Ezekiyel 3
3
1Ma didina mi dan ala: Ang gor sana, ang te vama ang fuma, ang te mbaktum mba d’ut ndata, ang i de zlad’a mi Israel-lâ! 2Ata yi máma an mal vunan ndeyo, mi han mbaktum mba d’ut ndata á ted’a.
3Mi dan kua ala: Ang gor sana, ar ang hop hayangû, ang d’or tang ki mbaktum mba d’ut ta an hangzid’a. An tad’u. Tadjib’eta avunan d’igi mbul ayuma na.
4Mi dan kua ala: Ang gor sana, ang i gen Israel-lâ, ang dazi zla manda. 5An sunung nga ni gen andjaf ma ding ngi, an sunung nga gen andjaf ma ding ma vunam ad’enga ma ang nga humum mbuo na d’uo mi. Wani an sunungî gen Israel-lâ. 6An sunung nga ni gen suma ding suma ablau suma vunazi ad’enga á humba suma ang mba hum zla mazid’a d’uo na d’i. Ladjï an sunungî geveziya ni, a humung wa da’. 7Wani Israel-lâ a min humung ngi, kayam azi min humun nduo mi, kayam Israel-lâ pet ni suma yam mba ad’enga, ni suma huruzi b’ala kiki na. 8Gola! An nga ni hang ad’enga, ang mba tchol avorozi irang ngei mbelel. An nga ni hang yam mba ad’enga, ang mba tchol avok yam mba ad’eng mazid’a mi. 9An mba ni mbud’ung yang ad’enga d’igi ahina diyamanda na, ad’enga kal ahina d’a ad’enga mi. Ar ang lazi mandarazi d’i, ar vunadigang pat avorozi d’uo mi, kayam azi nandjaf ma bei hum vuna ba na.
10Mi dan kua ala: Ang gor sana, ang tin humang hum zla d’a an nga ni dangzid’a pet, ang vat kurungû. 11Ang i gen mang suma a yozï magombina, ang dazi zla manda. Le a min hum mboze le a min hum mbuo pî, ang dazi ala: Wana ni zla d’a Salad’a Ma didina mi data.
12Ata yi máma Muzu’â hAlonina mi hlan akulo. An hum siwel la ngola ei blogon ala: Ar ei gilei Salad’a Ma didina ata yam ma kak ma nga mi tak subur mamba woi kuana.
13An hum siwela hi giging ahle suma arina, nga mi tchi ata tamu, ki siwela habo pusîd’a gevezi mi. Ni siwel la ngol la kal lei papad’a. 14Muzuk ma mi hlan ndei akulona, mi i ki sed’enu. An i ki hur ma hata ki hur ma zala, kayam Ma didina abom mi nga tinda kan kad’enga. 15An mbaza Tel-Abip, avo hi suma a yozi magombina avun alum ma Kebar-râ. Ata yima azi nga kaka kuana, an kak sä kua adigazi burâ kid’iziya kur djib’era ngola.
Ezekiyel mi mbut ma ndjol Israel-lâ
(Gol 33.1-9)
16Kur bur ma kid’iziya máma Ma didina mi dan ala: 17Ang gor sana, an tining ma ndjola yam Israel-lâ. Ang mba hum zla d’a ndavunanda, ang mba gazi humazi yam zla d’a tcholï atanda mi. 18Le an de mi sama asa’atna ala: Ang mba mit gagazi, le ang gum nga humam yam zla ndata d’uo, le ang ge nga ma asa’at máma humam tala mi ar tit mam mba tchod’a woi á sut tam mbuo d’a ni, mba mi mit kur sun mam mba ata yat tuo d’a, wani an mba ni djobom mad’am natang angû. 19Wani le ang ge hum ma asa’at máma, le mi ar nga asa’at mamba ki tit mam mba tcho ndata woi d’uo ni, mba mi mit kur sun mam mba ata yat tuo d’a, wani ang tang mba sut tangû.
20Wani le sama d’ingêrâ mi ar sun mam mba d’ingêra woyo, nga mi le sun nda ata yat tuo d’a ni, an mba tinim vama dap asema avoromu, mi mba mid’a. Kayam ang gum nga humam mbuo, mba mi mit kur tcho mamba, an mba ni djib’er yam sun mam mba d’ingêr ra mi lata d’uo d’a, wani an mba ni djobom mad’am natang angû. 21Wani le ang ge sama d’ingêrâ humam ala ar mi le tchod’a d’uo, le mi le nga tchod’a d’uo ni, gagazi, mba mi kak karid’a. Kayam ang gum humamu, ang tang mba sut tangû.
Alona mi d’el Ezekiyel bei de zlad’a
22Ma didina mi tin abom kan kua, mi dan ala: Ang nde i kur hora. Ni kua ba, an mba ni dang zlad’a.
23An tchola, an i kur hora. Gol wani, subura hi Ma didinid’a nga tchola d’igi sana na hle tat d’igi subur ra an wat avun alum ma Kebar-rid’a na. Ata yi máma an ge tan kä avoromu. 24Muzu’â hAlonina mi kal kurunu, mi tcholon akulo kasenu. Ma didina mi dan ala: Ang i avo hatangû, ang duk vuna kangû. 25Wani ang gor sana, a mba vang ki ziyona, a mba djining kiya, ang mba nde woi abu aduk suma d’uo d’a. 26An mba ni b’alang sinang akulo ata d’id’igang tala ang kak sama ndumîd’a bei de zlad’a d’a, tala ang fe lovota á ngobozi d’uo d’a, kayam azi nandjaf ma bei hum vuna ba na. 27Fata an dang zlad’id’a, an mba ni malang vunang ngeyo, ang dazi ala: Wana ni zla d’a ded’a hi Salad’a Ma didinid’a. Sama mi min huma, ar mi huma. Sama mi min hum mbuo na, ar mi hum mbuo mi, kayam azi nandjaf ma bei hum vuna ba na.
Currently Selected:
Ezekiyel 3: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
