Jeremi 35
35
Jeremi azi kadesâ hi Rekap-ma
1Kur atchogoid’a hi Jojakim Josiyas gorom ma amul ma Juda-nid’a, Ma didina mi de mi Jeremi ala: 2Ang i ata suma hi Rekap-ma, ang dazi ala a i ki sed’eng kur gong nga kud’ora hi an Ma didinid’a hurut ma ding tu, ang hazi süm guguzlud’a á tched’a.
3An ve Jäzaniya Jeremi gorom ma Habaziniya gorom ngolona ki b’oziyoma ki groma ki suma hi Rekap-ma pet. 4An i ki sed’ezi kur gong nga kud’ora hi Ma didinid’a kur hurut ma hi Hanan groma Jikdaliya goroma sana hAlonina go ki gonga hi suma nglona akulo yam hur gonga hi Mäseya Salum goroma ma ngom vun gongina. 5An ndjar süm guguzlud’a oî d’a ki duguyona ki kopma avok suma hi Rekap-ma, an dazi ala: Agi tchagi süm guguzlud’a.
6Wani azi hulong dan ala: Ami nga tchami süm guguzlu d’i. Kayam abumi Jonadap Rekap goroma mi hami vuna ala: Agi tchagi süm guguzlu d’uo mi na, grogina a tche süm guguzlu d’uo mi. 7Agi mba minigi azì d’oze zaragi andjaf ma ding tu d’oze pagi guguzlud’a d’oze agi mba kagagi ki va tu d’i. Wani agi mba kagagi ni kur zlub’ud’a ata yima agi nga ki iragi yam andagad’ina pet tala agi tagi tatâ yam andaga d’a agi mba kagagi angoyogeina kata d’a.
8Ami gami yami kä yam ahlena pet suma abumi Jonadap Rekap goroma mi hami vuna kazina. Ami kamiyômina ki gromi suma andjofâ ki gromi suma aropma, ami nga tchami süm guguzlu ata yima ami nga ki irami yam andagad’ina d’i. 9Ami nga minimi azì á kak kur ri, ami nga ki guguzlu d’oze asine d’oze andaga d’a ami zarami awuna kuad’a d’i. 10Ami kagami ni kur zlub’ud’a, ami gami yami kä, ami tid’imi ni yam vama abumi Jonadap mi hami vuna kama.
11Kid’a Nebukanezar amul ma Babilon-na mi mba á dur ambas sa wandid’a, ami dami ala: Ei i Jerusalem ei ringî abo azigar suma Babilon-na ki azigar suma Siri-na. Ni hina ba, ami mba kagami kur Jerusalem wana.
12Ata yi máma Ma didina mi de mi Jeremi ala: 13An Ma didin ma ad’engên kal petna, Alona hi Israel-lîna, nga ni dangû, ang i de mi suma Juda-na ki suma a nga kaka avo Jerusalem-ma ala: Agi nga vagi hata d’uo, agi nga gagi yagi kä ad’u zla d’a an Ma didina ni data mi d’uo zu? 14Azi ve gata habuzi Jonadap Rekap goroma mi he vuna kat mi groma ala a tche süm guguzlu d’uo d’a, azi nga tche d’uo gak ini. Azi ge ni yazi kä ad’u gata habuzid’a, wani an nga ni dagi zlad’a burâ ki burâ pî, agi nga humun ndi. 15An nga ni sunugi azungeî man suma djok vuna pet, an nga ni sunugizi burâ ki burâ á dagi ala: Nge nge pî adigagi mi ar tit mam mba tchod’a, mi hulongîya. Agi aragi sun magi d’a tchod’a woyo, ar agi zlabagi tagi kalo ma dingâ á kud’urom mbi. Hina wani, agi mba kagagi kur andaga d’a an hagizi zlapa kabuyogi ngolod’a. Wani agi tinigi nga humagi á humba d’i, agi gagi nga yagi kä ad’un nduo mi. 16Gagazi, Jonadap groma Rekap grom ngolona a ge yazi kä ad’u vun ma he ma abuzi mi hazizina, wani agi nga humun ndi.
17Ni kayam ndata ba, an Ma didina Alo ma ad’engên kal petna, Alona hi Israel-lîna, nga ni dagiya: Gola! An nga ni mba ki ndak ka an dat zlata yam suma Juda-na, yam suma a nga kaka kur Jerusalem-ma pet mi, kayam an dazi zlad’a, wani azi humun nga d’i; an yaziya, wani azi hulong nga humba d’uo mi.
18Jeremi mi de mi suma hi Rekap-ma ala: Ma didin ma ad’engêm kal petna, Alona hi Israel-lîna, mi dala: Kayamba agi gagi yagi kä ad’u vun ma hed’a habugi Jonadap-ma, agi tid’igi yam vun ma he ma pet ma mam hagizina, 19kayam ndata, an Ma didin ma ad’engên kal petna, Alona hi Israel-lîna, ni dala: A mba ba bei fe sa ad’u andjafâ hi Jonadap Rekap goromina á tchol avoron ndi.
Currently Selected:
Jeremi 35: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
