2 Samuel 23
23
Zla d’a de d’a dabid’a hi David-ta
1Wana ni zla d’a de d’a dabid’a hi David-ta:
Ni zlad’a hi an David Jesse goromid’a;
ni zlad’a hi an ma Alona tinin ngolina,
ma Alona hi Jakob-ma mi manan mi tinin amulina,
ni an ma hle sawal la djivid’a hi Israel-lîna.
2Muzu’â hi Ma didinina mi zud’un á de zlad’a;
zla mamba nga avunanu.
3Alona hi Israel-lîna mi de,
ahinad’a hi Israel-lîd’a ti dan ala:
Sama nga mi te yamba aduk suma ki d’ingêrina,
nga mi te yamba kur mandarâ hAlonina,
4mi ni d’igi b’od’a hafat ta deî yorogod’a na,
mi ni d’igi yorogo d’a bei d’ugula ka kua bad’a na,
mi ni d’igi b’od’a hafat ta ti nde balum alo ma se
d’a ar asu ma awilina mi deîd’a na.
5Alona mi le hina ki sum mana d’uo zu?
Mi djin vun ma didina ki sed’enu;
vun ma djin ma djivi máma mi nga mi ngomomu.
Sut manda kahle suma djivina pet suma an minizina,
a mba tcholï natam mam mbuo zu?
6Wani suma bateina pet
a ni d’igi awei d’a kat gat tei ba
sa nga mi vat kabom mbuo d’a na.
7Sama mi dotna mi dot ni ki kaweina
d’oze agu asapa, mi ngalat ni ata yat máma.
Grang suma dur ayîna hi David-na
(Gol 1 Sun hAm 11.10-47)
8Wana ni simiyê grang suma dur ayîna hi David-na: Isebäl ma Hakmon-na; ni ma a yum ala Adino ma Es-sâ na mi; ni ma yam grang suma hindina; ni ma yam tu mi i tchi suma kasap mamba kikisa klavandina.
9Ma kama ni Elazar Dodo goroma, mam mi Ahohi gorom ngolona. Mam mi ma aduk grang suma hindi suma a i ki David-na. Ata yi máma a nde Filistê-na ata yima a tok tazi á dur ayînina, Israel-lâ a yo ringâ avoroziya. 10Elazar mi ar tchola ngingring, mi tchi Filistê-na baba abom mi ar ngrufa ata mbigeu mam mba fiyaka ngingi. Ma didina mi hum ad’enga mi kus ayîna kur bur máma. Israel-lâ a hulongî blogom ná hurum ahlena hi suma mi tchazina hol.
11 Samma Age ma Harar-râ goroma ni ma yam Isebäl azi á hindid’ina. Filistê-na a tok tazi avo Lehi ata yima asine ma alitna nga kuana. Israel-lâ a wet ringâ avok Filistê-na. 12Wani Samma mi ar tchola kur asinena á ngomomu, mi tchi Filistê-na. Ma didina mi hum ad’enga mi kus ayî ma ngolâ.
13Suma hindi suma aduk grang suma dok hindina a i gen David kur yima fet awuna; David mi sä kur zul ahina d’a Adulam-mba, Filistê-na a ve nga anguvora kur hor ra Refa-d’a. 14David mi nga ata yam ma ngeid’a; Filistê-na a ve nga kang mazina avo Betelehem. 15David zla mbina lumu, mi dala: Ni nge ba, mi i mi gulunï mbiyo ma kur golong nga sä avun azì ma Betelehem-ma á tched’a ge?
16Grang suma nglo suma hindi ndazina a b’at kangâ hi Filistê-nina kad’enga, a gulï mbiyo ma kur golong nga sä avun azì ma Betelehem-mid’a, a mbam mi David. Wani David mi tchum nga d’i, mi hum he d’a hawad’a mi Ma didina, mi vom kä woi andaga. 17David mi dala: Ma didina, ar an lahle ndazina d’i. Wana ni buzuna hi suma a he tazi woi á matnina d’uo zu? Mi tchum nga d’i. Wana ni vama grang suma hindi ndazina a luma.
18 Abisai Jowap wiyema Seruya gorotna ni ma ngolâ hi grang suma dok hindina. Ni ma mi tchi suma kasap mamba yam tu kikisa hindina; simiyêm mi yï aduk grang suma dok hindina. 19Subur mamba kal suma dok hindina; ni hina ba, a tinim ngol mazid’a, wani mi ndak nga ki suma hindi suma avok ndazina d’i.
20 Benaya Jehojada ma Kapsel-lâ goroma ni sama zlam nde yina ki sun mam mba ndandal la mi lat heîd’a. Mi tchi suma Ariyel suma Mowap-ma mbà. Bur ma dingâ mi tchazlona kur golonga kur bur ma alona se nesâ#23.20 Nesâ: Nala, vama hap ma ab’lenga d’igi mogeina na na. A yum ki vun francais-na ala: La neige. kuana. 21Bur ma ding ma hina kua, mi tchi ma Ezipte ma fiya’â. Ma Ezipte máma mi nga kasapa abomu, wani Benaya mi i atam ki totogod’a, mi prut asap pa abomba, mi tchum kasap mam mba tata go. 22Wana ni vama Benaya Jehojada goroma mi luma. Ni hina ba, simiyêm mi yï aduk grang suma dok hindina. 23Subur mamba kal grang suma dok hindina, wani mi ndak nga ki grang suma hindi suma avok ndazina d’i. David mi tinim ma ngolâ yam azigar suma avo hatama.
24Suma ding suma aduk grang suma dok hindina ba wana: Asayel Jowap wiyema; Elanan Dodo ma Betelehem-ma goroma mi; 25Samma ma Harot-na; Elika ma Harot-na; 26Heles ma Pelet-na; Ira Ikes ma Tekowa-na goroma; 27Abiyezer ma Anatot-na; Mebunai ma Husa-na; 28Salmon ma Ahowa-na; Maharai ma Netofa-na; 29Helep Bäna ma Netofa-na goroma; Itai Ribai ma Gibeya d’a Benjamin-nda goroma; 30Benaya ma Piraton-na; Hidai ma Nahale-Gäs-sâ; 31Abiyalbon ma Araba-na; Azimavet ma Bahurim-ma; 32Eliyaba ma Sälbon-na; Bene-Jasen; Jonatan; 33Samma ma Harar-râ; Ahiyam Sarar ma Harar-râ goroma; 34Elifelet Ahasbai ma Mäka-na goroma; Eliyam Ahitofel ma Gilo-na goroma; 35Hesrai ma Karmel-lâ; Pärai ma Arap-ma; 36Jigeyal Natan ma Soba-na goroma; Bani ma Gat-na; 37Selek ma Amon-na; Naharai ma Bërot ma nga mi zi ahle suma sïna hi Jowap ma Seruya gorotnina; 38Ira ni ma Jeter-râ; Garep ni ma Jeter-râ mi, 39ki Uri ma Het-na mi. Azi pet ni dok hindi yam kid’iziya.
Currently Selected:
2 Samuel 23: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
