi ahligiyegi á i magomba,
kayam Nof mba d’i ar djona.
Akud’a mba d’i ngalat teyo,
a mba fe sama kak kur ri.
20Ezipte ni d’igi amuhl hla wei d’a djif heîd’a na!
Azlipma nga mi djï abo ma norâ kad’u!
21Azigar suma le sun nda beged’a mi Ezipte-na
a nga kurut d’igi gor amuhl ma d’orâ na,
wani a hulong kazigaziya, a ring ki zla tazi pet,
a tchol nga ad’enga ngingring ngi.
Kayam bur mazi ma b’laka mi mba wa kaziya,
ni yima an Alona ni ngobozi kuana.
22Sor mazid’a ni d’igi sora hi guguinid’a na,
kayam ma djangûna nga mi mba ki azigarâ ablaud’a,
a nga i atazi durâ kandjetna
d’igi suma a i ka agunina na.
23Ma didina mi de kua ala:
Agu mat ta kal ndindik
ka sa ndak á kal adigat tuo d’a pî,
a mba kat kä woyo,
kayam suma djangûna ablaud’a kal djera,
sa ndak á ndumuzi d’i.
24Ezipte-na a mbut wa zulona,
kayam a hazi wa abo suma norâ.
25Ma didin ma ad’engêm kal petna, Alona hi Israel-lîna, mi dala: Gola! An nga ni mba á ngop Amon alo ma Tebes-sâ, á ngop Faron ma Ezipte-na kalo mama teteng kamulei mama ki suma a tin huruzi kama mi. 26An mba ni hazi abo suma a nga halazi á tchid’ina, nala, Nebukanezar amul ma Babilon-na ki azigar mama.
Bugola, suma a mba kak kur Ezipte d’igi a kak kurut adjeu na. An Ma didina ni de na.
A tchuk Israel-lâ akulo
(Gol 30.10-11)
27Ma didina mi dala:
Agi suma hi Jakob-ma azungeî mana,
agi lagi mandar ri!
Agi suma hi Israel-lîna,
agi zlagagi d’i!
Gola! An mba ni sud’ugï woi kur andaga d’a deid’a,
an mba ni sut andjavagi woi
kur ambas sa a yozi magomba kuad’a.
Agi suma hi Jakob-ma, agi mba hulongôgïya,
agi mba kagagi ki halasa ki tchugota
bei va mi mbud’ugi mandar ba!
28Ma didina mi de kua ala:
Agi suma hi Jakob-ma azungeî mana,
agi lagi mandar ri,
kayam an nga ki sed’egiya.
An mba ni dap andjaf ma lara
ma an ndjoyôgi woi adigama woi pet,
wani agiya, an mba ni dabagi woi d’i.
An mba ni aragi hawa bei ngopa d’i,
wani an mba ni ngobogi ni ki lovod’od’u.
Currently Selected:
Jeremi 46: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
