Habakuk 3
3
Tchenda hi Habakuk-ka
1Wana ni tchenda hi ma djok vun Alona Habakuk ka yam yor tad’id’a:
2Ma didina, an hum zla d’a ang data,
Ma didina, mandarâ van heî abo sun mang nga led’a.
Ang le sun manga kur atchogoi mamid’a
d’igi ang lat adjeu na;
kur atchogoi mamid’a ang tagat tei mi suma.
Le hurung zal pî, ar ang djib’er
yam we hohou mang nga kamid’a.
3Alona mi tcholï Teman;
Ma bei tchod’a ba na mi tcholï
yam ahina d’a Paran-nda.
Tchol ndjö
Ngol mamba ti duk ir akulod’a,
subur mamba ti oî yam andagad’a.
4Wile mamba ni d’igi b’od’a hafatid’a na,
wile ndata ti tcholï nabomu.
Nata yi máma ba, ad’eng mamba nga ngeid’a kua.
5Nga mi sun tugud’eid’a tchod’a avoromu;
nga mi he vuna mi matna mi tid’i ad’um mi.
6Alona mi tchol akulo, andagad’a nga d’i giged’a;
nga mi gola, andjaf suma a nga zlaga;
ahina d’a dedeid’a nga d’i wizek keyo,
ahina d’a gurei d’a djodjohla nga d’i galal leyo.
Lovota ti mal lei avoron d’igi ti nga nadjeu dedei na.
7An we suma Kus-sâ a nga kur ndaka ngola;
suma Madiyan-na a nga zlak mi.
8Na ni Ma didina, ang hurung zalî yam toliyonda zu?
Na ni ang hurung zalî yam aluma zu?
Ang nga djulul kayîna ata yima ang ful yam akulumeina,
ang ful kur pus mang ma kus ayînina
ni yam alum ma ngolâ zu?
9Ang pat nga yeû manga woyo,
vun ma ge ma ang guma ni d’igi yeûd’a na.
Tchol ndjö
Ang nga wak ir andagad’a, aluma nga mi djangâ.
10Ahuniyôna a wangû, a nga zlaga;
mbiyona nga mi djang oî kä yam andagad’a,
zul la yiyika vunat nga mi tchi wü,
abilâ nga mi sulul akulo huhubup mi.
11Afata ki tilâ a ar mungôra ata yazi
abo b’od’a hi yeû manga ki djang matna,
abo wiled’a hasap mangid’a mi.
12Ang nga ngui yam andagad’a kayî mang ma djulula,
ang nga miret andjaf suma kä kayî mangâ.
13Ang nde woi abu á sut sum mangâ,
á sut ma ang manama,
ang b’lak amulâ hi suma tchonina woyo,
ang tchi sum mama woi pet mi.
Tchol ndjö
14Ang tchok yam amul mazina ki yeû mazid’a tata;
azi suma nga b’at tazi d’igi babarâ na á pleyêmina,
a nga siwel ki furîd’a guguguk,
a nga tchi suma azi nga kad’enga kazina gumunu.
15Ang nga tit akulo yam alum ma ngolâ kakulumei mangâ,
ang nga tit aduk mbiyo ma ngol ma nga mi sulul huhubupma mi.
16An hum hina,
wani vunadigan ndi pad’a.
Kid’a an hum siwel ndatid’a,
vunan nde zlaka, tan ndi tchuk susub’ok,
asen mi nde zlaka kikib’i mi.
An ni kak tchugot á djup bur ma ndak
ma ang Alona mba ka sariyad’a
yam suma a mba mba á lami tchod’ina.
17Le tuluma mi b’o d’uo,
le guguzlud’a ki olifâ a vut tuo,
le asinena mi wul awuna d’uo,
le aho’â kamuzleina a nga kur kangâna d’uo,
18hina pet pî, an ni le furîd’a yam ang Ma didina,
an ni le hur ma hapma yam ang Alo man ma suta.
19Ma didina, angî ad’eng manda;
ang mbud’un asen ad’enga d’igi ma hi pandrid’ina na,
ang nga tinin á tita akulo yam ahuniyôna.
Mi ma ngolâ hi suma hle sawalina kading mama.
Currently Selected:
Habakuk 3: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
