Habakuk 2
2
1An mba ni djak akulo yam gong nga fiyaka ked’iwurenga á ndjola,
an mba mi tchol akulo kua
á we vama Ma didina mba mi dandjina,
á djup zla d’a mam mba mi hulongôndji yam yor ta mandid’a.
Alona mi hulong humba mi Habakuk
2Ma didina mi hulong dan ala:
Ang b’ir zla d’a an nga ni tagangzi woi wanda;
ang b’irit kur agu ma tcheta,
kayam suma a ndumut atogo zak.
3Kayam zla d’a ndat teid’a mba d’i ndak vun
sun mata kur atchogoi mat ta a ngata,
ti nga d’i i ata dabi mata,
ti mba d’i ba bei led’a d’i.
Le yat nga d’i ve pî, ang djubud’u,
kayam mba d’i ndak vun sun mata gagazi,
mba d’i ba hawa d’i.
4Zla d’a a b’irita ba wana:
Sama subur tama mba mi kak karid’a tatâ d’i,
wani sama d’ingêrâ mba mi kak karid’a,
kayam mi he gagazid’a mAlona.
Dabid’a hi suma tchonid’a ni ndaka
5Ndjondjoîd’a nga d’i b’lak sana;
sama subur tama nga mi kak tchugot ti,
nga mi ngo vunam mbei d’igi zula tos matna na,
d’igi matna va nga mi ndagam mbuo na mi.
Kayam ndata, nga mi kus yam andjaf suma teteng,
nga mi yozi magomba ad’um mi.
6Sum ndazina a mba mbud’umî vama lasa
ki vama ndala mi d’uo zu?
Azi mba dala:
Ni zla d’a hohoud’a yam sama tok ahlena hi ndromina,
ni zla d’a hohoud’a yam sama nga mi tok godjined’a kama;
mba mi le hina ni gak mindja ge?
7Suma godjined’a a mba tchol atogo zak ki sed’eng nguo zu?
Suma zlad’a ki sed’engâ a mba tchol ki sed’eng mi d’uo zu?
Ang mba mbut ni va mazi ma hurumba.
8Kayam ang hurum andjaf suma ablaud’a heî,
ad’uzi d’a ar pet wanda a mba hurumung ang mi.
Ni kayam tchi d’a ang tchi sumid’a,
ni kayam b’lak ka ang b’lak ambasa kazì ma ngolâ
ki suma a nga kuruma mi d’a.
9Ni zla d’a hohoud’a yam sama nga mi tok bege d’a mbut ira
á mbut tam ad’engina,
á sut tam mbei kur bur ma ndaka mba kama.
10Vama ang ngam kurung á led’ina,
ni vama zulona yam aziyangû.
Kid’a ang tchi suma ablaud’id’a,
ang tchi ni ang tanga.
11Kayam ahina d’a aduk gulumunid’a pî
mba d’i tchugung zlad’a kangû,
agu ma yam gongina mba mi ndjunung vunang mi.
12Ni zla d’a hohoud’a yam sama mi min aziyam
kahlena hi suma mi tchazina,
ma gäd’u aziyam ki mat ma tchid’ina.
13Le Ma didin ma ad’engêm kal petna
mi he nga vuna á le va d’uo ni,
suma a le sunda ni makud’a,
a kau tazi ni hawa mi.
14Kayam andagad’a pet mba d’i oî ki wed’a hi Ma didin ma subura,
d’igi mbiyona mi oî kur alum ma ngolâ na.
15Ni zla d’a hohoud’a yam sama mi he
vama tche ma ayî ma tchona mi ndrama
d’igi süma na na,
tala mi gurut gurut ba
mam mi wum gandila mamba na.
16Wani ang tang zulona mba mi lang kal subura.
Ang tang tchë, ar gandilad’a.
Ma didina mba mi gad’ang kayî mama,
subur manga mba d’i mbut zulona.
17Kayam ang ka agu d’a Liban-nda woyo,
ki tchetchemba, Alona mba mi kang ngei mi.
Ang tchazi d’uwar mazina,
Alona mba mi tchang mangâ mi;
kayam ang tchi suma,
ang b’lak ambasa kazì ma nglona ki suma kuruma mi.
18Agu ma sama d’alâ nga mi tched’em
d’igi angusa na na, zlamî zla me ge?
Kawei ma sana yorom d’igi angus vana na na,
mi hat ni zla d’a kad’a.
Ni kayam me ba sana mi tin hurum
yam filei ma ngel mam minim máma ge?
19Ni zla d’a hohoud’a yam sama nga mi de magu ma a tuwalama ala:
Ang tchol akulo na
yam ma nga mi de mahina d’a a tuwalata ala:
Ndak zlid’a na mi.
Na ni a mba had’am zu?
A gulud’uzi ni ki lora ki dorona mi,
wani a nga muzuk ki.
20Wani Ma didina mi nga kaka kä kur gong mam mba kud’ora;
ar suma yam andagad’ina pet a seng silil avoromu!
Currently Selected:
Habakuk 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.