1 Amuleina 6
6
Salomon mi min gong nga kud’ora hAlonid’a
(Gol 2 Sun hAm 3.1-14)
1Salomon mi tin ad’u min gong nga kud’ora hi Ma didinid’a ni kur biza d’a 480 bugol la Israel-lâ a buzuk kei kur Ezipte-d’a; ni kur biza d’a fid’i d’a Salomon mi kak amula yam Israel-lîd’a. Mi tin ad’u sunda ni kur til ma Zif-fâ, nala, til ma mbàna hi biza ndatina. 2Gong nga amulâ Salomon mi minit mi Ma didina á kud’uromba, fiyagat ni metred’a dok hindi, bubuwat ni metred’a dogo, fiyagat ta akulod’a ni metred’a dogo yam vahl mi. 3Gong nga avunata bubuwat ni metred’a dogo d’igi gonga bubuwat na; hurut ma krovona ni metred’a vahl mi. 4Amulâ mi min fenetred’a hi gong ndatid’a kaguna, a dugut ni ki kawei ma iram ndjâna. 5Mi min gongîyo suma yam ndrozina akulona hindi, huyok gong nga ngola abo hî abo hî nguyut tei d’uhl. 6Gong nga kä ad’ud’a bubuwat ni metred’a mbà ki nusa, d’a kat akulod’a bubuwat ni metred’a hindi, d’a akulo kat á hindid’a ni metred’a hindi ki nusa, kayam gulumun ma a minim huyok gong nga ngol la kud’ora hAlonid’ina bubuwam nga nabo tam tu d’i. Ma ad’u kä na mi kal ma akulo kam á mbàd’ina nde, ma mbàna mi kal ma akulo kam á hindina nde mi, kayam aguna mi do ata gulumuna hi gong nga ngolina, wani mi kal kur ri. 7Ata yima a nga min gong nga kud’or ndatina, a minit ni kahina d’a a minit tcheta woi adjeu panga, ang nga hum tumba hi martonid’a d’oze kad’a handjetnid’a d’oze tumba hi vama kawei ma ding tu d’uo mi.
8Gong nga ad’u kä d’a vunat ma kala nabo ma ndjufâ hi gong nga ngolina. A min yima djaka á i kur gong nga kat akulod’a nadugu, a le d’a hindid’a ni hina mi. 9Kid’a abom dap gong ndata mindid’a, a ndja agu sedrena akulo kad’u. 10Gongîyo suma a minizi huyok gong nga kud’orina d’a lara pî, fiyagat ta akulod’a ni metred’a mbà ki nusa, agu sedre ma katna mi ka’î yam dalalâ hi gong nga ngolina.
11Ma didina mi de mi Salomon ala: 12Ang nga min gong nga wanda mi anu. Le ang nga tit kur gat man nda teteng nga an hangzid’a, le ang nga ge yang kä ad’u vun man ma hed’a pet mi ni, an mba ni ndak vun vun ma djin ma an djinim kang ata yima an de zlad’a kabung David-na. 13An mba ni kak kur gong nga wanda aduk Israel-lâ, an mba ni ar man suma Israel-lâ woi d’i.
D’udjo d’a teteng nga krovo kur gongid’a
(Gol 2 Sun hAm 3.8-14)
14Ata yima azi dap sunda hi gong nga kud’ora hAlonid’id’a d’igi Salomon mi hazi vuna na na, 15mi ndja agu sedrena huyok gonga krovo ad’u kä dei gak akulo, mi ndja agu siprena kä kurut pet mi. 16Mi ndja agu sedrena huyok gong nga a minit sä a zut kur gong nga ngolid’a, agu máma fiyagam mba akulod’a ti ni metred’a dogo, mi minit hurut ma krovo ma a yum ala Yima a tinim iram vam ma kal teglesâ na. 17Gonga nga ngol la sä yam mba zandu’â nga kuad’a, fiyagat ni metred’a dok mbà. 18Agu ma krovo kur gongina a d’udjomî kahlena teteng, nala, vuta hanguveina ki b’o d’a woi mbumbuyîd’a. A duk agu sedrena yam kä woi pet, kayam sa mi wahinad’a woi d’i. 19Mi min hur gong nga sä a zut ndata á tin zandu’â hi Ma didinina kua. 20-21Yi máma fiyagamî metred’a dogo, bubuwamî metred’a dogo, fiyagam mba akulod’a ni metred’a dogo mi. Mi gulud’umî ki lor ra bei zozota ba d’a, mi gulut ki hur gonga pet mi. Vun ma kala hi yi mámina, mi tchuk erdje ma lora kua. Mi min yima ngal dubang ma his ma djivid’ina kagu sedrena, mi gulud’um ki lora mi. 22Gonga nga kud’ora ki ngolot pet mi gulud’ut ni ki lora, mi gulut yima ngal dubang ma his djivid’a ma nga avun gong nga zandu’â nga kuad’ina ni ki lora mi.
23Mi min agu olif ma abageina tcherebêna mbà á tcholozi kur gong nga zandu’â mi nga kuad’a; fiyagazi d’a akulod’a ni metred’a vavahl. 24Ma avo’â gigingâm fiyagamî metred’a mbà ki nusa, dabid’a hi giging ma lara pî ni metred’a vavahl. 25Ma mbàna ni metred’a vahl mi; min mamba ni dedege d’igi ma avo’â na mi. 26Ma lara pî fiyagam mba akulod’a ni metred’a vavahl. 27Salomon mi tchol tcherebêna kur gong nga zandu’â mi nga kuad’a. Gigingâzi nga ganga woyo, kayam giging ma avo’â mi do gonga, giging ma mbàna mi do gonga abo hî mi, giging ma mbà hina, mi ngruf hur gonga d’ad’ar yam yi máma mi. 28Salomon mi gulut tcherebê suma mbà ndazina ni ki lora.
29Mi d’udjo tcherebêna, amulongeîna ki b’o d’a mbumbuyîd’a kur gong nga kud’ora hurut ma mbàna. 30Mi gulut agu ma kä hur gong nga kud’ora hurut ma mbà máma ni ki lora mi.
31Mi le vun gong nga zandu’â mi nga kuad’a ni ki bap ma a malam abo hî abo hî na kagu olif ma abageina. 32Mi d’udjo tcherebêna, amulongeîna ki b’o d’a woi mbumbuyîd’a ata bap ma mbà ma avun gongina, mi gulud’umî ki lora. 33Mi le vun gong nga ngola, ni kagu olif ma abageina na mi. 34Agu ma mbà ma b’al bapma atama nagu siprena. 35Mi d’udjo tcherebêna, amulongeîna ki b’o d’a mbumbuyîd’a kua, mi gulud’uzi ni ki lora mi.
36Mi min atranga avun gong nga ngola kahinad’a a tched’eta djirdid’a hindi, mi gägu sedre ma bebed’e ma aduburo’â kat mi.
37Salomon mi le bizad’a fid’i kur amula tua ba, mi gäd’u gong nga kud’ora hi Ma didinid’a kur til ma Zif-fâ. 38Mi dabat minda pepet ni kur biza d’a dogo yam tu d’a mam tamulid’a ni kur til ma Bul-lâ, nala, til ma klavandina; mi le bizad’a kid’iziya atat á minda.
Currently Selected:
1 Amuleina 6: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
