Buzuk ka Abud’a 24
24
Alona mi djin vunam ki Israel-lâ
1Ma didina mi de mi Moise ala: Ang djagï geven yam ahinad’a akulo zlapa ki Aron, Nadap, Abihu ki suma nglo suma Israel suma dok kid’iziyana mi. Agi igi sä woi hina dei, agi grivigi kä andaga. 2Ni ang Moise tu ba, ang hud’ï geven an Ma didina. Suma dingâ a hud’ï go d’i, suma ablauna a djagï yam ahinad’a ki sed’eng nguo mi.
3Moise mi mba, mi de zla d’a Ma didina mi dumzid’a ki vun ma he ma mi humzina pet mi Israel-lâ.
Israel-lâ ki zla tazi pet a hulongôm zla d’a ded’a ki vun ma tuna ala: Ami mba lami ahlena pet suma Ma didina mi dami kazina.
4Moise mi b’ir ahle suma Ma didina mi dumzina pet. Mi tchol ki yorogo tcholola, mi min yima ngal ahle suma ngat buzuna ad’u ahinad’a kä, mi ndjar ahinad’a dogo yam mbà akulo kad’ut ngad’a yam andjafâ hi Israel ma dogo yam mbàna. 5Mi sun gro azungeî suma Israel-lâ á hahle suma ngat buzu suma ngala mi Ma didina, á ngad’am amuzleina ahle suma ngat buzu suma zlap darigïd’a mi. 6Moise mi go buzu ma mi vom kä kur halîna nus, mi yam buzu ma nus ma ar kä na yam yima ngal ahle suma ngat buzuna. 7Mi hle mbaktum mba a djin vunazi kua ki Ma didinid’a, mi ndumut avok Israel-lâ.
Azi de woi ala: Ami mba lami ahlena pet suma Ma didina mi damizina, ami mba humum vunam mi.
8Moise mi go buzu ma kä kur halîna, mi yamam yam Israel-lâ, mi dazi ala: Wana ni buzu ma Ma didina mi djin vunam kam ki sed’egi yam zla d’a pet ta mam dagizid’ina.
9Bugola, Moise azi ki Aron a djak akulo zlapa ki Nadap, Abihu ki suma nglo suma Israel suma dok kid’iziya ndazina mi. 10Azi wAlona hi Israel-lîna. Vana nga ad’u asem kä bebed’ed’a hle tam d’igi ahina safir ra#24.10 ahina safira: Nala, nahina d’a guzut kal tegles sa d’udjo mata botlozid’a d’igi akulod’a na d’a. botlozid’a na d’igi akulod’a tata na mi. 11Alona mi le nga suma nglo suma Israel ndazina va d’i. Azi wumu. Bugola, azi të azi tchë.
Moise mi ngaf kAlona yam ahinad’a
12Ma didina mi de mi Moise ala: Ang djagï akulo geven ka hî yam ahinad’a, ang kak kua. An mba ni hang ahina d’a bebed’e d’a tchet ta an b’ir gata ki vun ma hed’a kuad’a, kayam ang had’aziziya. 13Moise mi tchol kazong mama Josue, a nde djak akulo yam ahinad’a hAlonid’a.
14Kid’a mi djak akulod’a, mi de mi suma nglo ndazina ala: Agi djubumi nga ka hî gak ami hulongômï gevegiya. Gola! Aron azi ki Hur a nga ki sed’egi wana. Le sa nga ki zla d’a sariyad’a ni, agi daziziya. 15Ata yima Moise nga mi djak akulo yam ahinad’ina, d’ugula kulup yam ahinad’a b’eb’et. 16Subura hi Ma didinid’a ti nde woi yam ahina d’a Sinai-d’a, d’ugula dugut yat b’eb’et gak burâ karagaya. Kur bur ma kid’iziyana Ma didina nga mi yï Moise kur d’ugula. 17Subura hi Ma didinid’a ti nde woi ir Israel-lâ ni d’igi sin aku d’a nga d’i ngal akulo yam ahinad’id’a na. 18Moise mi kal kur d’ugula, mi djak akulo yam ahinad’a, mi le burâ dok fid’i falei kandjege akulo yam ahina ndata.
Currently Selected:
Buzuk ka Abud’a 24: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
