Jeremi 34
34
Sun nda a gat ata Sedekiyas-sa
1Kid’a Nebukanezar amul ma Babilon-na ki azigar mama pet ki suma kur leud’a yam ambas sa mam te kata pet ki sum mama pet a nga dur ayîna ki Jerusalem ki suma kur azì ma nguyutna peta, Ma didina mi de mi Jeremi ala: 2An Ma didina Alona hi Israel-lîna nga ni dangû, ang i de mi Sedekiyas amul ma Juda-na ala: Ma didina mi dala: Gola! An nga ni hazì ma ngol ma wana abo amul ma Babilon-na. Mba mi ngalam mbei kakud’a. 3Ang mba sut abom mbi, wani a mba vang kad’enga, a mba hang abomu. Ang mba we ir amul ma Babilon-na, mba mi dang zlad’a avunang ngei mbambak, ang mba i Babilon.
4Wani Sedekiyas amul ma Juda-na, ang hum zlad’a hi Ma didina d’a mi dat kanga. Mi dala: A mba tchang ki mbigeu d’a fiyaka d’i. 5Ang mba mit ni ki halasa. A mba ngal mbul ma his ma afufuîna kang d’igi a ngalam yam abuyong ngolo amulei suma tamula avorongâ na, a mba tching ala: Alë, salamina! A mba le na kayam an Ma didina ni de zla ndata woi da’.
6Ma djok vuna Jeremi mi de zla ndata mi Sedekiyas amul ma Juda-na avo Jerusalem mbei pet. 7Azigarâ hamul ma Babilon-nina a nde azì ma Jerusalem-ma kazì ma nglo ma lara ma Juda-na kazì ma Lakis-sâ kazì ma Azeka-na, kayam nazì ma nglo ma ad’eng ma ngungu ma ar kur azì ma nglo ma Juda-nina.
A tchuk magumeina akulo. Bugola, a hulong yoziya
8Ma didina mi de zlad’a kua mi Jeremi. Wani avok ka bei mam dum zla ndata tua d’a, amulâ Sedekiyas mi djin wa vunam ki suma Jerusalem-ma á tchi wala yam tchuk ka a tchuk suma akulod’a ala: 9Ar nge nge pî mi ge magom mam ma Hebre-na d’oze magom mam mba Hebre-d’a akulo, ar sa mi d’el wiyem ma Juif-fâ kä kur magomba d’i. 10Suma nglona ki suma pet suma a ndjak vunazi yam zla ndatina, a ge yazi kä yam vun ma he máma á tchuk magumeina akulo, magoma d’oze magomba tala a d’el sa kä kur magomba d’uo d’angû d’a. A ge yazi kä ad’umu, a tchuguzi akulo. 11Wani bugola, a hulong a but vun mazi ma djinda kä woyo, a hulongî ki magumei suma andjofâ ki suma arop suma azi tchuguzi akulona, a nga oromozi kad’enga, a mbud’uzi magumeina kua.
12Ata yi máma Ma didina mi de zlad’a mi Jeremi kua ala: 13An Ma didina Alona hi Israel-lîna ni djin vunan kabuyogi ngolo kur bur ma an buzuguzï woi kur ambas sa Ezipte-d’a kur yima a lazi magomba kuana, an dazi ala:
14Bugol dabid’a hi biza d’a kid’iziyad’a, nge nge pî adigagi ar mi ge wiyem ma Hebre ma mi gus tam mbei aboma akulo. Mi lum sunda bizad’a karagaya. Bugola, mi gum akulo woi avo hatamu. Wani abuyogi ngolo a humun nga d’i, a tin nga humazi yam zla manda d’uo mi. 15Wani agi hulongôgï ini á le sun nda djivid’a avoronu. Agi tchagi wala ala: Nge nge pî mi ge ndrama akulo, agi djinigi vunagi avoron kur gong nga a nga kud’uron kuad’a. 16Wani agi hulong bud’ugi vun magi ma djinda kä woyo, agi lazan simiyênu, agi nge nge pî mi hulong yo magumei suma andjofâ ki suma arop suma agi tchuguzi akulona, agi hulong nga oromozi kad’enga á mbut magumei magi suma andjofâ ki magumei suma aropma kua.
17Ni kayam ndata ba, Ma didina mi de kua ala: Agi humun nga vunan á tchi wala ala ar nge nge pî mi ge wiyema d’oze mi ge ndrama akulo d’a d’i. Gola! An Ma didina an nga ni tchi wala kagi á tchugugi ayî ma durâ ki tugud’ei d’a tcho d’a tchi matna ki baktarad’a akulo kagiya. An mba ni mbud’ugi vama atchapma ir suma a nga kur leu d’a yam andagad’ina pet.
18An mba ni he suma a nga but vun man ma djinda kä suma a nga ndak vun vama azi djin vunazi kam avoron nduo suma a nga ngat gor amuhlâ aduk mbà a kal adigama abo mazi suma djangûna. 19An mba ni he suma nglo suma Juda-na ki suma nglo suma Jerusalem-ma ki adimbangâ ki suma ngat buzuna ki suma pet suma kur ambasa suma a kal aduk gor amuhl ma a walam mbei aduk mbà mámina 20abo mazi suma djangûna, abo suma a halazi á tchid’ina. Mad’azi mba mi mbut ni tena haluwei suma akulona kamburei suma yam andagad’ina mi. 21An mba ni he Sedekiyas amul ma Juda-na ki mam suma nglona abo mazi suma djangûna, abo suma a halazi á tchid’ina, abo azigar suma hamul ma Babilon-na suma a wal tazi woi dei ki sed’egina.
22Ma didina mi de kua ala: Gola! An nga ni he vuna, an mba ni hulongî sum ndazina yam azì ma ngol ma wana. A mba durumu, a mba hlumu, a mba ngalam mbei kakud’a. An mba ni mbut azì ma nglo ma Juda-na ful la bei sa mi kak kua ba d’a.
Currently Selected:
Jeremi 34: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
