1 Amuleina 5
5
(b) SALOMON MI MIN GONG NGA KUD’ORA
(5—8)
Salomon mi min tam á min gong nga kud’ora
(Gol 2 Sun hAm 2.3-16)
1Ata yima Hiram amul ma Tir-râ mi hum ala Salomon mi vrak wa tamula balum abum David’u na, mi sunï azungeî mama á ve banad’a ki sed’emu, kayam mam mi David banama.
2Salomon mi hulong sunda ata Hiram mi dum ala: 3Ang we, abun David mi ndak nga á min gong nga kud’ora mi Ma didina Alo mama abo mam suma djangû suma á nga durum ayîna abo hî abo hî na d’i, gak Ma didina Alo mama mi hum ad’enga, mi kus kaziya. 4Wani ki tchetchemba, Ma didina Alo mana mi han b’leng nga halasa adigami ki suma hagad’a ki leu mandina pet tala sama djangû d’oze vama tcho mi mba kan nduo d’a. 5Wani ki tchetchemba, an nga hurun á min gonga mi Ma didina Alo mana kayam mam de mabun David ala: Ni gorong ma an mba ni pad’am á vrak blangâng amulina ba, mba mi minin gong nga kud’or ra suma a mba kud’uron kuad’a.
6Salomon mi dum kua ala: Wani ki tchetchemba, ang he vuna mazungeî mangâ a i yam ahuniyô suma Liban-na, a kanï agu sedre ma an minima. Azungeî mana a mba i kazungeî mangâ á ndjunuzi kad’a. An mba ni wurak azungeî mangâ yam sun mazid’a vama ang mba ngandjina. An we avo hatami ka hî sama ndak á kaguna d’igi mang suma Sidon-na na na nga d’i.
7Ata yima amulâ Hiram mi hum zlad’a hi Salomon-ndina, mi le furîd’a ngola, mi dala: An he Ma didina ngola ini, kayam mi he ne d’a ngola mi David goroma á te yam ablau d’a ngola hi Israel-lîd’a.
8Hiram mi hulong humba mi Salomon ala: An hum zla mang nga ang dandjid’a djiviya. An min hang agu sedrena kagu sipre ma ang minima pet. 9Azungeî mana a mba yongza agu ma fiyak ma Liban-na, a mba tchugum avun alum ma ngolâ, a mba djinim ata tam á djangâm yam aluma gak a mbamza ata yima ang mba tagandjina. Ata yi máma azungeî mana a mba bud’um mbeyo; azungeî mangâ a mbeï yomu. Yam zla d’a wuraka, ang mba han te ma an minima yam suma avo hatana.
10Hina Hiram mi hagu sedrena kagu siprena pet mi Salomon d’igi mam min na. 11Wani Salomon nga mi hum afut gemena tonna 6000 ki mbul olif ma djivina lidirâ 8000 bizad’a ki bizad’a yam suma avo hatama.
12Ma didina mi he ned’a mi Salomon d’igi mi dum na. Salomon mi le darigïd’a ki Hiram, mi djin vunam ki sed’em ala azi wal lei d’i.
Salomon mi tin ad’u sun nda le d’a ad’enga
(Gol 2 Sun hAm 2.1-2,17-18)
13Amulâ Salomon mi yo suma sunda aduk Israel-lâ kad’enga 30.000. 14Til ma lara pî mi sun sumuna adigazi 10.000 yam ahuniyô suma Liban-na. Azi le sunda tilâ tu, a hulong le tilâ mbà avo hatazi mi. Adoniram ni ma yam sun ndatina. 15-16Salomon mi nga ki suma zi ahinad’a 70.000 ki suma tchet ahinad’a 80.000, wani bei ndum suma nglo suma 3300 suma Salomon mi tinizi á gol suma ablau suma a nga le sundina ba. Azi nga le sunda mi Salomon yam ahuniyôna akulo. 17A wak ahina d’a nglo d’a djivid’a aduk ahinad’a, a tched’et á ged’a kä ad’u gong nga kud’ora hAlonid’a d’igi amulâ mi hazi vuna na. 18Suma sunda hi Salomon-na ki suma sunda hi Hiram-ma ki suma Biblos-sâ a tchet ahinad’a, a min aguna kahina d’a ndak á min gong nga kud’ora hAlonid’id’a.
Currently Selected:
1 Amuleina 5: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
