Ezekiyel 40
40
ADÏD’A TETENG TI DE EZEKIYEL
(40—48)
Zla d’a a tagat tei avok yam gong nga a mba minita
1Kur biza d’a dok mbà yam vahla bugol la a yomi magombid’a, kur bur ma dogona hi til ma avo’îna, Ma didina mi tin abom kanu. Ni kur biza d’a dogo yam fid’id’a bugol b’lak ka a b’lak Jerusalem mbeid’a. 2Ata yi máma vana nde tam mbei iran mi hlan mi in yam andaga d’a Israel-la sä hî, mi tinin kä yam ahina d’a fiyaka ka ked’iwurenga. Ata abot ma sutna an we gongîyona a nga minda teteng d’igi azì ma ngolâ na. 3Mi in sä hî. An we sana iram nga d’i wile d’igi kawei ma hleuna na. Ziyo ma a tchilim ki baru d’a luluîd’ina kakei d’a nga yina a nga abomu, mi nga tchola go ki vun agre’â.
4Sa máma mi dan ala: Ang gor sana, ang mal irang ki humang ngeyo, ang gol tang djivi yam ahlena pet suma an nga ni tagangzina, kayam a mbang ka hî ná gola. Bugola, ang i väd’u ahle ndazina woi pet mi Israel-lâ.
Atrang nga kur gulumunid’a ki vun agrek ma abuna mi
5Gulumun ma abuna mi ngui gong nga kud’ora hAlonid’a kä d’uhl. Sa máma mi hlakei d’a ngad’a abomu. Fiyagat ni metred’a hindi. Mi nga gulumuna bubuwam ki fiyagam mba akulod’a, azi dja’î metred’a hindi hindi.
6Mi i avun agrek ma abo ma yorogonina. Mi djak akulo yam yima a djak kakulona, mi nga yima avun agre’îna. Fiyagam mba krovod’a ni metred’a hindi. 7Bugol yima avun agrek mámina hur gong nga ndjol la lara pî nga kua abo yima kal ma adu’â abo hî abo hî. Hur gongîyo suma ndjol ndazina fiyagazi ki bubuwazi ni metred’a hindi hindi mi. Bubud’a hi gulumun ma adigazina ni metred’a mbà ki nus nus. Yima a tchol kur gongîyo suma ndjola a i ki hur gong nga ngagad’a yam gong nga ngola d’ara ni metred’a hindi. 8-9Sa máma mi nga hur gong nga krovo ndata. Fiyagat ni metred’a fid’i fid’i, gulumun mat ma abuna, bubuwamî metred’a tu. Vun gonga ti malî ngagad’a yam hur atrang nga krovo kur gulumunid’a. 10Hur gongîyo suma ndjol suma abo yima kal ma aduk ma abo hî abo hî na a ni hindi hindi. Bubuwazi ki fiyagazi pet ni abo tazi tu, gulumun ma adigazina pet ni metred’a mbà ki nus nus mi. 11Bugola, sa máma mi nga bubud’a hi yima kal ma avun agre’â ma bapma nga kuana. Mi ni metred’a vahl. Yima kal ma adu’â bubuwamî metred’a karagaya ki nus. 12Avok hur gong nga ndjol la lara ge gulumun ma d’el sumina nga. Fiyagam mba akulod’a ni nus metred’a nus metred’a. Hur gong nga ndjol la lara ge bubuwat ki fiyagat ni metred’a hindi hindi mi. 13Sa máma mi tinï ngad’a ata gong nga ndjola abot ma dabid’a gak kal yam yima adu’â gak ndeza woi abo ma dabid’a hi gong nga ngagad’a yam ndrata d’ara. Ni metred’a dogo yam mbà ki nusa. 14Mi nga hur gong nga vunat mi malî hur atrang nga krovo kur gulumunid’a. Fiyagat ni metred’a dogo. 15Tchol avun agre’â abo hî gak ndeza woi abo hî ni metred’a dok mbà yam vahl. 16Gulumun ma abuna, gulumuna hi gongîyo suma ndjola, gulumun ma aduk gongîyo suma ndjolina ki gulumuna hi gong nga ngolina pet fenetre mazid’a a lat ni ki kawei ma iram ndjâna. Fenetre ndata ti eûd’a abo ma abuna, wani abo ma krovona ti ni bubud’a hohogok. Ti nga nguid’a avun agre’â pet mi. A ndjar amulongeîna akulo ata gulumuna hi gongina pet mi.
17Sa máma mi in hur atrang nga abu d’a hur gongîyona dok hindi a nguyuta. Atrang ndata ti ni mbud’a d’andrang. 18Mbu ndata ti ni ndjaka ki vun agrek ma tetengâ tu, ti ni ndjaka ki yima nga adigazi mi. Wani mbu ndata ti nga akulo nding d’igi atrang nga krovod’a na d’i.
19Sa máma mi nga yima aduk avun agrek ma abuna ki ma krovona abo ma yorogona kabo ma norâ mi. Adigazi ni metred’a dok vahl.
20Mi nga vun agrek ma abo ma nor ma mi i hur atrang nga abud’ina fiyagam ki bubuwam mi. 21Hur gongîyo mam suma ndjola ni karagaya, hindi abo hî, hindi abo hî. Gulumuna ki gong nga ngola, fiyagazi ki bubuwazi ni tu ki vun agrek ma abo ma yorogonina. Fiyagam mba peta ni metred’a dok mbà yam vahl, bubuwamî metred’a dogo yam mbà ki nusa mi. 22Hur gong nga ngola ki fenetred’a kamulongeîna a nabo tazi tu ki vun agrek ma abo ma yorogonina. Sana mi djak akulo avun agrek ma abo ma norâ á i kur gonga ni ki vama djak akulo ma a tinim ndjendjek kid’iziyana. 23Vun agrek ma i hur atrang nga krovod’ina mi ni ngagad’a yam vun agrek ma abo ma norâ d’ad’ar. Adigazi ni metred’a dok vahl.
24Sa máma mi in abo ma sutna. Ata yi máma an we vun agrek ma dingâ. Mi nga hur gong nga ndjola ki gulumuna ki gong nga ngola, a nabo tazi tu ki vun agrek ma abo ma yorogonina. 25Fenetred’a ti ngui vun agre’â ki hur gong nga ngola d’igi ti ngui vun agrek ma abo ma yorogonina na mi. Vun agre’â fiyagamî metred’a dok mbà yam vahl, bubuwamî metred’a dogo yam mbà ki nusa mi. 26Sana mi djak akulo avun agrek ma abo ma sutna á kal kur gonga ni ki vama djak akulo ma a tinim ndjendjek kid’iziyana. Amulongeîna a nga ndjara akulo ata gulumuna abo hî abo hî d’igi a nga ndjara akulo ata gulumun ma dingâ na mi. 27Vun agrek ma i hur atrang nga krovod’ina mi ni ngagad’a yam vun agrek ma abo ma sutnina d’ad’ar. Adigazi ni metred’a dok vahl.
Atrang nga krovod’a ki vun agrek ma hindi ma krovona mi
28Bugola, sa máma mi hlan avun agrek ma abo ma sutna á kal kur atrang nga krovod’a. Mi nga vun agrek ma krovo máma. Fiyagam ki bubuwam nabo tazi tu ki vun agrek ma abuna. 29Hur gong nga ndjola, gulumun ma adigazina ki hur gong nga ngola, fiyagazi ki bubuwazi nabo tazi tu d’igi vun agrek ma tetengâ na mi. 30Fenetred’a teteng ti ngui hur gong nga ngola mi. Vun agre’â fiyagam mba peta ni metred’a dok mbà yam vahl, bubuwamî metred’a dogo yam mbà ki nusa mi. 31Hur gong nga ngol ndata ti nga ki vuna á i hur atrang nga abud’a. Amulongeîna a nga ndjara akulo ata gulumun ma krovona. Sana mi djak akulo á kal kur gonga ni ki vama a tinim ndjendjek aklavandina.
32Sa máma mi hlan avun agrek ma abo ma yorogona á kal kur atrang nga krovod’a. Mi nga vun agre’â, fiyagam ki bubuwam nabo tazi tu ki vun agrek ma tetengâ. 33Hur gong nga ndjola, gulumun ma adigazina ki hur gong nga ngola, fiyagazi ki bubuwazi nabo tazi tu d’igi vun agrek ma tetengâ na mi. Fenetred’a ti ngui vun agre’â ki hur gong nga ngola. Vun agre’â fiyagam mba peta ni metred’a dok mbà yam vahl, bubuwamî metred’a dogo yam mbà ki nusa mi. 34Hur gong nga ngol ndata ti nga ki vuna á i hur atrang nga abud’a. Amulongeîna a nga ndjara akulo ata gulumun ma krovona abo hî abo hî. Sana mi djak akulo á kal kur gonga ni ki vama a tinim ndjendjek aklavandina.
35Bugola, sa máma mi hlan avun agrek ma abo ma norîna, mi ngamu. Fiyagam ki bubuwamî d’igi vun agrek ma tetengâ na mi. 36Hur gongîyo suma ndjola, gulumun ma adigazina, hur gong nga ngola ki fenetred’a nabo tazi tu ki vun agrek ma dingâ pet. Vun agre’â fiyagam mba peta ni metred’a dok mbà yam vahl, bubuwamî metred’a dogo yam mbà ki nusa mi. 37Hur gong nga ngol ndata ti nga ki vuna á i ki hur atrang nga abud’a. Amulongeîna nga ndjara akulo ata gulumun ma krovona abo hî abo hî. Sana mi djak akulo á kal kur gonga ni ki vama a tinim ndjendjek aklavandina.
38Hur gong nga abo ma yam hur gong nga ngol la ngagad’a yam vun agrek ma abo ma norîd’a ni gong nga a mbus hliwa vama a hum he d’a hawa d’a vama ngat buzu ma ngala kuana. 39Kur gong ndata tabulâ nga kua, mbà abo hî, mbà abo hî á ngat d’uwar ma a hum he d’a hawad’a ngalina, ma a hum he d’a ngat buzu d’a tetenga, ma a hum he d’a hawa d’a vat hurâ yam tchod’ina mi. 40Abu avun gong ndata, tabulâ fid’i nga kua. Ata yima sana nga mi mba á djak akulo avun agrek ma abo ma norîna, mi we tabul ma fid’i máma, mbà abo hî, mbà abo hî mi. 41Kayam ndata, tabulâ naklavandi á ngat d’uwar ma a hum á ngat buzunina kamu, fid’i avun agre’â abo hî, fid’i abo hî mi. 42Tabulâ nga fid’i ni ma a minim kahina d’a tchetina, ni ma a mbus hliwa ahle suma a ngad’azi á hazi he d’a hawa d’a ngala kama. Bubuwam ki fiyagamî santimetred’a dok kid’iziya yam vavahl, fiyagam mba akulod’a ni santimetred’a dok vahl dok vahl mi. A tchuk ahle suma sun suma a ngat kahle suma ngat buzunina ni kam mi. 43Tabul ma fid’i máma a tinim vunam ma dalalâ kahinad’a ndak santimetred’a aklavandi ngui woi d’uhl. A tchuk hliwa ahle suma ngat buzuna ni kam pet mi.
44Sa máma mi in kur atrang nga krovod’a. Gongîyona mbà a nga kua. Ta tud’a ti ni gen vun agrek ma abo ma norîna, irat nabo ma sutna. Ta mbàd’a ti ni gen vun agrek ma abo ma sutnina, irat nabo ma norâ mi. 45Mi dan ala: Gong nga irat abo ma sutnid’a ni yam suma ngat buzu suma a nga le sunda kur gong nga kud’orina, 46wani gong nga irat abo ma norîd’a ni yam suma ngat buzu suma a nga le sunda avun yima ngal ahle suma ngat buzunina mi. Mi dan kua ala: Aduk Levi groma pet ni suma abuzi ngolo ni Sado’â hol ba, a ndak á le sunda mi Ma didina kur gong mam mba kud’ora.
Gong nga kud’ora hAlonid’a
47Sa máma mi nga atrang nga krovod’a. Bubuwat ki fiyagat nabo tazi tu. Abo ma lara pî ni metred’a dok vahl dok vahl. Yima ngal ahle suma ngat buzuna mi ni avok gong nga kud’ora hAlonid’a d’ar.
48Bugola, mi in kur yima a kal ki kur gong nga kud’ora hAlonid’ina. Agu ma murgulina mi nga ped’a avun gonga, tu abo hî, tu abo hî. Bubuwamî metred’a mbà ki nus nus. Yima a kal ki kur gongina, bubuwamî metred’a kid’iziya. Gulumuna nga abo hî, nga abo hî mi. Bubuwamî metred’a tu ki nus nus mi. 49Hur gong nga avun yima kalid’a fiyagat ni metred’a dogo, bubuwat ni metred’a karagaya. Sana mi djak akulo á kal kua ni ki yima a tinim ndjendjek dogona. Agu ma murgulina mbà mi nga kua, tu abo hî, tu abo hî mi.
Currently Selected:
Ezekiyel 40: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
