Kolos-sâ 3

1Alona mi tchologi akulo á kak karid’a zlapa tu ki Christ. Kayam ndata, ar agi halagi nahle suma sä akulona, ata yima Christ mi nga kaka kua ata Alona bigam mba ndjufina. 2Ar agi tinigi hurugi ni yam ahle suma sä akulona, wani agi tinigi hurugi yam ahle suma yam andagad’a ka hina d’i, 3kayam agi bogi wa woyo, ari magid’a sä ngeid’a zlapa tu ki Christ abo Alona. 4Fata Christ ari meid’a nde woid’a, agi mba buzugugi woi zlapa tu ki mam kur subur mamba mi.

Tit ta adjeud’a ki tit ta awilid’a

5Kayam ndata, agi tchagi ahle suma kurugi suma yam andagad’a ka hina woyo, nala, mizeuna, sun nda ndjendjed’a, e’eûd’a, a’arad’a ki d’od’ok ka tuwal fileina mi. 6Ni kayam ahle ndazina ba, ayîna hAlonina nga mi mba yam suma bei humum vunam ba na. 7Adjeu d’a agi nga kaka kur tcho magid’id’a, agi tid’igi ni kur ahle ndazina.

8Wani ki tchetchemba, agi aragi ahle ndazina woi pet, nala, ayîna, hur ma zala, ngangata, ngula ki zla d’a de d’a ndjendje d’a ndavunagid’a mi. 9Agi kagi zlad’a mi tagi d’i, kayam agi fogogi wa sa magi ma adjeuna woi ki sun mam mba led’a da’. 10Agi tchugugi sama awilina atagi d’igi barud’a na, ni ma nga mi mbut awilid’a á we gagazid’a dedege d’igi mam ma guma na na. 11Kayam ndata, Juif-fâ kandjaf suma dingâ a nga d’i, ma ngat bayâd’a ki ma bei ngat bayâd’a nga d’i, sama abageina ki sama avona nga d’i, magoma ki gor vuta nga d’uo mi, wani Christ ni ma nga kazi pet kuruzi petna mi.

12Kayam ndata, agi suma Alona mi managi suma yed’et suma hurum vagi heîna, agi tchugugi we hohoud’a ki od’a ki djivi d’a led’a ki ge yam mba kad’a ki lulumad’a ki ve tad’a atagiya. 13Agi vagi tagi yam tagiya, agi vad’agi hurugi woi yam tagi mi. Le sa adigagi mi nga ki zlad’a ki ndrama ni, ar a vat huruzi woi yam tazi d’igi Salad’a hurum vat tei kagi na mi. 14Kal pet, ar agi tchugugi o d’a ala ni ziyo ma ndak á djinigi tuna d’a atagiya. 15Ar b’leng nga halasa hi Christ-sa ti kak kurugiya. Ni kayam ndata ba, mi yagi kur hliu ma tuna. Ar agi lagi mersi mAlona mi.

16Ar zlad’a hi Christ-sa ki ndjondjoî mata ti kak kurugi ngola, ar agi had’agi tagiya, agi gigid’egi tagi ki ned’a pet ki giled’a ki sawala hAlonid’a ki sawala hi Muzuk mamid’a mi. Ar agi gilegi Alona ki sawala kurugi mi. 17Kur ahlena pet suma agi lagizina, le ni zla d’a ded’a, d’oze le ni sunda, ar agi lagizi pet ni ki simiyê Salad’a Jesus. Agi lagi mersi mAbui Alona ki simiyêm mi.

Tita hi sanid’a kur ari d’a awilid’id’a

18Agi aropma, agi gagi yagi kä ad’u andjuviyogiya. Hina wani, ni vama djivina avok Salad’a.

19Agi andjuveina, agi lagi yam amiyôgina, agi djozi ki zlad’a d’i.

20Agi gugureina, agi gagi yagi kä ad’u simiyêgi kur ahlena pet. Hina wani, ni vama djivina avok Salad’a.

21Agi simiyêziya, agi djozi ki zlad’a tala tazi tchuk lus suo d’a.

22Agi magumeina, agi humugi zlad’a hi suliyogi suma yam andagad’a ka hina kur ahlena pet. Agi lagi ni ir suma á lazi tazi djivid’a go d’i, wani agi lagi ni ki hurugi pet yam mandarâ hi Salad’ina. 23Sun nda lara ge pet ta agi nga lata, agi lagizi ni ki hur ma tuna yam Salad’a, nga ni yam suma d’i. 24Kayam agi wagi ala mam mba mi wuragagi kahle suma mam nga mi ngomozi yam sum mamina, kayam Salagi ma gagazi ma agi nga lum sundina ni Christ. 25Sana nga mi le tchod’ina mba mi fe ni tcho d’a mi lata, kayam Alona nga mi pat sana yam iram go d’i.

Currently Selected:

Kolos-sâ 3: BA

Highlight

Copy

Compare