2 Samuel 22
22
David mi hle sawal la bangâna
(Gol Saw Gil 18.1-51)
1Ata yima Ma didina mi prut David tei abo mam suma djangûna petna, kal pet nabo Saul, ata yi máma David mi hle sawal la wanda mi Ma didina:
2Mi dala:
Ma didina nahina man nda ndjununda;
ni gulumun ma ad’eng ma sud’una;
3Alo mana nahina man nda an ngei tan kuad’a,
mam mi mbarei manda, mam mi ad’eng nga sud’unda,
mam mi yima an sut tan kuana.
Ma sud’una, ang sud’un ndei kur yima tchona.
4An nga ni dala:
An nga ni gile Ma didina,
kayam me ata yima an yuma,
mi sud’un ndei abo man suma djangûna.
5Kayam abilâ hi matnina mi nguyunu,
abil matna mi mbud’un mandarâ
d’igi mbiyo ma djang wü na na.
6Ziyona hi yima azuleinina mi nguyun wa,
dauna hi matnina mi nga gunda kä avoronu.
7Kur yor ta manda, an yi Ma didina,
an nga ni yi Alo mana.
Ata yam ma kaka mi humun delen kur gong mamba,
tchi mana mi ndeza humamu.
8Ata yima hurum zalâ,
andagad’a ti yir gigidji, ti giget mi;
ad’u ged’a hakulod’id’a ti yira,
andagad’a kakulod’a a giget mi.
9Andosâ mi buzuk kei atchinamu,
sin akud’a ti nde woi avunamu,
nga d’i yak tchutchum d’igi gordjona na.
10Mi hud’ï akulod’a kä,
mi tchuk asem kä kad’u;
d’ugul la wurad’a nga ad’um kä.
11Mi nga yam tcherebêna, mi pir akulo;
mi nde tam mbei aduk simetna.
12Mi d’ut tam ki nduvunda,
mbina ki d’ugul la wura d’a i’îlika ni zlub’u mamba,
13sin akud’a ki gordjona a yak kä.
14Ma didina mi breî ei akulo d’igi alona mi breî na,
Ma kal teglesâ delem nga d’i zla ngungur.
15Mi yet man suma djangûna ki yeû mamba,
mi b’rawazi woyo;
wile mamba ti ndjoyôzi woi vivreng.
16Ma didina, kayam ngop manga,
mbiyo aluma ad’um mba dabid’a nde woi abua;
kayam muzuk ka atchinanga,
andagad’a ad’ut ta ged’a nde woi pid’agi.
17Mi mad’ï abom akulo, mi vanu,
mi prud’un ndei abo ndak ka ngol la an nga kuruta.
18Mi prud’un ndei abo man ma djangû ma ad’engâ,
abo suma a noyôn suma a lan kad’engina.
19Ata yima an nga kur yor tad’ina,
azi mba kan dumuzi,
wani Ma didina mi mba mi van akulo atamu.
20Mi ndan ndei ata yima tchona,
mi gan akulo, kayam hurum vanu.
21Ma didina mi lan djivid’a ni yam d’ingêr manda,
mi hulong lan djivid’a
ni kayamba abon do nga vama tcho d’uo d’a.
22Kayam an nga ni tit kur lovota hi Ma didinid’a
an le nga asa’ata avok Alo mana d’i.
23An nga ni tit yam vun ma he mama pet,
an nga ni tchila yam gat mamba d’i.
24An nga ki zla kan avorom mbi,
an ngom tan ped’et bei le tchod’a.
25Ni kayam ndata ba,
Ma didina mi wuragan yam d’ingêr manda,
yam abon ma do nga tcho avorom mbuo na mi.
26Sama d’engzengâ, ang nga tagam d’engzeng manga;
sama d’ingêrâ, ang nga simid’am d’ingêr manga mi,
27sama yed’etna, ang nga tagam yed’et manga,
sama nga mi le sun nda ata yat tuo d’ina,
ang nga simid’am sun nda ata yat tuo d’a mi.
28Ang tanga nga sut suma a nga kur hohoud’ina,
wani ang nga hulong suma a hle yazi akulona yazi kä.
29Ma didina, angî lalam manda,
Ma didina, ang b’o yima nduvun ma an nga kurâ woyo.
30Ni kayam ad’eng manga ba,
an nga ni nde b’rang nga ngola ayîna;
ni kayam ang Alo mana ba,
an nga ni pir yam gulumun ma ad’eng ma ngunguna mi.
31Alona lovot mamba ni d’ingêr,
Ma didina zla mamba, suma a wat ala ni zla d’a irata.
Mam mi mbareid’a hi suma pet suma a deng tazi atama.
32Alo ma iratna ni nge? Ni Ma didina;
Ahina d’a irata ni nge? NAlo meina.
33Alona ni gulumun man ma ad’eng ma ngunguna,
ni ma nga mi minin lovota avorona.
34Mi mbud’un asen ad’enga d’igi ma hi pandrid’ina na,
nga mi tinin á tita yam ahuniyôna akulo.
35Mi had’an á dur ayîna,
mi han ad’enga á gan kawei ma hleuna yeûd’a.
36Ang Alona ni mbarei man nda suta,
yam djivi manga ang mbud’un ma ngolâ.
37Ang mal lovota avoron á ringâ atogo,
va nga mi daban asen ndi.
38An nga ni dik man suma djangûna, ni tchaziya,
an nga ni hulong bei dabazi tchid’a woi d’i.
39An mba ni tchalazi tchid’a, an mba ni dabazi woyo.
Sa mba mi tchol akulo avoron ndi;
azi mba puk kä,
an mba ni tin asen kelezi kä.
40Ang han ad’enga á dur ayîna,
ang hulong man suma djangûna yazi kä ad’unu.
41Ang ar man suma djangûna a ring avoronu,
suma noyôna, an dabazi tchid’a woyo.
42Azi nga gol iraziya, wani sama ndjunuzi nga d’i;
azi nga yi Ma didina, wani nga mi humuzi d’i.
43An nga ni lud’uziya,
an mbud’uzi ni d’igi guguma na,
an mba ni mired’ezi kä
d’igi suma a miret lubu ma kur lovotina kä na.
44Ang prud’un ndei abo man suma a tchol huneîd’a ki sed’ena,
ang tinin yam andjaf suma;
andjaf suma an wazi nga d’uo na a lan sunda.
45Ata yima azi hum zla mandina,
azi ge yazi kä avoronu;
andjaf suma dingâ a mba hün ni ir mandarâ.
46Andjaf suma dingâ a tchuk susub’ok,
azi mba buzuk kei ki mandarâ kur gulumun mazi ma ad’eng ma ngunguna.
47Ma didina, angî ma nga na;
an nga ni gileng ang ahina manda,
an nga ni suburung ang Alo mana,
ang ahina manda, angî ma sud’una mi.
48Angî ma san atchuguluna,
angî ma hulong andjaf suma yazi kä ad’una.
49Ang sud’un ndei abo man suma djangûna,
ang tinin á kus ayîna yam man suma djangûna,
ang sud’un ndei abo sama murud’umba mi.
50Kayam ndata, Ma didina,
an mba ni suburung aduk andjaf suma dingâ,
an mba ni gileng simiyêng ki sawala mi.
51Ma didina, ang lahle suma ndandalâ
á sud’un an amul mangâ,
ang le djivid’a ki an amul ma ang manana,
nala, an David kandjavan gak didin.
Currently Selected:
2 Samuel 22: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
