1 Samuel 31
31
Filistê-na a tchi Saul ata yima dur ayîna
1Ata yi máma suma Filistê-na a dur ayîna ki Israel-lâ. Israel-lâ a ring avoroziya; suma a fe dakina a puk kä, a bo yam ahina d’a Gilbowa-d’a. 2Suma Filistê-na a hep Saul ki groma, a tchi Jonatan, Abinadap ki Malkisua Saul groma. 3Zozok ayîna mi tok yam Saul, suma yeûd’a a nga sisiwim yeûd’a, mi nga mi zlak abozi djidjik. 4Ata yi máma Saul mi de mi sama zim ahle mam suma sïnina ala: Ang pat mbigeu mang nga fiyaka, ang tchogonu; ar suma bei ngat bayâ ndazina a mba tchan tchi ba a lazan ndi.
Wani sama zim ahle mam suma sïnina mi min ndi, kayam nga mi le mandarâ ngola. Ata yi máma Saul mi pat mbigeu mam mba fiyaka, mi ge tam avunad’u. 5Kid’a sama zim ahle mam suma sïnina mi wum mi mit dad’a, mi ge tam avun mbigeu mam mba fiyaka, mi mit ki sed’em mi.
6Ni kur bur ma tu máma ba, Saul azi ki grom suma hindina ki sama mi zim ahle mam suma sïnina ki azigar mama pet a bo kua.
7Kid’a Israel suma a nga kaka abo hora abo hî na ki suma a nga kaka avun alum ma Jurdê-na woi abo hî na a we d’ala Israel-lâ a ring wa, Saul azi ki groma a tchazi wa mi d’a, a ar aziyazi a ringâ; suma Filistê-na a mba a kak kua.
8Tcha ndjivinda suma Filistê-na a mba á yo ahlena hi suma a tchazina, a fe mad’a Saul azi ki grom suma hindina yam ahina d’a Gilbowa-d’a. 9A ngat Saul yamu, a yo ahle mam suma sïna. Bugola, azi i de zla ndata woi kur ambas sa Filistê-d’a pet, kur gongîyo mazi suma fileina, aduk suma mi. 10Azi tchuk ahle suma sïna hi Saul-lâ kur gonga halo d’a a yat ala Astarte-d’a, azi b’alam mad’am akulo ata gulumun ma Bet-San-na.
11Ata yima suma a nga kaka avo Jabes sa Galät-tina a hum ahle suma Filistê-na a lazi ki Saul-lîna, 12andjof suma gangrangâ pet a tchola, a tit andjege gagak a mbaza Bet-San, a yoï mad’a Saul azi ki groma ata gulumuna. Bugola, a hulongî Jabes, a ngalazi woyo. 13A yozï asogozi a tozom ad’u atchin nda avo Jabes-sa, a d’el tazi bei te tena burâ kid’iziya.
Currently Selected:
1 Samuel 31: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
