Hebre-na 3

Jesus ni ma kal Moise-sâ

1Kayam ndata, agi b’oziyon kretiyê suma Alona yagina, agi tinigi iragi yam Jesus ma Alona sunumï á mbut Ma ngol ma ngat buzuna yam he gagazi d’a ei nga dei woi kata. 2Kayam ndata, mam mi Ma d’engzengâ avok Alo ma mi tinim á le sun ndatina d’igi Moise ni ma d’engzeng ma ndak vun sun mamba memet kur gonga hAlonid’a pet na mi. 3Suma a subur sama min gongina kal gong nga mi minita. Hina mi, Jesus ndak á suma a suburum ngola kal Moise. 4Kayam gong nga lara pî sama minitna mi nga, wani Alona ni ma min ahlena petna. 5Wani Moise ni sama d’engzengâ kur gonga hAlonid’a pet, mi tinim á le sunda á de woi yam ahle suma Alona mba mi dazina. 6Wani Christ ni Ma d’engzengâ, ni Gor ma Alona mi tinim yam gong mambina. Le ei nga vei tei ad’enga ngingring, le ei dengeî tei yam hur mei ma tinda ni, ei ni gong ndata.

Bur ma tuk tad’a yam suma hAlonina

7Kayam ndata, d’igi Muzuk ma bei tchod’a ba na mi de na ala:

Le agi humugi del Alona ini ni,

8agi b’alagi hurugi d’igi agi kagagi djangûna ki sed’em

kur bur ma agi kugugizi hur fulîna na d’i.

9Alona mi dala: Abuyogi ngolo a kugunu,

a ngan ata yima azi we sun man nda an lata

bizad’a dok fid’ina.

10Kayam ndata, hurun zal ngola yam sum ndazina.

An dazi ala:

Azi nga vit tei burâ ki burâ kur djib’er mazid’a,

a we nga lovot manda yazi tu d’i.

11An hurun zal ngola, an gun tan ala:

Azi mba kal ata yima azi tuk tazi kua ki sed’ena d’i.

12B’oziyona, agi gologi tagi djiviya, ar sa adigagi mi kak ki hur ma tcho ma bei he gagazid’a á wal lei kAlo ma arina d’i. 13Wani agi gigid’egi tagi teteu d’igi mbaktumba hAlonid’a ti de na ala: Ini ar sa adigagi tchod’a lobom á b’al hurum mbi. 14Kayam ndata, le ei vei tei ad’enga yam hur mei ma tin ma avo’â ngingring gak bur ma dabid’a ni, ei ni Jesus ndroma.

15Kayam mbaktumba hAlonid’a ti de na ala:

Le agi humugi del Alona ini ni,

ar agi b’alagi hurugi

d’igi agi kagagi djangûna ki sed’em adjeu na d’i.

16Ni suma lara ba, a hum del Alona, a kak djangûna ki sed’em ge? Ni suma Moise mi buzuguzi woi kur Ezipte na d’uo zu? 17Ni suma lara ba, Alona hurum zal kazi ngola bizad’a dok fid’i ge? Ni suma a le tchod’a ba, mad’azi mi sam mbei hur fulîna d’uo zu? 18Ni suma lara ba, Alona mi gun tam kazi ala a mba kal ata yima tuk tad’a ki sed’em mbuo ge? Ni suma a kak djangûna ki sed’ema d’uo zu? 19Kayam ei wei ala azi ndak á kal kua d’i, kayam azi he nga gagazid’a kam mbi.

Currently Selected:

Hebre-na 3: BA

Highlight

Copy

Compare