Hebre-na 2
2
Sut ta ngola
1Kayam ndata, mbeî ei djib’erei ngola yam ahle suma ei humizina, ar ei walei woi dei ki sed’ezi d’i. 2Le zla d’a malaikana tchat walata ni zla d’a irata, le sama lara ma tchila kat toze mi sot vunatna mba mi fe wurak mam mba ndaka, 3le ei golei sut ta ngol ndata ta ni, ei mba prud’i woi ni nana ge? Salad’a tamba mi de zla sut ndata woi avogo, suma a humut avunama a deizi djivi mata mi. 4Ata yi máma, Alona tamba mi le glangâsâ zlapa ki sed’ezi kahle suma simata kahle suma atchapma kahle suma ndandalâ teteng, yam he d’a hawad’a hi Muzuk mam ma bei tchod’a ba na d’a mi b’rawat mi suma yam min mambid’a.
Ma i ki suma kur sutina
5Kayam andaga d’a nga d’i mba d’a ami nga dami kat wanda, Alona mi hat nga ad’u ad’enga hi malaikanid’a d’i. 6Wani sama dingâ mi le glangâsâ kur mbaktumba hAlonid’a ala:
Sana ni nge ba, ang Alona djib’er kam ge?
Gor sana ni nge ba, ang ngomom ge?
7Ang hulongôm kä ad’u malaikana ndjö,
ang kulubum avaval la amula kamu,
ang hum ngola mi.
Ang tinim á te yam ahle suma ang lazi kabongina pet.
8Ang tin ahlena pet á ge yazi kä ad’umu.
Ata yima Alona mi he sana ad’enga yam ahlena petna, vama mi aram mbei bei ge yam kä ad’uma nga d’i. Wani ki tchetchemba, ei wei ala ahlena pet a ge nga yazi kä ad’um mbuo tua. 9Wani ei wei Jesus ma Alona hulongôm kä ad’u malaikana ndjö na. Ki tchetchemba, mi kulubum avaval la subura kamu, mi hum ngola mi. Ni yam sumad’a hAlonid’a ba, mi fe ndaka, mi mit yam suma pet. 10Kayam Alo ma lahlena pet ma ahlena pet a nga ni ved’a aboma, ni djivid’a iram á mbut Jesus sama ndak memetna yam ndak ka mi fata, á mba ki grona ablaud’a kur subur mamba. Kayam Jesus ni Salazi ma sud’uzina.
11Kayam Jesus ma mi mbut suma woi yed’et kur tcho mazid’ina ki suma mi mbud’uzi yed’etna, Abuzi ni tu. Kayam ndata, Jesus nga ki zulona á yazi b’oziyoma d’i. 12Mi dala:
Ang Alona, an mba ni dang zlang ngei mi b’oziyona,
an mba ni gileng ki sawala aduk toka hi sumid’a.
13Mi de kua ala:
An mba ni tin hurun yam Alona.
Mi de kua ala:
Gola! An nga zlapa ki gron suma Alona mi handjina.
14Gro ndazina ni suma ki hliuna ki buzunina. Kayam ndata, Jesus tamba mi mbut tam d’igi azi na. Mi le hina ki mad’am á b’lak Diable ma nga kad’enga hi matnid’a aboma woyo, 15mi pat suma pet suma a nga kur magomba hi mandara matna kur kak mazid’ina woi mi. 16Kayam mi mba ná ndjun malaikana d’i, wani d’igi mbaktumba hAlonid’a ti de na ala: Mi mba ná ndjun andjafâ hi Abraham-ma. 17Kayam ndata, mbeî mi mbut tamî d’igi b’oziyoma na kur ahlena pet, kayam mi mbut mazi ma ngol ma ngat buzu ma d’engzeng ma we hohowa suma kur sun mamba avok Alona, kayam Alona mi vat hurum mbei yam tchod’a hi sumid’a. 18Wani ki tchetchemba, mi ndak á ndjun suma Seitan nga mi kuguzina, kayam a kugum mam tamba avok ata yima mi fe ndakina.
Currently Selected:
Hebre-na 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.