Ezekiyel 4
4
AYÎNA HALONINA MBA MI NDE YAM JERUSALEM
(4—24)
Ezekiyel ki ngui d’a a ngui Jerusalem-mba
1Ma didina mi dan kua ala: Ang gor sana, ang hle derengel ma lubuna, ang tinim kä avorongû, ang tin angus azì ma ngol ma Jerusalem-ma atamu. 2Bugola, ang nguyum kä kayîna, ang lak azigarâ adesâ adesâ nguyum mbei d’uhl, ang mbu andagad’a ad’um akulo, ang ve kangâ, ang tin vama to gulumuna, ang nguyum mbei d’uhl mi. 3Ang hle taza ma kaweina, ang tinim d’igi gulumuna na adigagi kazì ma ngol máma, ang i irang kam á durâ, ang nguyum kä. Wana ni vama taka yam Israel-lâ.
4Bugola, ang bur kä yam bigang nga gulad’a, an mba ni tin tchod’a hi Israel-lîd’a kangû. Ang mba zi tcho mazid’a kang ata yima ang mba le burâ ablaud’a kä ata yi mámina. 5An mba ni ndumung burâ ngad’a yam biza d’a azi le tchod’a kura, nala, 390. Ni hina ba, ang mba zi tchod’a hi Israel-lîd’a kangû. 6Le bur máma mi dap wa ni, ang djok burâ yam bigang nga ndjufa, ang mba zi tchod’a hi suma Juda-nid’a gak burâ dok fid’i. Biza d’a lara pî, an mba ni ndumung burâ ngad’a kad’u. 7Ang mbut irang yam Jerusalem mba a nguyut kä d’a, ang mat bigang nga silid’a kad’u, ang djok vuna kad’u. 8Gola! An mba ni djining kä ki ziyona. Ang mba fe lovota á mbut abo hî abo hî d’i, gak ang mba ndak vun bur ma a nguyut kä á durîna.
9Wani ang yo gemena, awu orsâ, alitna, alit ma nglona, awu milena kawu epotrena, ang tchuguzi kur dei ma tuna, ang lazi avungôna. Ata yima ang mba bur kä yam bigang nga tud’ina, ang mba tum gak burâ 390. 10Te ma ang mba tuma, a mba nga mi nga ki vama ngad’a burâ ki burâ, ang mba tumî hina gak kur yima a ngama hina pet mi. 11Ang mba tche mbina ni lidirâ tutu burâ ki burâ gak ndak ki yima a ngama. 12Ang mba te woî awu orsâ, ang mba yumî ki sud’o suma kä irazina.
13Ma didina mi dala: Ni hina ba, Israel-lâ a mba te te mazi ma ndjendjed’a aduk suma an mba ni digizi izi kuana.
14An dala: Alë! Salad’a Ma didina, an wal lei kahle suma ndjendjed’a ni dedei, an te nga vama mat toze vama vana vuma yan tu d’i, kazongôn dei gak ini. Vama ndjendje tu pî, mi ngen nga avunan ndi!
15Mi hulong mi dan ala: Gola! An nga ni hang lovota á yo sud’o amuhla balum sud’o suma. Ang mba yavungô mangâ ni ki sed’emu.
16Mi dan kua ala: Ang gor sana, an nga ni yo tena hi suma Jerusalem-ma woyo. A mba ngazi tena ni nga, a mba ngazi mbina ni nga, a mba tche mbina ni ki ngad’a ki hohoud’a. 17Tena ki mbina a mba kid’agaziya. Zulona mba mi laziya. Nge nge pî mba mi mbut hohoud’a, a mba dap pei yam tcho mazid’a.
Currently Selected:
Ezekiyel 4: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.