Kolos-sâ 4

1Agi magumeina suliyozina, ar agi lazi ni vama djivina ki vama ata yama, kayam agi wagi ala Salagina sä akulo mi.

Zla d’a tchenda

2Agi aragi bei tchen Alona d’i, agi kagagi ki ndjola, agi lagi mersi mAlona mi. 3Ar agi tchenegi Alona kami mi kayam mi malami lovota á tchami wal zla ndata, á vami ad’u zla d’a mudurid’a hi Christ-sa woi abu mi. Ni kat ba, a gan dangeina. 4Agi tchenegi Alona, kayam an vat ad’ut tei abu tetet tala ndak á ded’a d’a.

5Ar agi tid’igi ki ned’a aduk suma bei he gagazid’ina, ar yina mi kalagi d’i. 6Ar zla d’a djivid’a ndavunagi teteu á le suma tazi djivid’a d’igi ndjuvuna na, kayam agi wagi lovota á hulong zla d’a ded’a mi sama lara ge pet.

Dep pa dabid’a

7Tisik wiyei ma hurun vum heî ma d’engzengâ ndran ma sun ma yam Salad’ina, mba mi vagi ad’u zla manda pet. 8Kayam ndata, an sunugizi sä kayam mi vagi ad’ud’a yam kak mamid’a á siragi mi. 9An sun sä Onesim, wiyen ma d’engzeng ma an le kam heîna, zlapa ki mamu. Mam mi wiyegina. Azi mba vagi ad’u ahlena pet suma a le ka hina.

10Aristarik ndran ma dangeina, mi gagi depa. Marik ma Barnabas abamba gorotnina, mi gagi depa mi. Ni ma an dagizi zlam avok ala le mi mbaza hatagiya ni, agi vum atagi djiviya na. 11Jesus ma a yum ala Justus-sâ, mi gagi depa. Suma hindi ndazina ni Juif suma mbut huruzi á le sunda zlapa ki an yam leud’a hAlonid’ina. Azi b’lengên hurun ngola.

12Wiyegina Epafras azongâ hi Jesus Christ-sâ, mi gagi depa. Mi nga mi so tam kur tchen mamba kagiya, kayam agi ndagagi memet á wagi minda hAlonid’a tetet mi. 13An nga ni le glangâsâ kamu, mi kau kagi heî, mi kau yam suma avo Lawodise-na ki suma avo Hiyerapolis-sâ mi. 14Luc dokdor ma ami lami kam heîna azi ki Demas, a gagi depa.

15Agi gagi b’oziyoi suma Lawodise-na depa, zlapa ki Nimfa ki Tok ka avo hatata mi. 16Ata yima agi le ndumugi mbaktum ndata adigagiya ni, agi i ndumut aduk Tok ka Lawodise-d’a mi. Agi tagi ndumugi mbaktumba hi suma Lawodise-nid’a mi. 17Agi dagi mi Arkip ala: Ang gol tang djiviya, ang ndak vun sun nda Salad’a mi hangzid’a memet.

18Ni dep pa an Paul an b’irit kabonda. Ar agi djib’eregi yam dangei mana.

Ar Alona mi vagi sumad’a mi.

Currently Selected:

Kolos-sâ 4: BA

Highlight

Copy

Compare