Buzuk ka Abud’a 25
25
VUN MA HE MA YAM MINDA HI ZLUB’UD’INA
(25—31)
Abo ma zlapa hi Israel-lîna
1Ma didina mi de mi Moise ala: 2Ang de mi Israel-lâ ala a mban he d’a hawad’a. Agi vagi he d’a hawad’a abo nge nge pî ma hat ki min mambina. 3Wana ni he d’a hawa d’a agi vat abozid’a: Lora, kawei ma hapma ki kawei ma hleuna, 4baru d’a botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata, tumus b’ogeina, 5bak gamlâ ma a tchorom hleud’ina, bak azar ma aduk mbina kä ma a yum ala dofênina kagu kasiyana, 6mbul ma yam lalambina, mbul ma his ma djivi ma a tolom aduk mbul ma a vom yam suma á tinizi ki irazi vazina ki dubang ma his djivid’a ma ngala, 7ahina onisa#25.7 ahina onisa: Nala, nahina d’a guzut kal teglesa. A yat ki vun francais-na ala: Onyx. kahina d’a ding nga guzut kal teglesa yam baru d’a efod’a ki d’a didik ka yam ma ngol ma ngat buzunid’a. 8Azi minin zlub’u d’a kud’ora tala an kak adigaziya d’a. 9Agi lagizi kahle suma a le ki sunda kurutna pet d’igi an nga ni tagagizi na.
Zandu’â hAlonina
10Ma didina mi de kua ala: Agi lagi zandu’â kagu kasiyana; fiyagam metred’a tu ki nus metred’a, bubuwam ki fiyagam mba akulod’a santimetred’a dok kid’iziya yam vavahl. 11Agi gulud’um hurum ki huyogom ki lor ra kal teglesa, agi tinim vunam ma dalalâ ki lora pet mi. 12Agi yorogi b’alang ma lora fid’i, agi nigizi ata kengêm ma fid’ina, mbà abo hî, mbà abo hî mi. 13Agi kagi agu kasiyana karangâlina mbà, agi gulud’umî ki lora. 14Agi nigim kur b’alang ma nga keng zandu’îna á zim kiya. 15Karangâli ma kalam kur b’alang ma keng zandu’îna, ar sa mi pad’am mbei d’i. 16Ang tchuk ahina d’a bebed’e d’a tchet ta mbà d’a an mba ni hangzi d’a an b’ir vun man ma djinda kuad’a kä kur zanduk máma.
17Agi lagi zandu’â vunam ma duka ki lor ra kal teglesa; fiyagam metred’a tu ki nus metred’a, bubuwam santimetred’a dok kid’iziya yam vahl. 18Agi lagi angus tcherebê ma lora mbà akulo yam zandu’â vunam ma duka ata vunam ma dabi ma mbàna. Agi lagizi ni ki lor ra bed’et teid’a. 19Agi tinigi tcherebêna tu abo hî, tu abo hî. Tcherebê suma mbà ndazina a mbut ni vama tuna ki zandu’â vunam ma duka. 20Tcherebê suma mbà ndazina, agi tinizi gigingâzi iram akulo á duk yam zandu’â vunam ma duka, agi tinizi irazi ngrufa ir taziya, agi arazi irazi ped’a kä yam zandu’â vunam ma duka. 21Agi tchugugi ahina d’a bebed’e d’a tchet ta mbà d’a an mba ni hagizi d’a an b’ir vun man ma hed’a kuad’a kä kur zanduk máma, agi tinigi zandu’â vunam ma duka akulo yam zandu’â mi. 22Nata yi máma ba, an mba ni ngavang akulo yam zandu’â vunam ma duka aduk tcherebê suma mbà suma agi tinizi akulo yam zanduk manina. Ni kua ba, an mba ni hang vun man ma hed’a pet ma yam Israel-lîna.
Tabul ma a mba tin avungôna mAlona kama
23Ma didina mi de kua ala: Agi minigi tabulâ kagu kasiyana; fiyagam metred’a tu, bubuwam nus metred’a, fiyagam mba akulod’a santimetred’a dok kid’iziya yam vahl mi. 24Agi gulud’umî ki lor ra kal teglesa, agi tinim vunam ma dalalâ ki lora pet mi. 25Agi nguyum aguna avunam akulo bubuwam santimetred’a klavandi, agi gulud’ugi vun agu máma ki lora pet mi. 26Agi yorom b’alang ma lora fid’i, agi nigigizi ata kengêm ma fid’i ma go kasem ma fid’inina. 27B’alang máma agi kalam ngagad’a go kasem tabulâ á ve ki karangâlina á hle ki tabulâ. 28Agi kagi agu kasiyana karangâlina, agi gulud’um ki lora á hle ki tabulâ. 29Agi minim taza mama, kop mama, angulei mama kagolongeî mam suma a vo süm guguzlu d’a he d’a hawad’a kuana. Agi lagi ahle ndazina pet ni ki lor ra kal teglesa. 30Agi tinigi avungô ma a tinim iram vam mi ana avogon yam tabul máma burâ ki burâ.
Agu ma a mba tin lalam ma gragam kid’iziyana
31Ma didina mi de kua ala: Agi minigi agu ma a tin lalamba kama ni ki lor ra kal tegles sa a bed’eta, agi lum asemu, aguwamu, yam ma angal-angalâ, gazlamu, ki b’om pet ni kandjaf lor ra tu ndata. 32Abom karagaya, hindi abo hî, hindi abo hî mi. 33Ata abom ma tuna agi lagi vana kua d’igi vud’agu amandena na ki gad’am ki b’om mi. Ata abom ma hina, agi lagi hina dedege mi. Agu ma tin lalamba abom ma karagayana, mi lumî hina pet mi. 34Ata huyok agu lalamba agi lagi vana d’igi angal-angal na fid’i ma hle tam d’igi vud’agu amandena na na kua ki gad’am ki b’om mi. 35Abom ma mbàmbà ma nga ata aguwam ma ngolîna, agi tinigi vana d’igi gad’aguna na kua tutu pet. 36Gad’aguna kabom ma a tin lalamba kama, agi lumî ki lor ra tu ndata; agu lalamba ki zlam pet agi lumî ki lor ra kal tegles sa a bed’eta. 37Agi minigi lalamba kid’iziya, agi dot akud’a, agi ndjarat agi tinit akulo yam abom ma kid’iziyana á b’o yina woi avorod’u. 38Agi lagi mangas sa ngat vun ziyo lalamba ki yima tchuk butna ni ki lor ra kal teglesa mi. 39Agi yogi lor ra kal teglesa ir kilona dok hindi, agi minigi kagu lalamba kahle mam suma sunda pet.
40Moise, ang gol tang djiviya, ang i lahle ndazina dedege d’igi an tagangzï akulo yam ahinad’a ka hî na.
Currently Selected:
Buzuk ka Abud’a 25: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
