2 Tasaloni’â 3
3
Agi tchenegi Alona kamiya
1B’oziyomina, vama arâ, agi tchenegi Alona kami kayam zlad’a hi Salad’id’a ti zul avogovogo, ar suma a suburut d’igi agi suburut na mi. 2Ar agi tchenegi Alona kamiya tala mi sud’umi woi abo suma tchona ki suma asa’atna d’a, kayam suma pet ni suma a he gagazid’ina d’i.
3Wani Salad’a ni Ma d’engzengâ, mba mi siragiya, mba mi ngomogi abo Ma tchona mi. 4Kayam Salad’a, ami wami ala agi nga lagi ahle suma ami hagi vuna kazina, agi mba lazi avogovok mi.
5Ar Salad’a mi minigi hurugi á le od’a yam Alona ki ve ta d’a Christ mi heizid’a.
Mbeî agi lagi sunda
6B’oziyomina, ami nga hagi vuna ki simiyê Saleina Jesus Christ ala ar agi walagi woi ki b’oziyoina pet suma azulom suma a nga tit bugol hat ta ami had’azizid’a d’uo na. 7Kayam agi tagi wagi ala djivid’a agi tid’igi balum asemiya, kayam kak mami d’a adigagid’a ami lami nga azulomba d’i. 8Ami tami nga avu hi sa hawa d’i, wani kur ndaka ami lami sunda andjege ki faleya, kayam ami mbud’umi vama anek yam sa adigagi d’i. 9Ami ndak á vami ahlena abogiya, wani ami lami nga na d’i, kayam ami mbud’umi ni vama simata avorogi kayam agi hlagi balum asemiya. 10Kid’a ami nga ki sed’egi tua d’a, ami hagi vuna ala: Sama min le sunda d’uo na, ar agi hum tena d’i.
11Kayam ami humumi ala suma ding suma azulomba a nga adigagiya, ni suma a min le sunda d’uo na, ni suma a hak tazi kur zlad’a hi suma dingîd’ina. 12Suma hina na, ami gad’aziya, ami hazi vuna ki simiyê Salad’a Jesus Christ ala a kak tchugot, a le sunda á fe te mazina mi.
13Wani agi b’oziyomina, ar tagi tchuk lus yam sun nda djivi d’a led’a d’i. 14Sama ge nga yam kä ad’u zla d’a ami b’irit kur mbaktum mba wanda d’uo ni, agi gologi tagi djivi ki sed’emu. Ar agi zlabagi ki sed’em mbi, kayam zulona lumu. 15Ar agi golomî d’igi magi ma djangûna na d’i, wani agi gad’am d’igi wiyegina na.
Dep pa dabid’a hi Paul-la
16Ar Salei ma b’leng nga halasa, mi hagi b’leng nga halasa teteu ata yina pet. Ar Salad’a mi kak ki sed’egi pet mi.
17Wana ni dep pa an Paul ni b’irit kabonda. Wana nabon ma tin ma kur mbaktum manda petna. Wana ni b’ir manda mi.
18Ar Saleina Jesus Christ mi vagi sumad’a pet.
Currently Selected:
2 Tasaloni’â 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.