Salmos 90
90
Salmo 90
LIBRO IV
Su'si ma chi ni‑kani ni‑jika iyo ya
1Iya Tátnuni, maa ni kúu iya jasi ndee jasi ndoso ña'a
nuu ja u'vi ma, te ka kaku sa,
te sukan ni yo kuu ni ji'in tna'a sa tee jana'a ma.
2Te maa ni kúu Su'si onde xi'na xeen‑ka ma,
nuu ñatuu jin kuva'a‑ka yuku a, ji'in ñu'ú ya,
ji'in ñuu ñayivi a,
te maa ni kúu Su'si ni‑kani ni‑jika, te sukan kó kuu.
3Te sa'a ni ja ka ndo'o ka neni ñayii ma
onde kenda kivi ja jin kûu i ma,
te jin nduu i ñuyaka‑nka‑ni, vaa ñuyaka‑ni ka kuu i.
4Te mil kuiya ma chi kuenda tnu'u ja sukan‑ni ni ya'a kivi iku ma
sukan‑ni kúu nuu maa ni, vi Su'si,
xi kuenda tnu'u ja ni ya'a jakuaa ma te ve ndii ma‑ni,
sukan‑ni kúu nuu maa ni.
5Te kuenda tnu'u ja xndechi ni ñayii ma kuan koo i‑ni kúu,
xi kuenda tnu'u ja jani o ma‑ni,
sukan‑ni ka kuu ñayii ma nuu ni,
xi sukan kúu yi'i ma ja xtnee ne'e ma‑ni kuii kuii jite i
sukan‑ni ka kuu ñayii ma nuu ni.
6Te ja'nu i, te jáa ita i ma xtnee ne'e ma,
te jañini ma‑ni, te ka ja'nde ña'a i, te yichi i.
7Vaa nuna ndakiti ini ni chi xnaa ña'a ni,
te masu nawa jin sa'a‑ka sa.
8Te ndaka ja u'vi ni ka yo sa'a sa ma,
masu nde ni ka kuyu'u i nuu maa ni a,
vaa ndimaa nde'ya ni nawa ka sa'a ka kuu sa ma, vi Su'si.
9Vaa ve ndi'i kivi jin koteku sa nuu ni,
kuechi ja ndákiti ini ni nuu sa ma,
te sukan‑ni ka kuu in tnu'u ka jani ini sa ma,
sukan‑ni ka kuu sa nuu ni.
10Te kivi ka teku sa kúu uni xiko uxi‑ni (70) kuiya,
te ñayii ka iyo‑ka tnu'u ndee tnu'u ndatnu ma
ka kuu ñayii ka teku kuun xiko (80) kuiya.
Te ndaka kivi ka teku i ma ndimaa tnundo'o tnuneni‑ni ka kuu,
kovaa yachi‑ni ka ya'a kivi yukan,
te kuan ndaja koo sa nuu ni, vi Su'si.
11Másu ka jini ñayii a sukan iyo tnu'u ndee tnu'u ndatnu ni a
ora ndákiti ini ni nuu ñayii ka sa'a ja u'vi ma,
te chukan kúu ja va'a‑ka ja na jin koyu'u ña'a i,
sukan‑va'a máko jin ko sa'a i ja ñatuu játna ini ni ma.
12Kaxtnu'u ni ja na jin ndasa'a sa kuenda,
vaa jaku‑ni kivi jin koteku sa ñuu ñayivi ya,
te na jin jaku'un ini anua sa ya
tnu'u ndichi káxtnu'u ni ma.
13Iya Tátnuni,
¿na saa‑ka kivi, sana ndakokuiñi ni nuu ka iyo sa ya,
te ndunda'vi ini ni tee ka jinukuechi nuu ni a?
14Te xtnee ne'e ma kunda'vi ini xeen tna ña'a ni,
sukan‑va'a jin kata sa te jin koo sii ini sa
ndaka kivi jin koteku sa ma.
15Su'si, chindee ña'a ni ja kua'a xeen kivi na jin koo sii ini tna sa,
sukan kua'a kivi ni wa'a ni tnu'u
ja ni ka yo ndo'o, ni ka yo neni sa ma.
16Sa'a ni ja jin kuni tee ka jinukuechi nuu ni a
ndaka sukan sa'a sukan kúu ni ma,
te sa'ya tata de ma,
na jin kuni i jayiñu'u ni ma.
17Su'si Iya Tátnuni, skuta'vi ña'a ni ja vii ja va'a,
te sa'a ni ja tniñu ka sa'a sa ma, masu saneé sañuu‑ni ko kuu i.
Saa vi, Su'si, sa'a ni ja na kendoo va'a i.
Currently Selected:
Salmos 90: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
